Takatwasane Izipiti 29
29
Kakudhane lu paacegecege paabarakalai ki Arungu si lalalakeini
(Lrivi 8.1-36)
1“Baadha ku mabula ka awngane ki Arungu si lalalakeini, paacegecege liniane paabarakalai marasikai nakwane. Ku lrika apianesu amani kikai: Malra ku vaeva ku lrulai ka sawvalai ka lwange si drusa ka mwadringadringai ka balase ka nikiubawbalane ka kiu; 2arakaiya ku mathaithariringa ku milrikinku akame ku kaika nipawsemakane ku pange, nipulawlavane ka kaika nipawsemakane ka pange, la akame ku nidrisisane ku lawlau ka malubiri ka kaika nipawsemakane ka pange. 3La malra kikai pange puragele pikai ki cepenge, lu patarumarasu ku lrulai ka sawvalai ka lwange si drusa ka balase ka nikiubawbalane ka kiu la patarumara nakwane.
4“Kusu iluka ki Arungu si lalalakeini mwa ki samamudaane ki Alrivilrivi ka balrawbau, cunu liniane sikelrea iya. 5Ala pasilaimai ki Arungu ku barakaladhane ku sapakadriadringane, nipakelradhane ku Ipude ka palimemelre, tupi si lakete. 6La pasipagamucu iniane, si malra kwini nipacasane tu ‘Tinusaniangane ka Tamatamane’ ka bali si pakelrai ki pagamucu, la pasipagamucu iniane, 7ala malrana ku tinusaniangane ka lawlau gugu pwa ki awlruini, si pasudalepe paacegecege iniane.
8“Kusu iluka ki lalalakeini, la pasilaimai ku sapakadriadringane, 9la pasilakete, pasitalrupunu. Kikai yai saniange ka awngane ka abaadhane ki Arungu si lalalakeini ka kakudhane. Kwini lalasu si lacucungulane lini lrika palralrawthu abarakalai marasikai nakwane.
10“Kusu iluka ku sawvalai ka lwange mucucubungu ki Alrivilrivi ka balrawbau, la cunu ki Arungu si lalalakeini ansu pibelenge ki awlru ki lwange. 11Ikai kwini ki samamwa daane ki Alrivilrivi ka balrawbau, icucubungu nakwane, la culu kwini sawvalai ka lwange. 12Malra ngutiiki ku erai ki lwange, la arakai ku galawgau sakidri kwini yakai ki tapatarumaramarane ka supate ka piyu; ku tedrane ku erai la gugu pwa ki drapale ki tapatarumaramarane. 13Ala malra kwini nicabwane arakai ku lamace ka taliadriadringi, si kwini takatharirane ki athai, si masasialamace ka drusa ka pede, la pikai ki tapatarumaramarane lama patarumara nakwane. 14Ai ku beate, lrangici si laburu ki sawvalai ka lwange pikaiya lrilringulu ki tasuladhane lama. Kikai yai, amani ku sapatarumarane ki Balrithane ki pasalrivane ka lrisi.
15“Kusu malra ku vaeva ku balase ka nikiubawbalane ka kiu, la cunu ki Arungu si lalalakeini la ansu pibelenge ki awlru ki kiu. 16La culu kwini balase ka nikiubawbalane ka kiu, la malra ku eraini si paralikiliki thalringulu ki tapatarumaramarane. 17Kusu kwini balase ka nikiubawbalane ka kiu la teketeka pautatiki; si sinau bula kwini tali adriadringi si vagisi, la pubelenge ki awlru si laniteketekane. 18Kwini balase ka nikiubawbalane ka kiu la pakaelrea pubelenge ki tapatarumaramarane si lama, tu Lama ka lrisi patarumara nakwane ka Tamatama. Ku sangulremane ki Apwi ka lrisi amani ku akiragadhaneli.
19“Kusu malra ku vaevanga ku balase ka nikiubawbalane ka kiu, si cunu ki Arungu si lalalakeini si ansu ki awlru ki kiu. 20La culu kwini balase ka nikiubawbalane ka kiu, la malra ku eraini si sakidri ki tailebeane ki vanale ki calringa ki Arungu si lalalakeini, la mialri sakidri pwa ki vanale ki alrima ka dradrangalrane lini si dradrangalrane ki vanale ki drapale lini. Ku drumane ku erai la paralikilika pangithalringulu ki tapatarumaramarane. 21La malra ku erai ku yabelenge ki tapatarumaramarane si tinusaniangane ka lawlau paralikiliki pwa ki laimai ki Arungu, si paralikiliki pwa ki laimai ki lalalake ki Arungu. Lu mia kikai ku Arungu si lalalakeini si laimai lini lrika nitumabulanenga baai nakwane.
22“Kusu gelregelra ku lamace ki balase ka nikiubawbalane ka kiu, tawthu, si sacabwane adringi ka lamace, si takatharirane ki athai, drusa ka masasialamace ka pede si vanale ka vagisi. Kikai amani kudra kakwakudhane lu pacegecege ki barakalai ka sapatarumarane ka balase ka nikubawbalane ka kiu. 23La malra ku vaeva ku pange patwalai ki nipatarumarane nakwane ka tapasukaikaiyane ka cepenge ki kaika nipawsemakane ka pange, vaeva ka niara lawlavane ka pange si vaeva ka malubiiri ka pange. 24La malra ku laakaneane pikai ki alrima ki Arungu si lalalakeini, tusaarakaiyane patarumara nakwane. 25Kusu malra patwalai ki alrima lini tarumara kwini taleke, la pubelenge ki tapatarumaramarane lama, tu Lama ka lrisi patarumara nakwane ka Tamatama. Kikai sangulremane ki Apwi ka lrisi amani ku akiragadhaneli tarumara.
