Takatwasane Izipiti 27
27
Tapatarumaramarane
(Takatwasane Izipiti 38.1-7)
1“Arakaiya ku bwaburavane ka paela ka angatu darepe ku tapatarumaramarane. Kwini tapatarumaramarane ku tapangimiane, ku lragiane drusa ka mituru si drusa ka kuncunge, ku ngulapane laka drusa ka mituru si drusa ka kuncunge, ku ubelengane vaeva ka mituru si tulru ka kuncunge. 2Kwini ki talusupate ki piyu la pangibwala ku lawngu, maelre ki tapatarumaramarane, si arakai ku lriwlu cabu ki tapatarumaramarane. 3La pia ku thalange ku samalramalrane ki abu, la pia ku sakadravane, kisi, satatiputhu, tagagane; kikai lawbubulu arakaiya ku lriwlu patuelre. 4La pikai ku sasarane ki tapatarumaramarane, kwini ki supate ka piyu pikai ku supate ku lriwlu ka taececengane bulri. 5Kwini sasarasarane la pikaiya ki tali lebe ki kabicelrakane ki tapatarumaramarane. Papubebelenge lri keela kabicelrakane ki tapatarumaramarane. 6Arakaiya ku bwaburavane ka paela ka angatu tubabulriane, la arakaiya ku lriwlu cabu. 7Lu bulri la malra kwini babulriane palratuku ki taececengane. 8Arakaiya ku baali darepe ku tapatarumaramarane; kwini kabicelrakane ki tapatarumaramarane yai ungawngau. Ku apangimiane singikaiya pia ku tapelaelaneli muswane ikai lregelrege la tungimiyaiya.”
Kalatadrane ki alrivilrivi ka balrawbau ki Tamatama
(Takatwasane Izipiti 38.9-20)
9“Alra kwidra nitinunane arakai ku lrekelreke tubalrawbau la ravadre tukalatadrane ki Alrivilrivi ka balrawbau ki Tamatama. Kwini tali lrawdru ku balrawbau 44 ka mituru, 10la arakai ku mapusale ku lriwlu ka ulrudru pawlrudru, ku kaili si bulri ki ulrudru niarakaiyane ku gingi darepe. 11Kwini satali dradhane laka thadalrane, ku lragiane 44 ka mituru, laka mapusale ku niarakaiyane ku gingi ka ulrudru pawlrudru, ku kaili si bulri ki ulrudru laka niarakaiyane ku gingi darepe. 12Kwini satali talriwgane ku balrawbau 22 ka mituru ku ngulapane, yakai ku mangeale ku nitutaneneane ki ulrudru. 13Ku satali talrawane, lrawlrawdru ki kalatadrane, ku make thadalrane ka 22 ka mituru ku ngulapane. 14-15Kwini tali tara cigiane ki lrawlrawdru ku ngulapane ki balrawbau eneme ka mituru si eneme ka kuncunge, laka tulru ku yakai ku taneneane ku ulrudru pawlrudru. 16Kwini lrawlrawdru ki kalatadrane pikaiya ku bangate ka mituru ku lragiane ka sapaidringane, arakaiya ku lalasare ka kaimadhane, niara gialrane ka salesese, thilalatadhane, maduli ka tinunu, ka nipacasane, pawlrudru arakai ku supate ku taneneneane ka ulrudru. 17Kwini supate ka ngiathalringulu ki kalatadrane makitu arakaiya ku gingi ka bulri parairaisi, kwini kaili arakaiya ku gingi darepe, ku taneneneane arakaiya ku lriwlu darepe. 18Kwini kalatadrane ku lragiane 44 ka mituru, ku ngulapane 22 ka mituru, ku ubelengane drusa ka mituru si eneme ka kuncunge. Kwini balrawbau arakaiya ku lalasare ka lrekelreke tinunu, ku ulrudru ka taneneneane arakaiya ku lriwlu darepe. 19Kwini lawbubulu ki Alrivilrivi ka balrawbau, kwini taparairaisane ka ulrudru ki Alrivilrivi ka balrawbau si kalatadrane patueelre.”
Tinukakudhane lu padalai ki tinaki
(Lrivi 24.1-4)
20“Cuna ki mapapangale ki swa Iseraylri malra ku mathaithaariringa ku lawlau ki ulrive baai nakwane, tusaarakaiyane ki tinaki, kwini tinaki lani ka taledrane. 21Ku Arungu si lamwabaibalrithi iniane lri ikai daane ki Alrivilrivi ka balrawbau si icucubungu ki Langiane ki Twaumase ki tali latadre padalai ku tinaki. Kikai tinaki lrika taicucubungane nakwane twalai ki maungu pakela ki mialrealre ka taledrane. Ku mapapangale ki swa Iseraylri si lamwabaibalrithi liniane lri tara kapalralrawthu pasusu kikai drekase.”
Currently Selected:
Takatwasane Izipiti 27: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
