Takatwasane Izipiti 40

Wacegecege ku Alrivilrivi ka balrawbau

1Ku Tamatama kawariva cunu ki Musi. 2“Kwini ki aswalalanga ki dramare ka aswalalanga ka vai lri pacegecegesu ku Alrivilrivi ka balrawbau, 3la malra kwini tapikaiyane ki Taimangealane ka padradrekase ka Langiane pwadringi, si arakai ku balrawbau paidringi. 4Kusu malra kwini tapikaikaiyane ki pange ka cukwi bulri pudaane, la pibelenge kudra sarakaikaiyane, la malra kwini tatinakiane pudaane, si padalai ku tinaki. 5La malra kwini tapadaladaladhane ki sangwalreme ka kingi ka tapatarumaramarane picucubungu ki Langiane, la kelrai ku make pikai kwini samamudaane ki Alrivilrivi ka balrawbau. 6Malra kudra tapatarumaramarane ki Lama ka lrisi pikai ki cucubungu ki Alrivilrivi ka balrawbau, 7ku tasinasinavane ka tarai la pikai kabicelrakane ki Alrivilrivi ka balrawbau si tapatarumaramarane, la pasuetea ku acilai. 8La malra kwini sapaidringane thalringulu ka makalrilau ki lrilringulu paacegecege, si pikai ki samamudaane paraisi ku make.

9“Kusu la malra ku alrivilrivi ka lawlau drisisi ki Alrivilrivi ka balrawbau si lasarakaikaiyane patuelre, la patukudha tualrivilrivi, 10ala arakai ku lawlau drisisi ki tapatarumaramarane si lasarakaikaiyane patuelre, lani ka alrivilrivi. 11Kusu la mialria arakai ku lawlau drisisi ki tasinasinavane ka tarai si tapaneneane ki tarai, lani ka alrivilrivi.

12“Kusu iluka ki Arungu si lalalakeini ka sawvalai mwa ki lrawlrawdru ki Alrivilrivi ka balrawbau, lani ikai kwini sikelre. 13Pangiragelana ku alrivilrivi ka sangiragelanane ki Arungu, arakai ku alrivilrivi ka lawlau padelreme iniane, lani ka alrivilrivi, abarakalai marasikai kaungu nakwane. 14La mailuka ki lalalake ki Arungu kela, si pasilaimai liniane ku sapakadringane ku laimai, 15arakaiya ku alrivilrivi ka lawlau drisisi liniane, pangimia ku tadrisisane ki tama lini, lani abarakalai kwini lalasu kaamani ku marasiakaikai kaungu nakwane. Kikai alrivilrivi ka lrisi nibadhane ka palralrawthu ka awngane ki barakalai, kwini lalasu anika apalralrawthunga marasikaikai kaungu nakwane.”

16Kikai patueelre ku Musi la singikai ku tacunane ki Tamatama si pangimianga. 17Lakamani kudra sakadrusa ka caili ki aswalalanga ki dramare ka aswalalanga ka vai ku takatwasane lini Izipiti pacegecegenga ku Alrivilrivi ka balrawbau. 18Ku Musi pasutelrai ku tapaulrudrane ki balrawbau, cegecege ku satudaanane, palratuku ku barate, cegecege ku ulrudru. 19Kwi lasu la kabungunga ki cavalri ki Alrivilrivi ka balrawbau, la ikai belenge kabungwana pasabelenge. Kikai patuelre singiakai kudra tacunane ku vaga ki Tamatama ki Musi pangimia. 20Ala malra kwini Taimangealane ka padradrekase pwadringi ki Langiane, la malra ku babulriane pangukakai ki dalrili, la caebe ku sacaebane, 21ala malra kwini Langiane pikai daane ki Alrivilrivi ka balrawbau, la pumake ku sapaidringane ki Langiane. Kikai yai singiakai ku tacunane ki Tamatama ki Musi si pangimianga.

22Ku Musi la malra kwini tapikaikaiyane ki pange ka cukwi pudaane ki Alrivilrivi ka balrawbau, pikai ki tali dradha ki Alrivilrivi ka balrawbau, ikai kwini ki latadre ki make. 23La mialri pikai ki cukwi ku pange ka sapatarumarane ki Tamatama. Kikai yai singiakai ku tacunane ki Tamatama ki Musi pangimianga. 24Kwini lasu la malra ku tapikaikaiyane ki tinaki pikai tali lrawdru ki Alrivilrivi ka balrawbau, macacucubungu ki tapikaikaiyane ki pange ka cukwi, 25la mialri pikai cucubungu ki Tamatama padalai ku tinaki. Kikai yai singiakai ku tacunane ki Tamatama ki Musi pangimianga. 26Kwini lasu la malra kwini kingi ka tapatarumaramarane pikai ki Alrivilrivi ka balrawbau, ikai ki cucubungu ki make, 27piakai ki tapatarumaramarane lama ku sangwalreme. Kikai yai singiakai ku tacunane ki Tamatama ki Musi pangimianga. 28Kwini lasu la pikai ki samamudaane ki Alrivilrivi ka balrawbau pumake ki lrawlrawdru, 29ikai ki cucubungu ki make piakai ku tapatarumaramarane ki Lama ka lrisi, ala pibelenge ki tapatarumaramarane patarumara ku Lama ka lrisi si Taleke ka lrisi. Kikai singiakai ku tacunane ki Tamatama ki Musi pangimianga. 30Kwini lasu la malra ku tasinasinavane ka tarai pikai ki kabicelrakane ki Alrivilrivi ka balrawbau si tapatarumaramarane, pasuete ku acilai kwini ki tarai. 31-32Ku Musi, Arungu, si lalalake ki Arungu lu mudaane ki Alrivilrivi ka balrawbau, la arakai kwini ki yakai ki tarai ka acilai tawlrima tawdrapale. Kikai yai singiakai ku tacunane ki Tamatama ki Musi pangimianga. 33Ku Musi la pikai ki Alrivilrivi ka balrawbau si tapatarumaramarane cegecege ku sathalringulane ravadre. Tukalatadrane, si ikai kwini ki samamudaane ki kalatadrane pumake. La pangimia kikai, kwini lasu la patulreepengenga sanaka laawngane.

Ku ememe wakabungu ki Alrivilrivi ka balrawbau ki Tamatama

(Taasipane 9.15-23)

34Kikwini kwidra, ku ememe wakabungu ki Alrivilrivi ka balrawbau, ku draredrare ki Tamatama la suetenga ki Alrivilrivi ka balrawbau. 35Ku Musi kai lri maka mudaane ki Alrivilrivi ka balrawbau; asi lwiyane ku ememe yadrengere ikai taibelenge ki Alrivilrivi ka balrawbau, ku draredrare ki Tamatama swaete ikai adringi ki Alrivilrivi ka balrawbau. 36Lu twalai ki Alrivilrivi ka balrawbau mubelenge ku ememe, ku swa Iseraylri mwalra kwini tasuladhane si katwase. 37Sana idrengere ku ememe, kwini lalasu la cegecege ku balrawbau kai ngivelevele. 38Ikai kwini ki kadadalranane lini patuelre, lukavaiyane, kwini lalasu wadrele ki ememe ki Tamatama ikai taibelenge ki Alrivilrivi ka balrawbau, lukamaungu, la drele ikai ki ememe ku kwadaladalai ka apwi.

Currently Selected:

Takatwasane Izipiti 40: NDV

Highlight

Copy

Compare