Takatwasane Izipiti 28

Laimai ki barakalai

(Takatwasane Izipiti 39.1-7)

1“Patwaladha ki swa Iseraylri pilri ki taka ka Arungu si lalalakeini ka Nadabe, Abihu, Ilriazare si Ithamare, paacegecege liniane paabarakalai marasikai nakwane. 2Pasikaiya ki taka ka Arungu tulaimai ku barakaladhane, lani matipapedrenge matidalame. 3Kusu dawla sanaka baaili liniane pakalrigili kwini ki taradarepe, cunu liniane pasikai ki Arungu caisi ku laimai, pakitukudha si paalrivilrivi iniane, lani ngipapatarumara abarakalai marasikaikai nakwane. 4Cuna liniane tutupi, tulaimai ku Ipude, sapakabelengane ka laimai, pinacasane ka sapakadringane ka laimai, pagamucu, lakete. Kwini lalasu lri pasikai ki taka ka Arungu si lalalakeini pia kikai lalaimai, lani maka abarakalai si marasikai nakwane. 5Kwini taradarepe lri arakai ku kikingiane ka valrai, salesese, thilalatadhane, maduli ka gialrane, si malalasare ka kaimadhane, tulaimai.

6“Kwini lalasu lri arakai ku kikingiane ka valrai, salesese, thilalatadhane, maduli ka mawsingi si malalasare ka kaimadhane caisi ku Ipude ka laimai, la padrima ku nipacasane. 7La paecebe ki Ipude caisi ku drusa ku talabathane ku salrithethane. 8La arakaiya ku thadalrane ku saarakaiyane, arakai ki kikingiane ka valrai, salesese, thilalatadhane, maduli ka gialrane si malalasare ka kaimadhane caisi ku vaeva ku lakete, paraisi ki Ipude, si maelre kavaevanga. 9La arakai ku drusa ku duduli ka manau, la pikai belenge pacase ku lanagane ki ta 12 ka lalalake ki Iseraylri, 10singikaiya ku tamasakaikaiyane ku takitulalakane lini, kwini ki belenge ki tinukucingalrane ka lrenege pacase ku eneme ku lanagane. 11La dawlu kwini ki sialrima ki tinukucingalrane ka lrenege si pikai kwini ki drusa ka tinukucingalrane ka lrenege belenge pacase ku lanagane ki lalalake ki Yakubu, la malra kwini tinukucingalrane ka lrenege paraisi ki kingi ka dameamesai ka kalathe, 12ala pakerenge pwa ki talabathane ki Ipude, sapatuthingalane ki tai 12 ka lazuku ki swa Iseraylri. Lumia kikai, ku Arungu lri pikai ki tabalanganeini mailuku ku nagane ki tai 12 ka lazuku, kunaku ka Tamatama la nau kapalralrawthu ngulringau ki kawkawluli. 13Pia ku drusa ku kingi ka dameamesai ku kalathe, 14si drusa ku kakingiane ku sisilu; ku sisilu lri mia ki niapacacalrisane, si erece pikai ki kingi ka dameamesai ka kalathe.”

Tupi

(Takatwasane Izipiti 39.8-21)

15“Tutupia ku saarakaiyane ki abebeelengenga ki barakalai kithingale ku takidremedremane ki Twaumase; pararamaava ku tapiapiane tu Ipude, arakaiya ku kikingiane ka valrai, salesese, thilalatadhane, maduli ka gialrane caisi, la padrima ku nipacasane. 16Kwini tangimiane ki tupi supate ki piyu, si macaculrudu, ku lragiane 22 ka kunhunge, ku ngulapane 22 ka kunhunge. 17Pitaibelengane ki tupi la paraisi ku sisupatele ku tinukucingalrane ka lrenege: Ku sivaale paraisi ku duduli ku tinukucingalrane ka lrenege, bwaburavane ka pisi, si duduli ka pisi; 18ku sipusale mamatakane ka tinukucingalrane ka lrenege, salesese ka tinukucingalrane ka lrenege, si daimune; 19ku saka situlrulu thilalatadhane ka manau, pupuli ka manau, si thilalatadhane ka sapalrawthu; 20ku saka sisupatele swicangi, duduli ka pisi, si pisi. Kilakikai, lri paraisi patuelre pikai ki nicegecegane ka kingi ka taneneneane. 21Kwini ki vavaeva ki 12 ka tinukucingalrane ka lrenege la pacasa ku nagane ki tangeea ka lalake ki Yakubu, atalingikaiyane ki tai 12 ka lazuku ki swa Iseraylri. 22Arakaiya ku kakingiane tusawculrungane ki tupi, ku tangimiamiane lri mia ki niapaerecane ka calrisi. 23Tudrusa ku kingi ka kalathe, si paraisi pikai ki tali belenge maecebe, 24la malra paelre kwini drusa ka kingi ka silu apararaisi pikai ki drusa ki belenge ki tupi awlrulru ka kalathe. 25Kwini tali thilinga ki awlru ki kingi ka silu la pakerenga ki drusa ka kingi ka dameamesai ka kalathe, lu mia kwini lrika makitwa kiparaisi ki cucubungu ki talabathane ki Ipude. 26Tudrusa ku kingi ka kalathe, la paraisi pasatali lebeane maecebe ki tali awlrulru ki tupi, pakela ki tali daane ki babiabila ki Ipude. 27Tudrusa ku kingi ka kalathe, la paraisi pitali lebeane ki tali cubungu ki talabathane ki Ipude, pakela ki tacaisane, pikai ki tali belenge ki nitutharirane kadapi ka talabathane. 28Arakaiya ku salesese ku lakete la pararaisi kwini ki kalathe ki tupi si kalathe ki Ipude, kwini tupi lani padakipi pibelenge ki lakete ki Ipude, ani kai kalrabuthu.

