Takatwasane Izipiti 30

Tapatarumaramarane ki tatalianane

(Takatwasane Izipiti 37.25-28)

1“Arakaiya ku bwaburavane ka paela ka angatu darepe ku vaeva ku tapatarumaramarane ki taliane. 2Ku tangimiane kai ki tapatarumaramarane, ku lragiane 45 ka kunhunge, ku ngulapane 45 ka kunhunge, ku abelengane 90 ka kunhunge. Kwini supate ki tatulawngane ki tapatarumaramarane la mararaisi ki tapatarumaramarane kavaevanga. 3Arakaiya ku kakingiane cabu ki ringaringau ki tapatarumaramarane, ki ngiathalringulu si supate ka piyu, la thalringulu ku kingi ki babiabila. 4Tudrusa ku lrimemeteke ka kingi ka tapatarumaramarane ku babulriane, si paraisi pikai tailebeane ki drusa ki tali cigiane ki tapatarumaramarane, lani pangukai ku babulriane ki tapatarumaramarane. 5Arakaiya ku bwaburavane ka paela ka angatu tubabulriane, si arakai ku kingi cabu. 6Kwini tapatarumaramarane ki taliane kelradha pikai ki tali latadre ki makalrilau ki cucubungu ki Langiane, macacucubungu ki sacaecaebane ki Langiane, kikwini amani ku taikaikaiyaneli madredresenge numiane. 7Ki vaivai ki mialrealre, ku Arungu lu kela lripethele ki tatinakiane, lri padalai ku sangwalreeme ku taliane. 8Luka miawawbu lu padalai ku tinaki mialri tara padaladha ku taliane. Lri pacungucungulu pakela ki mwabaibalrithi patarumarane icucubungu nakwane kikai taliane, kai reteretege. 9Madha pikaikai kai ki tapatarumaramarane lama ku taliane, si patarumara ku Lama ka lrisi si Taleke ka lrisi, la madha pikaikai belenge patarumara ku Paralikiliki ka lrisi. 10Lukacaili lri kingivaale, ku Arungu lri pia ku sakibulane ku lrisi, arakai ku erai ki nilapulapwane ki Balrithane ki pasalrivane ka lrisi paralikiliki pwa kwini ki supate ki piyu ka nitulawngane ki tapatarumaramarane. Kwini ki lamwabalribalrithi lri pangimia kikai lrisi. Kikai tapatarumaramarane lri tusaniange, si patarumara nakwane ka Tamatama.”

Patarwamara ku Alrivilrivi ka balrawbau baai ki Tamatama

11Ku Tamatama kawariva ki Musi, 12“Lu asipisu ki umawmase ki swa Iseraylri, lri makitu patarumara nakwane ku sabalrithane ki niake ku paisu, amani lwiyasi lu asiasipi la kipadradresenge ku amatikurwane. 13Sanaka kiapacase ku umawmase lri tara pangimia ku takelretane ki Alrivilrivi ka taikaikaiyane si baai ku takathane, tusapatarumarane nakwane ka acebe. 14Sanaka kiapacase ku umawmase, kwidra taramapusalenga ku caili ku sawvalai, makitu baadha ki Tamatama kikai paisu. 15Kwini abaadhane ku sabalrithane ki niake ka paisu kai lri apakakaela ku matiakukuru si maesaesaesai ka umawmase; ku maesaesaesai kai lri pakakalra baai, ku matiakukuru kai lri pakabekele baai. 16Kwini nimalrane patwalai ki mapapangale ki swa Iseraylri lrika arakaikaiyane ki Alrivilrivi ka balrawbau. Kikai ngipapasikai ki niake lini baai patarumara; lri ngwaladhaku kikai si ngulringau palakebe numiane.”

