Takatwasane Izipiti 34

Sakadrusa ka padradrekase ka alibi ka lrenege

(Tapelane Drekase 10.1-5)

1Ku Tamatama la kawriva ki Musi, “Tulrenega ku drusa ku alibi, pangimia kwidra ki aswalala; lri tupelaku pacase pikai kai ki drusa ka alibi kudra nayakai ki cagecagesu pakacacwake ka alibi ka pacase. 2Lwiya lukamialrealre, kusu ngipapadulrwa, la mulregelrege Sinai, ikai kalididu kidrele nakwane. 3Madha ililuku ki sanaka aneanenga kela mubelenge; kai ki sakalregelregane madha paikaikai ku umawmase, la madha pamwamwa ki lalwange lakiu pagwagu.” 4Ku Musi la tulrenege ku drusa ku alibi, sakakaiyane ki mialrealre, la pangimia ku tacunane ki Tamatama malra kwini alibi iluku mulregelrege.

5Ku Tamatama la ikai ki ememe mulebe, taelre ki Musi acegecege ikai kwini, pelaela ku sanianiangenga ka naganeini. 6Ku Tamatama la ngukakai ki cucubungu ki Musi, pelaela iya kai, “Amaniaku ka Tamatama, ka yakai ku kilibakane si migemi ka Twaumase, kai malisilisi cacapange, ka swaeete ku sakialibake si patengatengane. 7Makecengaku pasusu ku tapuvaganeli, pakeela ki mwabaibalrithi luigaigaiganenga, si supilri ku pasalrivane; ai kainaku lri tukakadrwa ku pasalrivane ki pasalriu ka umawmase, lri tara pathavungaku ku lamwabaibalrithi ki pasalriu ka umawmase, pakela ki sakatulru ki sakasupate ki cucungulane.”

8Ku Musi la makakaai guruthungane idaedae si sukubu. 9La iya kai, “Tamatama, lwiyasi la ikaiyaku cucubungu muswane kikilibake, kiatubiaku muswane tupapalraili. Kikai mapapangale makeelrathe, ai kiatubiaku muswane paceepa kwidra lapasalriu nai, si tarumara naiane akawkawlu muswane.”

Twapela makaketekete

(Takatwasane Izipiti 23.14-19; Tapelane Drekase 7.1-5; 16.1-17)

10Ku Tamatama la iya kai ki Musi, “Kikai lri makaketeketaku ki swa Iseraylri. Lri icucubungaku liniane pia ku maadrau ku awngane, kai kawmasane kadrwana ku swainu, kadrwana ku minzuku ku wadrele. Kwini ngiathalringulu muswane ka laminzuku lri drele nakwane ka Tamatama ku tapianeli, asi lwiyane lri papiaku numiane pia ku matiaukuludru ka awngane. 11Kaikameane peaelaelaku muswane kikai padradrekaseli, kusu pasuswa. Lu arucucubungu numi katwase, lri pakatwasaku ki swa Amuri, swa Kanange, swa Hite, swa Perizi, swa Hivi si swa Yebuse ka umawmase. 12Kusu dradrela, madha makaketeketekete kwini ki amwanesu ka kadaengane ki swakai kwini ka umawmase, asi lwiyane amani kwini kulri papacai muswane ka lravathe. 13Ngiabaalrelringa, kabebetetha baburuku kwini ki tapatarumaramarane, calrigi kadrulu kwini ki sadrengedrenge lini si samiamiange ka ababai ka Asera.

14“Madha sukusukubu ki drumane ka twaumase, asi lwiyane kunaku ka Tamatama kainaku lri maka tarumara kwini kiaecebe nakwane ka twaumase. 15Madha makaketekete ki swakai kwini ki laumawmase, amani lu dawlu numiane pakipaelre lu sukusukubu lu patarumaramara ki twaumase lini, lalri lrilrigili muswane mwa kane ku sapatarumarane ki twaumase lini. 16Ku lalalakesu ka sawvalai alau lri karudrange mwa ki maelane ka zuku, lai lri ngwalai liniane si akabalrithi kai tukucingalrenga nakwane, lai katwase sukubu ki twaumase ki maelane ku takisuswane.

17“Madha darepe madha sukubu ki samiamiange.