29“Lu mudaane ki Alrivilrivi ka taikaikaiyane ku Arungu, lri elrai kikai nipacasane ku lanagane ki ta 12 ka lazuku ki swa Iseraylri ka tupi; lukamiyaiya kai kunaku ka Tamatama lrika palralrawthaku ngulringau ki kawkawluli. 30Malra kwini ‘Urime’ si ‘Thumime’#28.30 “ ‘Urime’ si ‘Thumime’ ” sarakaikaiyane ki barakalai kithingale ku takidremedremane ki Twaumase ka lamanemane, ku tapiapiane arakai kikai lamanemane, kadrwa ku wathingale. pwadringi ki tupi, ani mailuku ku Arungu lu mucucubungu nakwane. Lu mia kai, lu mucucubungu nakwane lrika tamailukane kikai tupi, ala lri dulru thingale kwidra takidremedremaneli ki kawkawluli ka swa Iseraylri.”

Drumane ka laimai ki labarakalai

(Takatwasane Izipiti 39.22-31)

31“Ku sapakabelengane ki Ipude ku laimai arakaiya ku salesese patuelre ka gialrane caisi. 32Kwini palimemelre ki tali belenge ki kabicelrakane la pikai ku ngaanga ki lreane; kwini ki lreane la drima caisi tusathalringulane, ani kai kapurici. 33-34Ku tali tailebeane ki palimemelre la thalringulu arakai ku salesese, thilalatadhane, maduli ka gialrane nginanavate, si arakai ku kakingiane ku kikilringi pagiagisi. 35Ku Arungu lu marasikaikai ku awngane ki barakalai lri tara sipalimemelre. Lu mudaane ki Alrivilrivi ka taikaikaiyane, lu mucucubungu nakwane la siwlringa, lri kilalraku ku lingau ki kikilringi; lu mia kai, kai lri kipapacai nakwane.

36“Arakaiya ku kakingiane pia ku vaeva ku saarakaiyane pacase, kwini belenge la pacase ‘Tinusaniangane ka Tamatamane’. 37Arakaiya ku salesese ku lakete pakerenge pitali cucubungu ki pagamucu. 38Ku Arungu lri kelrai kikai pacase pwa ki punu. Lu mia kai, kunaku ka Tamatama lri kiragadhaku tarumara sanaka patarumara nakwane ki swa Iseraylri; adravane ku mapapangale la pasamali patarumara, lri kiraagadhaku si tarumara.

39“Arakaiya ku lrekelreke caisi ku sapakadringane ki Arungu, la arakaiya ku lrekelreke tupagamucu, arakaiya ku nipapacasane ku makalrilau tulakete.

40“Pia ku sapakadriadringane, lakete si talrupunu ki lalake ki Arungu, ani kapapedrenge matidalame. 41La pasilaimai ki taka ka Arungu si lalalakeini, la drisisi ku lawlau ki ulrive, baai liniane ku mabula ku awngane, cegecege liniane abarakalai marasikai nakwane. 42Arakaiya ku lalasare ka kaimadhane tukaswi si pasikaswi liniane; kwini kaswi lri twalai ki tasilakelaketane pakela ki vagisi, ku lrika amaka paidringi ki liniane. 43Ku Arungu si lalalakeini lu mudaane ki Alrivilrivi ka balrawbau mucucubungu nakwane, lu ikai ki Alrivilrivi ka taikaikaiyane marasikaikai ku awngane ki barakalai, lri tara silaimai, amani lu ngwimadhane la kipapacai. Kikai nipasikaiyane ki Arungu si lamwabaibalrithi ka lrika palralrawthu ka kakudhane.”

Currently Selected:

Takatwasane Izipiti 28: NDV

Highlight

Copy

Compare