Takatwasane Izipiti 26
26
Alrivilrivi ka balrawbau ki Tamatama
(Takatwasane Izipiti 36.8-38)
1“Arakaiya ku mangeale ku makalrilau tusapakadringane ki Alrivilrivi ka balrawbau ki Twaumase. Kikai makalrilau arakaiya ku lrekelreke si salesese, thilalatadhane, nitinunane arakai ku maduduli ka gialrane, si pacase ku papacase ki Kirubime. 2Kwini vaevaeva ku adravane lri maramaraamau, ku lragiane 12 ka mituru, ku ngulapane drusa ka mituru. 3La malra kwini tailrimane paelrelre caisi, rathudu tutaingeane, kwini tailrimane la tuthadalrane ku tapiane. 4Kwini ki taingeane ka nirathudane ka makalrilau ki sababiabiabilanga la caisi ku salesese ku tapwane ku sawculrungane. 5La malra kwini malrimale ku tapwane ki sawculrungane caisi pikai ki aswalaalanga ki mwasakavaeva ka nierecane, kudra drumane ka malrimale ka tapwane ki sawculrungane la caisi pikai ki abibiilrilinga ki mwasakadrusa ka nierecane. 6La darepa ku malrimale ku kingi ka sakakaili, la malra pararaisi paelre kai ki taidrusane.
7“Arakaiya ku ubale ki kakiuane caisi tu 11 ku sapaidridringane ka balrawbau pasakai tali belenge ki sapaidridringane ka makalrilau. 8Kwini vavaeva ku takathane la paramaramau; ku lragiane 13 ka mituru, ku ngulapane drusa ka mituru. 9Kwini tailrimane la caisi paelrelre, tuvaeva, kwini enemenga la tutaingeane. Kwini mwasakaeneme la tusipusale cikipi, la pangikeakelrai pasacucubungu ki sapaidridringane ka makalrilau. 10Kwini tali babiabila ki salrilrilrikudrunga ki mwasakavaeva ka makalrilau la caisi tumalrimale ku sawculrungane. 11La tumalrimale ku bulavane ka sakakaili, kaili kwini ki sawculrungane, la malra kwini taidrusane ka sapaidridringane ka makalrilau pararaisi, tuvaevanga ka sapibelengane ki sapaidridringane ka makalrilau. 12Kwini tedrane la pangitakeakelrai pulrilrikudru ki Alrivilrivi ka makalrilau. 13Kwini ki maecebe ki Alrivilrivi ka makalrilau kwini tedranenga ku malrimale ka kunhunge, kabungu ki Alrivilrivi ka balrawbau.
14“La pianga ku drusa ku sapasabelengane ki sapaidridringane ka makalrilau, ku vaeva arakaiya ku nieremane ka duduli ka lrangici ki sawvalai ka kiu, ku vaeva arakaiya ku mathariri ka lrangici darepe, pasabebeelengenga kabungu ki sapaidridringane ki Alrivilrivi ka balrawbau.
15“Arakaiya ku bwaburavane ka paela ka angatu tusacegecegane ka ulrudru ki Alrivilrivi ka balrawbau. 16Kwini vaevaeva ka ulrudru ku ubelengane supate ka mituru, ku ngulapane 66 ka kunhunge. 17La tara tudrusa ku tamacaculruculrwane, tamacaculrwane ki labulri. Sanaka bulri yakai ku miyaiya kaika tamacaculrwane. 18La pikai ki tali lrawdru ki Alrivilrivi ka balrawbau cegecege ku mapusale ku bulri, 19kwini lebe ki bulri yakai ku masupatele ku gingi ku nicegecegane, kwini ki vavaeeva ka bulri amani kwini drusa ka gingi ku pawlrudru. 20Kwini ki tali dradha mialria pikai ku mapusale ku labulri, 21si kwini ki masupatele ka gingi ka acegecege, kwini tailebeane ki vavaeva ki bulri pikaiya ku drusa ku acegecege ka gingi. 22Pikaiya ki tali lrilrikudru ki tasukusukubane, ka yatali sapakalriwgu ki tasukusukubane, cegecege ku eneme ku bulri; 23kwini ki kapivane la pikaiya ku drusa ku bulri, 24kwini tailebeane ki drusa ka bulri ka karingavane lri mararaisi, lri mararaisi pakela belenge ki karingavane, lai kavaevanga mararaisi ngithalringulu. Lai ka taidrusane ku kapivane ka drusa ku bulri si mararaamau ku tapiane. 25Lu elrelreane ikai ku valru ku bulri si 16 ku acegecege ka gingi, ki vavaeva ki bulri tailebe la tara ikai ku drusa ku acegecege ka gingi.
26“Arakaiya ku bwaburavane ka paela ka angatu tusabaratane ka bulri tu 15; kwini tali cigiane ki Alrivilrivi ka balrawbau ku bulri anika lrima ku sabaratane, 27kwini tali thili ki tali cigiane laka lrima; kwini lrilrikudru ki tasukusukubane, kwini tali sapakalriwgu, mialri pakalrima. 28Kwini sakabicelrakane ka sabaratane pikaiya ki tali lrawdru ki kabicelrakane pasutelrai, twaladha ki tali awlrulru pakela ki thili ki tali awlrulru. 29Arakaiya ku kingi cabu ki bulri, si paraisi ku kingi ka kakalathe, anika tapangukaiyane ngulratuku ki sabaratane ka angatu; kwini sabaratane ka angatu mialri arakai ku kingi cabu. 30Pangimia ku tapelaelaneli muswane ikai lregelrege la paacegecege ku Alrivilrivi ka balrawbau.
31“Arakaiya ku lrekelreke si salesese, thilalatadhane, maduli gialrane tinunu ku vaeva ku make, kwini belenge la pacase ku papacase ki Kirubime. 32La malra kikai makalrilau kelrai pubelenge kwini supate ka niarakaiyane ku bwaburavane ka paela ka angatu ka ulrudru. Ku ulrudru arakai ku kingi cabu, kwini belenge ki ulrudru si pikai ku kingi ka takaikailane, pasutelrai pikai ki supate ki tapacegecegane ki gingi. 33Kwini make la kelrai pwa kwini ki matilibi ka takelrakelradhane, la malra kwini nipikaiyane adringi ku drusa ka lrenege ka Langiane piadringi ki lrilrikudru ki make. Kikai make paagisi ki Alrivilrivi ka taikaikaiyane si Alrivilriviilrivinga ka taikaikaiyane. 34La malra kwini sacaebane ki Langiane pubelenge ki yakai ki Alrivilrivi ka taikaikaiyane ka Langiane, 35la malra kwini tapikaikaiyane ku pange ka cukwi pikai tali latadre ki Alrivilriviilrivinga ka taikaikaiyane ka yatali dradha ka Alrivilrivi ka balrawbau, la malra kwini tapikaikaiyane ki tinaki pikai tali lrawdru ki Alrivilrivi ka balrawbau.
36“Arakaiya ku lrekelreke si salesese, thilalatadhane, maduli ka gialrane si caisi ku vaeva ku sapaidringane ki samamwa daane ki lrawlrawdru, kwini belenge ki makalrilau yakai ku nipacasane. 37Arakaiya ku bwaburavane ka paela ka angatu pia ku sapaidringane ka makalrilau kwini ki lrima ka ulrudru, la arakai ku kingi cabu, ki belenge yakai ku kingi ka sakaikaili; la mialri darepe pasikai ki ulrudru darepe ku lrima ka watete ka lriwlu.”
Currently Selected:
Takatwasane Izipiti 26: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
