Takatwasane Izipiti 38
38
Twatapatarumaramarane
(Takatwasane Izipiti 27.1-8)
1Kwini lasu arakai ku bwaburavane ka paela ka angatu darepe ku tapatarumaramarane ki Lama ka lrisi. Kwini tapatarumaramarane yai supate ku piu maramaramau, ku lragiane drusa ka mituru si drusa ka kuncunge, ku ngulapane drusa ka mituru si drusa ka kuncunge, ku ubelengane vaeva ka mituru si tulru ka kuncunge. 2Kwi lasu piakai ki supate ka piu ki tapatarumaramarane pabukuthungane ku lawngu, apararaisi ki tapatarumaramarane kavaevanga, si arakai ku lriwlu cabu ki tapatarumaramarane. 3Kai lasu pasiakai ki tapatarumaramarane pia ku sarakaikaiyane ku latakaiyane patuelre: Vintange ku sakadrakadravane, kisi, sathedethedelrane, tagagane; kikai la arakai ku lriwlu darepe patuelre. 4Kwi lasu pasiakai ki tapatarumaramarane pia ku lriwlu ka ami, si paipai pikai kwini tali barange papulelebe ki tapatarumaramarane, la papubebelenge paipai lribate ki tali barange ki tapatarumaramarane. 5Kwi lasu la pia ku supate ku lriwlu ka kakalathe ka tatakaikaiyane bulri, pikai ki supate ka piu. 6La arakai ku bwaburavane ka paela ka angatu darepe ku sabulriane ki tapatarumaramarane, arakai ku lriwlu cabu, 7si pangulratuku ki tali cigiane ki tapatarumaramarane ka kakalathe, kwini tapatarumaramarane arakai ku baali darepe, ku kabicelrakane yai ungawngau.
Twavintange ka lriwlu
(Takatwasane Izipiti 30.18)
8Kwini lasu la darepe ku vaeva ku lriwlu ka vintange si taneneane ki vintange, arakai kudra sangikakailunganane kwini ki yakai ki lrawlrawdru ki Alrivilrivi ka balrawbau kisikawkawlu ka labaibai darepe.
Twa kalatadrane ki Alrivilrivi ka balrawbau ki Tamatama
(Takatwasane Izipiti 27.9-19)
9Kwini lasu arakai kwidra nitumakeane ka kaimadhane pia tusaravadrane ki Alrivilrivi ka balrawbau ki Tamatama, si tukalatadrane. Kwini tali lrawdru ku make ku lragiane 44 ka mituru, 10La arakai ku mapusale ku lriwlu ka ulrudru pawlrudru, ku kaili si bulri ki ulrudru niarakaiyane ku gingi darepe. 11Kwini sa tali dradha ka make laka thadalrane, ku lragiane 44 ka mituru, laka mapusale ku niarakaiyane ku lriwlu ka ulrudru pawlrudru, ku kaili ki ulrudru si barate laka niarakaiyane ku gingi darepe. 12Kwini satali talriwgane ku make 22 ka mituru ku lragiane, yakai ku mangeale ku nitutaneneane ki ulrudru pawlrudru. Ku kaili ki ulrudru si barate laka niarakaiyane ku gingi darepe. 13Ikai tali talrawane, ku samamudaane ki kalatadrane, ku make mialri ka 22 ka mituru ku ngulapane. 14-15Kwini tali tara cigiane ki lrawlrawdru ku ngulapane ki make eneme ka mituru si eneme ka kuncunge, laka tulru ku yakai ku taneneane ku ulrudru pawlrudru. 16Kwini ngiathalringulu ki kalatadrane patuelre ku make niara kaimadhane darepe patuelre. 17Ku taneneane ki ulrudru yai, niara lriwlane; ku kaili, sabarebare, si ringaringau ki ulrudru ku sacabwane gingi patuelre. Ku ngiathalringulu ki kalatadrane ku ulrudru arakai ku gingi ka sabarebare aparairaisi. 18Ki swadaane ki kalatadrane ku make yai, niarakaiyane ku kaimadhane si salesese, thilalatadhane, maduduli ka niarakaiyane ku gialrane, ku belenge yakai ku nipacasane, ku ngulapane bangate ka mituru, ku ubelengane drusa ka mituru, ku ubelengane mararamau ki make ki kalatadrane. 19Yakai ku supate ku taneneane ki ulrudru pawlrudru, ku belenge ki ulrudru ku kaili, si ringaringau ku sacabwane, si sabarebare gingi patuelre. 20Ku Alrivilrivi ka balrawbau si saravadrane ki kalatadrane ku taparairaisane ka ulrudru yai, niara lriwlane darepe patuelre.
Laadreme ka sarakaiyane ki Alrivilrivi ka balrawbau
21Kwidra tapikaiyane ki drusa ka alibi ka lrenege ikai ki Alrivilrivi ka balrawbau ku sarakaiyane ku adreme ku takathane nipacasane pikai lebe. Kikai nipacasane singikai ku tadrekasane ki Musi, laka Ithamare ka lalake ki Arungu ku marasiakai, si ka swa Lrivi ka padulru.
22Ku drekase ki Tamatama ku atumanane, laka swa Yuda ka agane ki Hure, lalake ki Uri ka Bizale ku amaanilringa kalri marasikai kaungu. 23Kwidra taraparalubu iniane, swa Dange ka zuku lalake ki Ahisamake ka Uhulriabe amani ku tarapapacase si taratuzimingi, mialri dulru arakai ku salesese, thilalatadhane si maduli ka gialrane tinunu tukaimadhane.
24Pakai ku satudaanane ki Alrivilrivi ka taikaikaiyane la patarumara ku kingi baai ki Tamatama, singiakai ku tangimiamiane ki Alrivilrivi ka taikaikaiyane lekete ku apakathane, paelreelrenga kudrulu ka kukingi. 25Patwalai ki tapacasane ki dadadaane sarubu ku gingi, singikai ku tangimiane ki Alrivilrivi ka taikaikaiyane lekete ku akathane, paelreelrenga 3,430 ka kukingi. 26Kikai takathane singikai ku takathane ku tapacasane ki dadadaane, ku tangeangeea singikai ku takathane ki taleketane ki Alrivilrivi ka taikaikaiyane si baai ku gingi. Ku kiapacase ku umawmase ku taramapusalenga ka caili papubebelenge paelreelrenga 603,550. 27Kwini lalasu arakai ku 3,400 ka kukingi ku gingi darepe ku idai ku gingi ka tapikaiyane ki Alrivilrivi ka balrawbau si makalrilau, ku vaeva ku telregane 34 ka kukingi. 28Ku tedrane ku gingi matulrulu ka kukingi, ku Bizale la arakai cabu ki sabarebare ki ulrudru, kaili si karingavane ki ulrudru. 29Ku nipatarumarane ki Tamatama ku lriwlu paelreelrenga 2,425 ka kukingi. 30La arakai kikai lriwlu darepe ku taneneane ki samamudaane ki Alrivilrivi ka balrawbau, lriwlu ka tapatarumaramarane, sara ka lriwlu ikai belenge ki tapatarumaramarane, si sarukurukudru ki tapatarumaramarane patueelre, 31ku taneneneane pangithalringulu ki kalatadrane si samamwa daane ki kalatadrane, si patueelre ki Alrivilrivi ka balrawbau si sarakaiyane ki ngiathalringulu kalatadrane ka taparairaisane ka ulrudru.
Currently Selected:
Takatwasane Izipiti 38: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