Bulavane ka vintange

17Ku Tamatama la kawriva ki Musi, 18“Kusu darepa ku tasinasinavane ka bulavane si vaeva ku taneneane ki bulavane ka vintange, malra pukabicelrakane ki Alrivilrivi ka balrawbau si tapatarumaramarane. Kwini vintange la pwa ku acilai. 19-20Ku Arungu si lalalakeini lu mudaane ki Alrivilrivi ka balrawbau, ku wamwa deethe ki tapatarumaramarane si patarumara ki Tamatama, lri arakai kikai acilai tawlrima tawdrapale. Lu pia kai kailri kipapacai; 21kwini lalasu lri tara tawlrima tawdrapale lai kai lri pacai. Kikai lalasu si mwabaibalrithi liniane lrika palralrawthu pasusu kikai kakudhane.”

Tapiapiane tulawlau

22Ku Tamatama la kawriva ki Musi, 23“Malra ku mathaithariringa ku sapasangulrelremane: Ku aciaciladhane ku sasulravane eneme ka kukingi, ku karangekange tulru ka kukingi, ku canpu laka tulru ka kukingi, 24si eneme ka kukingi ka bakuru ki karangekange (patuelre pangimia ku takelretane ki Alrivilrivi ka taikaikaiyane ku telregane), la drima ku supate ka kunsenge ku lawlau ki ulrive, 25pangimia ku tapiapiane ku sangwalreeme ka acilai darepe ku saniange ka lawlau. 26Arakaiya kikai saniange ka lawlau sakidri ki balrawbau, Langiane, 27saarakaikaiyane pikai ku pange ka cukwi si nipibelengane ki cukwi sanaka lawbubulu, tatinakiane si lalawbubulu, patuelre ka tapatarumaramarane ki taliane, 28tapatarumaramarane ku Lama ka lrisi si lawbubulu patuelre, si tasinasinavane ka vintange, si taneneneane ki vintange. 29Patarumara kikai demedeme, lani kitulrepenge kitusaniange patuelre; sanaka kiaraisi ku umawmase si lawbubulu lri kipakadula ki puku ki saniangane. 30Drisisa pwa ki Arungu si lalalakeini ku saniange ka lawlau, si paacegecege liniane abarakalai marasikaikai nakwane. 31Kusu pelaela ki swa Iseraylri, ‘Kwidra mwabaibalrithi, kunumi lu sukubu numi nakwane, arakaiya kikai saniange ka lawlau. 32Madha malramalra kikai saniange ka lawlau si gugu pwa ki kinawmasane ki langumawmase, la madha arakaikai ku thadalrane ku tapiapiane tulawlau. Kikai lawlau yai saniange; kunumi tara tusanianga ka lamanemane. 33Lwiyasi ikai ku umawmase ku twathadalrane tulawlau, ku arakai kikai lawlau si drisisi ki naaneanenga ka kaika barakalai, kwini lasu lri tara patwalai ki kawkawluli kimwalra kisupilri ku nagane.’ ”

Tapiapiane tutaliane

34Ku Tamatama la kawriva ki Musi, “Malra kikai la makaelaela ku tasangulremanane: Setakete, unika, galabanume si sangwalreeme ka lawlau, ku takathane maramaramau, 35arakaiya ku tapiapiane tusangulreme ka acilai. Ala drima ku timu, ani alrivilrivi kasaniange. 36Malra kivala si silribu paalragumu, la iluku mwa ki balrawbauli, si sabulu pikai cucubungu ki Langiane, ka taikaikaiyaneli madredresenge muswane. Kikai taliane yai tinusaniange turamuru ka lawbubulu. 37Madha arakaikai ku thadalrane ku tapiapiane tutaliane; kwini apatarumarane nakwane ka saniange ka lawbubulu. 38Alaiyasi ikai ku umawmase ku twangimiyaiya kai tutaliane, si ngiarakai, kwini lasu lri tara kipatwalai ki kawkawluli kimwalra kisupilri ku nagane.”

Currently Selected:

Takatwasane Izipiti 30: NDV

Highlight

Copy

Compare