Takatwasane Izipiti 39
39
Wacaisi ku sangirageragelanane ki barakalai
(Takatwasane Izipiti 28.1-14)
1Kwini lalasu arakai ku salesese, thilalatadhane si maduduli ka gialrane caisi ku sangiragelanane ki labarakalai, lu kauawngu ikai ki Alrivilrivi ka taikaikaiyane. Kwi lalasu pasiakai ki Arungu caisi ku alrivilrivi ka laimai. Kikai yai singiakai ku tapelaelane ki Tamatama ki Musi si pia.
2Kwini lalasu arakai ku kingi ka valrai, salesese, thilalatadhane, maduduli ka gialrane, si kaimadhane pia ku alrivilrivi ka laimai ka Ipude. 3Kwini lalasu la malra kwini kingi tangetange tulubiiri, si kaciane tukakulai, la apaelrelre kadapi ki kaimadhane si salesese, thilalatadhane, maduduli ka gialrane. 4Kwini lalasu la pasikainga ki Ipude pia ku drusa ku talabathane, caisi ki apaecebe ki babiabila, wadulru madu lrithethe. 5Kwini nicaisane paraisi ki Ipude, sarakaiyane lrithethe ka lakete, ka niarakaiyane ku thadalrane ku sarakaiyane darepe, arakai darepe ku kingi ka valrai, salesese, thilalatadhane, maduduli ka gialrane, si kaimadhane. Kikai yai singiakai ku tacunane ki Tamatama ki Musi si pangimia. 6Kwini lalasu la arakaainga ku drusa ka duduli ka manau ciyu paraisi pikai ki taneneane ka kingi, la kalrilriigili pacase ku lanagane ki tai 12 ka lalalake ki Iseraylri. 7Kikai drusa ka tinukucingalrane ka sapalrawthu nicaisane pikai ki drusa ka talabathane ki Ipude, ka ngiatalikaiyane ki tai 12 ka lazuku ki swa Iseraylri. Kikai yai singiakai ku tacunane ki Tamatama ki Musi si pangimia.
Twatupi
(Takatwasane Izipiti 28.15-30)
8Kwini lalasu la arakainga ku kingi ka valrai, salesese, thilalatadhane, maduduli ka gialrane, si kaimadhane pia ku tupi, pamamwa ki nipacasane, mararaamau ku tapangimiane ki Ipude. 9Kwini tupi supate ku piu, la tusipusale apacaculrudu, ku lragiane 22 ka kunhunge, ku ngulapane 22 ka kunhunge. 10Kwini lalasu piakai belengane ki tupi paraisi ku sisupatele ku tinukucingalrane ka sapalrawthu; ku sivaale paraisi ku duduli ku tinukucingalrane ka lrenege, bwaburavane ka pisi, si duduli ka pisi, 11ku sakasipusale salesese ka tinukucingalrane ka lrenege, saneanelame ka thapalrawthu, si daimune; 12ku sakasitulrulu thilalatadhane ka manau; lrawlrapungu ka manau, si thilalatadhane ka sapalrawthu; 13ku sakasisupatele salesese ka pisi ka lrenege, duduli ka pisi, si pisi. Kilakikai patuelre padakipi pikai ki kingi ka taetalane. 14Kwini ki vavaeva ki 12 ka tinukucingalrane ka sapalrawthu la pacase ku nagane ki tangeea ka lalake ki Yakubu, atalingikaiyane ki tai 12 ka lazuku ki swa Iseraylri. 15Kwini lalasu arakai ku kakingiane pia ku sisilu ki tupi, ku tangimiamiane mia ki nipaererecane ka calrisi. 16Kwini lalasu la piana tudrusa ku kakulai ka kingi ka kakalathe si drusa ka kingi ka kalathe, kwini kalathe ka kingi paraisi pikai belenge ki drusa ka awlrulru ki tupi. 17Kwini lalasu wamalra paelre kwini drusa ka kingi ka silu pakalrithethe pikai ki drusa ki tali awlrulru ki kalathe ki tupi. 18Kwini tali thilinga ki awlru ki kingi ka silu la pakerenge ki drusa ka kingi ka kakulai ka kalathe, si pikai ki cucubungu ki talabathane ki Ipude. 19Kwini lalasu la piyanga ku drusa ku kingi ka kalathe, si paraisi pasatali lebe maecebe ki tali awlrulru ki tupi, yakai tali adringi ki babiabila ki Ipude. 20La piyanga ku drusa ku kingi ka kalathe, si paraisi pitali lebeane ki tali cubungu ki Ipude maecebe ki talabathane, padedeethe ki tacaisane, piakai ki tali belenge ki nitutharirane kadapi ka talabathane. 21Kwini lalasu arakai ku salesese ka calrisi sa apaelre erece ki kalathe ki tupi si kalathe ki Ipude, ku adakipane ki tupi ikai belenge ki lakete ki Ipude. Ku kaika akalrabuthane. Kikai yai singiakai ku tacunane ki Tamatama ki Musi si pangimia.
