Takatwasane Izipiti 35
35
Kakudhane ki Taisadrasadrane ka vai
1Ku Musi wasarubu ki mapapangale ki swa Iseraylri makanaelre, la iya kai liniane, “Kikai yai padradrekase ki Tamatama ka paluluda iya numiane: 2Kunumi yakai ku amakanemelane kaungu, luka samakapitulu amani ku saniange ka vai, lrika atara baadhane nakwane ka Tamatama tutaisadrasadrane ka vai. Sanaka yakai kai ki vai kaungu ku umawmase lri tara kipapacai. 3Ikai ki Taisadrasadrane ka vai, adravane ka yakai tavanane mialri kaika nipalraingane ku twapwi.”
Patarwamara pasikai ki Alrivilrivi ka balrawbau
(Takatwasane Izipiti 25.1-9)
4Ku Musi kawariva ki mapapangale ki swa Iseraylri, “Amia kai ku Tamatama: 5Kunumi patarumara ki Tamatama ku saceacebe. Sanaka nikiraragadhane patarumara nakwane ku kingi, gingi, lriwlu; 6kaimadhane; salesese, thilalatadhane si maduduli ka gialrane; makalrilau ka ubale ki kakiuane; 7nieremane tududuli ka lrangici ki balase ka kiu; maidelrethe ka lrangici; bwaburavane ka paela ka angatu; 8tinaki; satulawlaulavane si satusangulrelremanane; 9saarakaiyane pacaisi paciyu ki silaimaimai ka Ipude ki abebeelengenga ki barakalai si nipicucubungane ki tuku ka direrele ka manau si drumane ka tinukucingalrane ka lrenege.”
Rarukurukudru ki Alrivilrivi ka balrawbau
(Takatwasane Izipiti 39.32-43)
10“Ikai numiane kwidra la sialrimane ku umawmase makitu darepa ku cunu ki Tamatama patuelre ku sarukurukudru: 11Kwini ki Alrivilrivi ka balrawbau, si cavalri ki Alrivilrivi ka balrawbau si salalatadre ka sakabungane, laka kaili ki Alrivilrivi ka balrawbau, sapubulriane, sabaratane, ulrudru si tacegecegane ki ulrudru; 12Langiane, babulriane ki Langiane, sacaebane ki Langiane si sakabungane ka makalrilau; 13tapikaikaiyane ki pange ka cukwi, babulriane ki cukwi si sanaka sarukurukudru; sapatarumarane ki Twaumase ka pange; 14tatinakiane si la sarukurukudru; tinaki si lawlau; 15tapatarumaramarane ki taliane si babulriane; mabula ka lawlau si sangwalreeme ka taliane; sapaidringane ki lrawlrawdru ki Alrivilrivi ka balrawbau; 16tapatarumaramarane ki Lama ka lrisi si nipaelreane ka lriwlu ka sara, babulriane si sanaka sarukurukudru; tasinasinavane ka vintange si tapikaikaiyane ki vintange; 17salringulane ka balrawbau ki kalatadrane ki Tasukusukubane, ulrudru si tapikaiyane ki ulrudru; sapaidringane ki lrawlrawdru ki kalatadrane; 18taparairaisane ka ulrudru si calrisi ki Alrivilrivi ka balrawbau si kalatadrane, 19sangiragelanane ka laimai lu kipuawawngane ku barakalai ikai ki Alrivilrivi ka taikaikaiyane, amani kwidra sangiragelanane ki barakalai ka Arungu si lalalakeini.”
Patarumara ki mapapangale
20Ku mapapangale ki swa Iseraylri makanaelre twalai ki Musi katwase; 21sanaka pasingia kidremedreme kiraragai patarumara ku umawmase, makitwa iluku ku saceacebe, patarumara ku saarakaiyane tudaane ki Alrivilrivi ka balrawbau. Makitwa iluku kwidra sanaka sarakaikaiyane lu sukubu si saarakaiyane caisi ku sangiragelanane ki barakalai. 22Kwidra sanaka kiaragai patarumara ku sawvalai ku labaibai la iluku ku sacaicaisane, lridingi, tara, sisilu si makaelaela ka kingi ka sangiragelanane, patarumara ki Tamatama. 23Sanaka piakai ku kaimadhane, salesese, thilalatadhane si maduli ka gialrane, ubale ki kakiuane ka makalrilau, nieremane pakaduli ka lrangici ki balase ka kiu, ku la piakai ku takuciacingalre tathaithariri ka lrangici ku umawmase mialri makitwa kela iluku. 24Sanaka wadulru patarumara ku gingi ku lriwlu ku umawmase makitwa kela patarumara ki Tamatama; ku piakai ku bwaburavane ka paela ka angatu ka satudadaane mialri kela iluku. 25Kwidra la sialrimane ku labaibai makitwa kela iluku ku ngitatinunu lini ku kaimadhane si salesese, thilalatadhane, maduli ka gialrane. 26Mialri lini arakai ku ubale ki kakiuane tuvalrai. 27Ku tarasangililuku la malra kwidra saparaisane ki saniange ka laimai ka Ipude si kudra niparaisane pikai ki tupi ka duduli ka manau si drumane ka tinukucingalrane ka lrenege, 28si sapadaladhane ki tinaki, satusaniangane ka lawlau si satutaliane ka sangulreelreme si lawlau kela iluku. 29Sanaka swa Iseraylri, kai pusawvalai si ababai, pakai ku cunu ki Tamatama ki Musi kwini ki lrika atudaanane, makitwa kiraragai malra ku saceacebe kela iluku, patarumara ki Tamatama.
Taratudaane ku Alrivilrivi ka balrawbau
(Takatwasane Izipiti 31.1-11)
30Ku Musi kawariva ki swa Iseraylri makanaelre, “Patwalainga ku Tamatama ki zuku ki swa Yuda pilringa ki agane ki Hure ka lalake ki Uri ka Bizale. 31Arakai ku Rini#35.31 “Rini” ku wahunyake madu iya kai “maadrau ka puku”. suete iniane; si patarwamara iniane ku thingalane, lrigilane, lrilrigilane tulamanemane, si dulru pia ku makaelaela ku tatumanemanane, 32kelrete ku lrika apangimiane ku pacase, arakai ku kingi, gingi, lriwlu darepe ku makaelaela ku lalawbubulu; 33dulru papacase ki sapalrawthu; papacase ki angatu; si pia ku drumane ku makaelaela ku tadememele ku tapwalrimane. 34Ku Tamatama la baai iniane ku lrilrigilane ka puku si baai ki zuku ki Dange ka lalake ki Ahisamake ka Uhulriabe. 35Ku Twaumase wabaai liniane ku makaelaela ku tasialrimane, si dulru pia ku makaelaela ku tathaithariri ku takaungane, amani kai lawapapacase, wazimingi, watinunu, la arakai ku salesese, thilalatadhane, maduduli ka gialrane pacase, si tinunu tumakalrilau ku makaelaela. Kikai lalasu wadulru pia kikai makaelaela ka awngane, la tuthariri tumakaelaela ku zimingi.”
Currently Selected:
Takatwasane Izipiti 35: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