18“Pasuswa kwini Tamwalrane ku sapawsemakane ka lrisi. Kusu paluluda kai cunuli, ikai ki dramare ki Abibe kane ku kaika nipawsemakane ka pange, la edeede makapitulu, asi lwiyane amani kwini ki dramare ki Abibe ku takatwasanesu ka Izipiti.

19“Sanaka aswalalanga kitulalake ka sawvalai si aswalalanga kitulalake ka sawvalai ka lanilapulapwane, adravane ka lwange ka kiu, nakwane patuelre; 20ai kusu arakaiya ku lrulai ka kiu tusabalrithane ki aswalalanga kitulalake ka ruba, lu kai langai sawlri, celra kwini ki lreini. Kwini ki lamwabaibalrithi muswane sanaka aswalalanga kitulalake ka sawvalai makitu langadha tusabalrithane.

“Madha paliwnaunai kela sukubu nakwane.

21“Kusu yakai ku amakanemelane kaungu, ai ikai ki samakapitulu, tara isadra; adravane ka kalapawtalekane ka kalakitalekane, mialria tara isaadra.

22“Lulri pathagili kitaleke ku aswalalanga kabea ku mugi pasusu madu ku Takitaletalekane ka lrisi; luka kalalidrarane si lri seketenga madu ku lataleke la pasuswa ki Taseketane ka lrisi.

23“Ki caicaili kingitulrulu, sanaka sawvalai makitu kela sukubu nakwane ka abebeelengenga ka Tamatama, ka Twaumase ki swa Iseraylri. 24Kudra amaniaku ka pakatwase kwini ki laminzuku, si paruswadrau ku kadaenganesu, kusu ki caicaaili lri kingitulrulusu sukubu nakwane, kadrwa ku umawmase ku lri kidredreme ku wakela ribici ku kadaenganesu.

25“Lu patarumarasu ku nilapulapwane nakwane, madha pasilasilange patarumara ku nipawsemakane ka pange. Ku niculwane ku nilapulapwane ki Takilragavane ka lrisi madha pukaiyaiyane pakela ki mialrealre.

26“Ki caicaili malra ku tawkabea ka taleke iluku mwa ki daane ki Tamatama ka Twaumasesu.

“Madha arakaikai ku ethebe ki tina ka kiu lathu ki lrulai ka kiu.”

27Ku Tamatama la kawriva ki Musi, “Malra kikai vaga pacase; asi lwiyane lri singikaiyaku kilakikai vaga, si makaketekete muswane si swa Iseraylri.” 28Ku Musi la ikai ki Tamatama isadra makamasupatele ku vai si awngane, kai kane kai ungulu. La malra kikai vaga ka taimangealane ka padradrekase pacase pikai ki drusa ka alibi ka lrenege.

Ku Musi mwalebe singi lregelrege

29Ku Musi sa mailuku ku taimangealane ka padradrekase singi lregelrege ka Sinai, ku lringau wathelare, amani sa makakawriva ki Tamatama; ai kadrwa ku thingaleini. 30Ku Arungu si mapapangale ki swa Iseraylri sadrele ku lringau ki Musi thelare, mwakuludru deethe iniane. 31Ku Musi bwala la iya liniane; ku Arungu si kiacapili ki mapapangale la mwa, ku Musi la kawriva liniane. 32Ku mapapangale ki swa Iseraylri ala kirimu makitu mwa ki Musi, ku Musi la malra kwini cunu ki Tamatama iniane ikai lregelrege Sinai ku padradrekase pelaela ki mapapangale. 33Samaka kawriva ku Musi liniane, la malra ku salripungai kabungu ki lringauini. 34Sana mudaane ku Musi ki Alrivilrivi ka balrawbau si makakawriva ki Tamatama, tara mwalra kwini salripungai, lu mulatadrenga la malra kwini cunu ki Tamatama ka vaga pelaela ki mapapangale ki swa Iseraylri. 35Kwini lalasu tara wadrele ku lringauini thelare; ku Musi ala arakai ku salripungai kabungu ki lringauini, lulri pelanga mudaane kikawriva ki Tamatama ala mukabungu.

Currently Selected:

Takatwasane Izipiti 34: NDV

Highlight

Copy

Compare