26“Kusu malra ku beate ki tuku ki balase ka nikiubawbalane ka kiu tusapawkalrivilane patarumara nakwane. Kikai sapatarumarane ka beate amani ku drulrusu.
27“Kwidra sangupatarumarane ku beate ki tuku si vagisi ki nikiubawbalane ka kiu lu patarumara ku awngane ki barakalai, tumabula patuelre, si tusapawkalrivilane patarumara nakwane, ala baai ki labarakalai. 28Kwidra kaika atupelaneli ku tinukakudhanane yai: Ku kawkawluli lu patarumaramara ku Sulivatane ka lrisi, ku beate ki tuku si vagisi ki nilapulapwane baadha ki labarakalai; kwini yai, amani ku patarumara ki kawkawluli nakwane ka Tamatama ka nipawkalrivilane ka sapatarumarane.
29“Lu pacainga ku Arungu, ku Laimaini pawcungulanga ki mwabaibalrithi iniane, lani silaimai lu tarumaramara ku awngane. 30Kwidra mwacungulu ki Arungu abarakalai ka lalake, lu kela kai si mudaane ki Alrivilrivi ka balrawbau, ikai ki Alrivilrivi ka taikaikaiyane si marasikaikai nakwane, lri silaimai kikai Laimai, makapitulu ku vai.
31“Lri malrasu kwini niarakaiyanenga ki Arungu si lalalakeini ka beate ki balase ka nikiubawbalane ka kiu. La mwa ki saniange ka taikaikaiyane aga. 32Lri ikai ki lrawlrawdru ki Alrivilrivi ka balrawbau kane kikai beate ki kiu si pange ka yacepengane. 33Kwini lalasu lri mialri kane kwini niarakaiyane ku akaneane sakipatarumara ku awngane si kimupasalrivane sukubu. Kathaane ku barakalai kulri kane, asi lwiyane kikai akaneane tinusaniangane. 34Lwiyasi la ikaiyana ku kaika nielemane ku beate ku pange pakela ki mialrealre, lri tara lama, kai lri pelanga kane, asi lwiyane kikai akaneane nitusaniangane.
35“Kusu pangimia ku cunuli muswane demedeme, pasikaiya ki Arungu si lalalakeini tulrisisi ku takipuawnganane lini makapitulu ku vai. 36Lukavaivai, kusu tara patarumara ku vaeva ku sawvalai ka lwange tu Balrithane ki pasalrivane ka lrisi, lani kabula ku tapatarumaramarane, ala arakaiya ku lawlau ki ulrive sakidri ki tapatarumaramarane, lani kasaniange. 37Lri piasu kikai lukakaiyaiyaiya, edeede makapitulu, lani kitulrepenge ka saniange ku tapatarumaramarane. Sanaka watakela ki tapatarumaramarane ku umawmase ku lawbubulu lri makitu kipakadula ki puku ki saniangane.”
Apatarumarane kivaivai
(Taasipane 28.1-8)
38“Kusu kivaivai pubelenga ki tapatarumaramarane patarumara ku drusa ku taracailinga ku lrulai ka kiu, madha reteretege; 39lukamialrealre patarumara ku vaeva, lukamiauawbu patarumara ku vaeva. 40Lu patarumara ku vaeva ku kiu pasilanga patarumara ku vaeva ka kukingi ku malaelamenge ku milrikinku, si nipalrevegane ki vaeva ka kunsenge ku kaika nipaibwane ku lawlau ki ulrive, la patarumara ku vaeva ka kunsenge ku bava tu Paralikiliki ka lrisi. 41Lu patarumarasu lukamiauawbu ku mwasakadrusa ku kiu, tuthadalrana ki mialrealreane patarumara ku Taleke ka lrisi si Paralikiliki ka lrisi. Kikai nilamane si patarumara nakwane ka Tamatama ka Apwi ka lrisi ku tasangulremane lri pakiragai nakwane. 42Kwidra ki lamwabaibalrithi ka zidai, kikai Lama ka lrisi lri ikai cucubungu nakwane, lri ikai ki lrawlrawdru ki Alrivilrivi ka balrawbau patarumara; amani kwini ku tamadradresenganeli ki kawkawluli ka swa Iseraylri, si makakawriva muswane ka taikaiyane. 43Kunaku lri ikaiyaku kwini madredresenge ki kawkawluli ka swa Iseraylri. Ku lriguli lri tusaniange kwini ki taikaiyane. 44Lri pakabulaku ki Alrivilrivi ka balrawbau si tapatarumaramarane, la malra ki Arungu si lalalakeini pakitukudha, abarakalai marasikai nakwane. 45Lri ikaiyaku ki mapapangale ki swa Iseraylri, lri a Twaumasaku liniane. 46Kwini lalasu lri thingale nakwane ala ka Tamatamaku ka Twaumase lini; kunaku patwaladhaku Izipiti sangiluku liniane, pakai ku aikaiyaneli liniane, kunaku Tamatamaku ka Twaumase lini.”
Currently Selected:
Takatwasane Izipiti 29: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