Wacaisi ku drumane ku sangirageragelanane ki barakalai
(Takatwasane Izipiti 28.31-43)
22Ku sapakabelengane ki Ipude ku laimai niarakaiyane ku salesese ka gialrane caisi. 23Kwini ilriane ki maelrelrenge ka laimai wadrima pangithalringulu kadapi, ku kaika akapuricane. 24-26Kwini ngiathalringulu ki talripilripitane ki lebe ki laimai arakai ku salesese, thilalatadhane, maduduli ka gialrane, si kaimadhane pia ku nginanavate, la arakai ku kakingiane ka kikilringi tusagisane. Kikai patuelre yai singiakai ku tacunane ki Tamatama ki Musi si pangimia.
27Kwini lalasu pasiakai ki Arungu si lalalakeini caisi ku sapakadriadringane ka kaimadhane, 28la arakai ku lalasare ka kaimadhane pia ku pagamucu, talrupunu si sarumata, 29la arakai ku kaimadhane si salesese, thilalatadhane, maduduli ka gialrane tuvaeva ka lakete. Ku belenge nipacasane. Kikai patuelre singiakai ku tacunane ki Tamatama ki Musi si pangimia. 30Kwini lalasu la arakai ku kakingiane pia ku vaeva ka sapatuthingalane ka bali ki tapatarumarane, ku belenge la pacase “Tinusaniangane ka Tamatamane”. 31Kwi lalasu arakai ku salesese ku sawculrungane paraisi pikai ki cucubungu ki pagamucu. Kikai patuelre yai singiakai ku tacunane ki Tamatama ki Musi si pangimia.
Twalrepenge ku tatudaanane ki Alrivilrivi ka balrawbau
(Takatwasane Izipiti 35.10-19)
32Ku awngane patuelre ki Alrivilrivi ka balrawbau ki Tamatama twalrepengenga. Ku tacunane ki Tamatama ki Musi, ku mapapangale ki swa Iseraylri paiyanga patuelre. 33Kwini lalasu wamalra ki Alrivilrivi ka balrawbau si patuelre ku lawbubulu ki Alrivilrivi ka balrawbau iluku mucucubungu ki Musi. Ikai kwini yakai ku: Kaili, sapubulriane, babaratane, ulrudru si tapudrapalane ki ulrudru; 34nieremane ku duduli ka sakabungane ka lrangici ki balase ka kiu, mathariri turamuru ka lrangici ka sakabungane, sapaidringane ka balrawbau; 35tapikaiyane ki Langiane, babulriane ki Langiane, sacaebane ki Langiane; 36tapikaikaiyane ki pange ka cukwi, sarakaikaiyane ki cukwi, si sapatarumarane ki Tamatama ka pange; 37kakingiane ka tatinakiane, tinaki, si sarakaikaiyane, si sapakudaladaladhane ka lawlau; 38kingi ka tapatarumaramarane, alrivilrivi ka lawlau, sangwalreme ka sapasangulrelremane, make ki lrawlrawdru ki Alrivilrivi ka balrawbau; 39tapatarumaramarane ka lriwlu si belenge ki tapatarumaramarane ka sara ka lriwlu, ki tapatarumaramarane si sarakaikaiyane, bulavane si tapaneneneane ki vintange; 40saravadrane ka balrawbau ki kalatadrane, ulrudru ki balrawbau si tapatalwane ki ulrudru; make ki samamudaane ki kalatadrane si calrisi, taparairaisane ka ulrudru ki Alrivilrivi ka balrawbau; 41alrivilrivi ka laimai ka silaimaimai ki barakalai lu kipuawawngane ikai ki Alrivilrivi ka taikaikaiyane. 42Ku cunu ki Tamatama ki Musi, ku mapapangale ki swa Iseraylri pangiamianga patuelre. 43Ku Musi wamwa lrilriu drele sanaka awngane, la drele kwini takaungane lini ka singiakai ku tadrekasane ki Tamatama, ku Musi la subulrubulru liniane.
Currently Selected:
Takatwasane Izipiti 39: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
