Takatwasane Izipiti 36
36
1“Ku Bizale, Uhulriabe si drumane ka lasialrima, amani kwidra kiapatarumara ki Tamatama ku lrigilane daedarepe, wathingale ku lrika apangimiane ku Alrivilrivi ka balrawbau ka laumawmase, lri singikaai ku cunu ki Tamatama pia ku laawngane tudaane.”
Ku mapapangale patarwamara ku saceacebe
2Ku Musi wasarubu ki Bizale, Uhulriabe si kwini sanaka kiapatarumara ki Tamatama ku lrigilane, si palraingi paralubu kaungu ka umawmase, wacunu liniane pathagili kaungu. 3Kwini lalasu wamwa ki Musi kibaai kwidra nipatarumarane acebe ki la swa Iseraylri pasikai ki atudaanane ku Alrivilrivi ka balrawbau. Ai, lukamialrealre, ku mapapangale wakelakeelana iluku ku saceacebe, si baai pwa ki Musi. 4Ngwalai kikai, kwini lalri kamani ku maungu la idrengereana ku awngane lini, 5la mwa kikawriva ki Musi, iya kai, “Ku patarumara ki mapapangale sialribatenga kwidra ki cunu ki Tamatama ku satudaanane.”
6Ku Musi la pakatwase pelaela palraelre ki mapapangale imianga ku apatarumarane ki Alrivilrivi ka balrawbau iya. 7Asi lwiyane kwidra nitarumarane ku saceacebe makakelretenga patulrepenge ki satudaanane si lalri puteedrana.
Twadaane ku Alrivilrivi ka balrawbau ki Tamatama
(Takatwasane Izipiti 26.1-37)
8Ikai kwini ki la kiapuawawngane kudra la malrigili ku alrima lini kaamani ku twadaane ku Alrivilrivi ka balrawbau ki Tamatama. Kwini lalasu arakai ku mangeale ku makalrilau tudaane ku balrawbau. Kikai balrawbau arakaiya ku kaimadhane si salesese, thilalatadhane, maduduli ka gialrane darepe, si pacase ku pacase ki Kirubime. 9Kwini vaevaeva ku adravane la maramaramau, ku lragiane 12 ka mituru, ku ngulapane drusa ka mituru. 10La malra kwini tailrimane paelrelre caisi, rathudu tutaingeane, kwini tailrimane la tuthadaalrane ku tapiane. 11Kwini lalasu ikai ki taingeane ka nirathudane ka makalrilau ki sababiabilanga la caisi ku salesese ku tapwane ku sauculrungane. 12Kwini lalasu la malra kwini malrimale ku tapwane ki sauculrungane caisi pikai ki aswalaalanga ki mwasakavaeva ka nierecane ku taingeane ka malrimale ka sawculrungane, la caisi pikai ki mwasakadrusa ki lapiu. 13La darepe ku malrimale ku kingi ka sakakaili, la malra pararaisi paelre kai ki taidrusane.
14Kwini lalasu la arakai ku niarakaiyane ku ubale ki kakiuane pia tu 11 ku balrawbau tutalrugulrugane ki Alrivilrivi ka balrawbau. 15Kwini vavaeva ku takathane la paramaramau: Ku lragiane 13 ka mituru, ku ngulapane drusa ka mituru. 16Kwini tailrimane la caisi paelrelre, tuvaeva, kwini enemenga la tutaingeane. 17Kwini tali babiabila ki salrilrikudrunga ki mwasakavaeva ka balrawbau la caisi tumalrimale ku sauculrungane. Ku maelane ka taingeane la pangubabiabila caisi ku sawculrungane tumalrimale. 18La tumalrimale ku lriwlu tusakakaili, la malra kwini taidrusane ka balrawbau apararaisi, tuvaevanga ka talrugulrugane. 19Kwi lalasu ku drumane la arakai ku nieremane ku duduli ka lrangici ki balase ka kiu si maelane ka taingeane ka tinutharirane ka lrangici ka nitudrusane ka talrugulrugane, si tusapasabelengane ki cavalri ki Alrivilrivi ka balrawbau.
