Takatwasane Izipiti 37
37
Darepe tu Langiane
(Takatwasane Izipiti 25.10-22)
1Ku Bizale arakai ku bwaburavane ka paela ka angatu darepe tu Langiane, ku lragiane ki Langiane 110 ka kunhunge, ku ngulapane 66 ka kunhunge, ku ubelengane 66 ka kunhunge. 2Arakai ku kakingiane tusacabwane ki Langiane, la pangithalringulu padakipi ku kingi. 3Kwini lasu la tusupate tukakalathe ku kingi ka sarakaikaiyane bulri, piakai ki supate ka drapale ki Langiane, tara drusa maecebe ki thili. 4Kwini lasu arakai ku bwaburavane ka paela ka angatu tudrusa ku babulriane, la arakai ku kingi cabu, 5la palratuku kwini ki maecebe ki kingi ka kakalathe ki Langiane. 6Kwini lasu arakai ku kakingiane pia ku vaeva ku sacaecaebane, ku lragiane ki Langiane 110 ka kunhunge, ku ngulapane 66 ka kunhunge, 7la arakai ku kingi daedarepe ku drusa ku Kirubime, 8kwini ki tarababiabila ki sacaecaebane tara pakavaeva, mararaisi ki sacaecaebane, si kavaevanga. 9Kwini drusa ka Kirubime macacucubungu, paipai ku sapakepake, si kabungu ki sacaecaebane ki Langiane.
Twacukwi ku tapikaikaiyane ki pange
(Takatwasane Izipiti 25.23-30)
10Ku Bizale arakai ku bwaburavane ka paela ka angatu tuvaeva ku tapikaikaiyane ki pange ka cukwi, ku lragiane 88 ka kunhunge, ku ngulapane 44 ka kunhunge, ku ubelengane 66 ka kunhunge. 11Kwi lasu arakai ku kakingiane cabu, si thalringulu padakipi ku kingi ki ngwababiabila. 12Kwini babiabila ki cukwi ngithalringulu lri drima ku 75 ka kunlri ku ngulapane, kwini ki babiabila lai lri padakipi ku kingi. 13Kwi lasu la tusupate ku tapangukaikaiyane bulri ku kakalathe ka kingi, pasutelrai pikai ki supate ki drapale. 14Kwini kakalathe padethe ki babiabila, ku lrika apalratukane ki babulriane ki cukwi. 15Kwi lasu arakai ku bwaburavane ka paela ka angatu tubabulriane, la arakai ku kingi cabu. 16Kwi lasu arakai ku kakingiane darepe ku takaiyane ki cukwi, amani ku usara, tapatalutalwane ka usara si yakange ka sarakaikaiyane paralikiliki ku bava si kupu.
Twatatinakiane
(Takatwasane Izipiti 25.31-40)
17Kwini lasu arakai ku kakingiane darepe ku vaeva ku tatinakiane: Ku tatinakiane, tapaneneneane si ulrudru arakai ku kingi daedarepe patuelre; ku sapangiraeragelanane ku bengelrai, tutungu, parairaisi tuvaeva.
18Ku tarathili ki taneneneane ki tinaki la turicingi ku eneme, apaecebe taratulru. 19Ki cebecebeane tulrutulru ku bengelrai, ku tangimiane mia ki alumundu, yakai ku tutungu si bengelrai. 20Kwini drapale ki taneneneane ki tinaki yakai ku supate ku bengelrai, ku tangimiane mia ki alumundu, yakai ku tutungu si rigai. 21Kwini tulru ka ricingi ki vavaeva tailebeane la ikai ku vaeva ku tutungu. 22Ku tutungu, ricingi si taneneneane niarakaiyane ku kakingiane darepe patuelre. 23Kwi lasu la pasikai ki taneneneane tupitu ku tatinakiane, si arakai ki kakingiane darepe ku kaciane ki tinaki si tapikaikaiyane ki rusuku ka usara. 24Kwi lasu arakai ku 35 kukingi ka kakingiane darepe ku tatinakiane si la takaiyane.
Twa tapatarumaramarane ki taliane
(Takatwasane Izipiti 30.1-5)
25Kwi lasu arakai ku bwaburavane ka paela ka angatu darepe ku vaeva ku tapatarumaramarane ki taliane. Kwini tapatarumaramarane supate ku piu maramaramau, ku lragiane 45 ka kunhunge, ku ngulapane 45 ka kunhunge, ku mubelengane 90 ka kunhunge. Kwini bwakuthungane ka piu ki tapatarumaramarane mararaisi ki tapatarumaramarane avaevanga. 26Kwi lasu arakai ku kakingiane cabu ki ringaringau ki tapatarumaramarane si pangithalringulu, si supate ka piu, la pangithalringulu padakipi ku kingi. 27Kwi lasu la tudrusa ku kingi ka kakalathe ku tabulribulriane ki tapatarumaramarane, paraisi pikai tailebeane paecebe ki tali cigiane ki tapatarumaramarane, ku lrika apangulratukane ku babulriane ki tapatarumaramarane ki taliane. 28Kwi lasu arakai ku bwaburavane ka paela ka angatu tubabulriane, la arakai ku kingi cabu.
Twa mabula ka lawlau si sangwalreme
(Takatwasane Izipiti 30.22-38)
29Kwi lasu mialri apaelrelre tualrivilrivi ka lawlau si sangwalreme, mia lu apaelrelre tusangwalreme ka acilai.
Currently Selected:
Takatwasane Izipiti 37: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