20Kwi lalasu arakai ku bwaburavane ka paela ka angatu tusacegecegane ka ulrudru ki Alrivilrivi ka balrawbau. 21Kwini vaevaeva ka ulrudru ku ubelengane supate ka mituru, ku ngulapane 66 ka kunhunge, 22la tara tudrusa ku tamacaculruculrwane, tamacaculruane ki labulri. Sanaka bulri yakaai ku taculruculruane. 23La pikai ki tali lrawdru ki Alrivilrivi ka balrawbau cegecege ku mapusale ku bulri, 24kwini lebe ki bulri la pikai ku masupatele ku gingi ku taacegecegane, kwini ki vaevaeva laka drusa ku gingi ka tapacegecegane paulrudru. 25Kwi lalasu la pikai ki tali dradha ki Alrivilrivi ka balrawbau cegecege ku mapusale ka bulri, 26si masupatele ku gingi ka tapacegecegane, kwini tailebeane ki vavaeva ki bulri piakai ku drusa ku tapacegecegane ka gingi. 27Pikai ki tali lrilrikudru ki Alrivilrivi ka balrawbau, kwini ki tali sapakalriwgu ki Alrivilrivi ka balrawbau, wacegecege ku eneme ku bulri; 28kwini ki piyu la pikai ku drusa ku bulri. 29Kwini tailebeane ki drusa ka bulri la pararaisi, mararaisi pakela taibelengane, ka vaeva ka nipangusivaalane pangithalringulu. Kwini lrika tali piyu ka drusa ka bulri laka thadalrane ku tangimiane. 30Lu elrelreane lrika valru ku bulri si 16 ku tapacegecegane, ki vavaeva ki bulri tailebe latara ikai ku drusa ku tapacegecegane ka gingi. 31Kwi lalasu la arakai ku bwaburavane ka paela ka angatu tusabaratane ka bulri tu 15; kwini tali thili ki Alrivilrivi ka balrawbau ku bulri lrima ku sabaratane, 32kwini tali thili laka lrima; kwini lrilrikudru ki Alrivilrivi ka balrawbau, ka tali sapakalriwgu ki Alrivilrivi ka balrawbau, mialri pakalrima. 33Kwini sa kabicelrakane ka sabaratane yakai ki tali barabarange ki bulri pasutelrai, twalai ki tali awlrulru pakela ki thili ki tali awlrulru. 34Arakaiya ku kingi cabu ki bulri, si paraisi ku kingi ka kakalathe, ku lrika angukakaiyane barate ki angatu; kwini sabaratane ka angatu mialri arakai ku kingi cabu.
35Kwi lalasu arakai ku kaimadhane si salesese, thilalatadhane, maduduli ka gialrane darepe ku vaeva ku make, kwini belenge la pacase ku mia ki Kirubime. 36Kwi lalasu la malra kikai make kelrai pubelenge kwini ki supate ka niarakaiyane ku bwaburavane ka paela ka angatu ka ulrudru. Ku ulrudru arakai ku kingi cabu, kwini belenge ki ulrudru la ikai ku kingi ka sakakaili, kwi lalasu la pasikai ki ulrudru pia ku supate ka gingi ka tapacegecegane. 37Kwi lalasu arakai ku kaimadhane si salesese, thilalatadhane, maduduli ka gialrane pasikai ki samamudaane ki Alrivilrivi ka balrawbau pia ku make ki lrawlrawdru, kwini belenge ki make la pacase. 38Kwi lalasu pasiakai kikai ki make ki lrawlrawdru pia ku lrima ku ulrudru, kwini ki ulrudru yakai ku sakakaili. Kwini karingavane ki ulrudru si sabarebare ki ulrudru arakai ku kingi cabu patuelre, la pasikai ki ulrudru pia ku lrima ku lriwlu ka tacegecegane.
Currently Selected:
Takatwasane Izipiti 36: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
