Takatwasane Izipiti 19

Ku swa Iseraylri yakai Sinai

1Ku takatwasane ki swa Iseraylri ka Izipiti, mamwalringa ki samakavaale ki saka taratulru ka dramare wadaruru talikai calragulragu kavai Sinai. 2Paswala katwase kavai Ripidime, ala kela kavai calragulragu Sinai, ikai kwini tailebe ki lregelrege Sinai cegecege ku tasuladhane. 3Ku Musi la katwase mulregelrege kidrele ki Twaumase.

Ku Tamatama twalai ki lregelrege dawlu ki Musi, ani pelaela ki swa Iseraylri kwini ki lamwabaibalrithi ki Yakubu iya kai, 4“Wadrelenga numi nakwane ka Tamatama ka pangiatumanaku kiecebe ki swa Izipiti. Waabaku numiane, mia ki takanga malra ki lrulai ka takanga aba pikai belenge ki sapakepakeini, iluku numiane mwa kikai si ka nakwanenga. 5Lwiyasi pasalaladha numi nakwane, pasusu ku kiketeketeli, kunumi amani ku pilrili ka kawkawluli. Kai kawmasane nakwanenga patuelre, ai kathane numi ka amani ku pilrili ka kawkawluli, 6ka saniange ka mapapangale, ka amani ku marasiakaikai nakwane ka barakalai.” 7Ku Musi la katwase mulebe, sarubu ki lakiacapili ki swa Iseraylri, la malra kwini drekase ki Tamatama iniane nguvavaeeva pelaela liniane. 8Ku mapapangale ki swa Iseraylri la maramaraamau iya kai, “Lri paluludu nai ku vaga ki Tamatama si pangimia”, ku Musi la malra kwini vaga lini patubalre ki Tamatama.

9Ku Tamatama la iya kai ki Musi, “Lri ngukaiyaku ki ememe mulebe, silape muswane, lani maka kilalra kwini mapapangale kwini makakawrivali muswane, lani twalainga kikai si makitu kilalra muswane.”

Ku Musi la malra kwini vaga ki swa Iseraylri si patubalre ki Tamatama, 10ku Tamatama la iya kai iniane, “Kusu lu mwa pelaela ki mapapangale, kaikameane si lwiya ani makitu ngibabula ku asukubane. Lri sinau ku laimai lini, 11pakela lu pakavale lri maka padulrunga demedeme. Kwini vai kwini, lri mulebeaku ikai lregelrege Sinai, lani maka drele nakwane ku swa Iseraylri makanaelre. 12Giasa ku saagisane pangithalringulu ki lregelrege, la pelaela ki mapapangale madha lribalribate kwini ki giase, la madha mulregelregelrege, madha ngudadethe kai ki lregelrege. Lu ikai ku wadredre takuvaale ki lregelrege, lri tara kipapaacai, 13ku arakai ku lrenege ku arakai ku lraili papacai, adravane ka naneanenga madha kirairaisi ki wapacainga ka kinawmasane. Ku umawmase si nilapulapwane lri tara paluludu; sanaka pasalriu lri tara kipapacai. Pakeela ku tasiangane ki rapa, ku mapapangale ala lri maka dulru mulregelrege.”

14Sa mulebenga ku Musi la cunu ki mapapangale, ngibabula iya liniane, kipadulru ku asukubane. Kwini laumawmase la makitu sinau ku laimai; 15ku Musi la pelaela liniane, “Pakela lu pakavale makitu padulrwanga demedeme; si madha ngudadedethe ki ababai.”

16Saka samakatulrulu ki mialrealre, la madradreredrere si lrikace, la ikai ku makuceege ku ememe ku ngiabwale ikai lregelrege, ku lingau ki rapa la akwadrau siasiange. Kudra la yakai ki tasuladhane ku laumawmase sa kilalra la makitu manugeregere. 17Ku Musi la mailuku liniane mulatadre ki balrawbau drele ki Twaumase; la makitu acegecege ikai tai lrawdru ki lregelrege. 18Palraelre ka lregelrege Sinai kiakabungu ki ememe, asi lwiyane ku Tamatama lri ikai ki apwi mulebe. Kikai ebelre mia ki twalai ki takutukutwane ngibwale ka ebelre; ku mapapangale la manugiligili makanaelre. 19Kikwini ku lingau ki rapa la arusiasiange. Ku Musi la kawriva, ku Twaumase la arakai ku dreredrere tubalre iniane. 20Ku Tamatama mwalebe makakai ka lregelrege Sinai, la dawlu ki Musi mulregelrege, ku Musi la katwase mubelenge. 21Ku Tamatama la iya kai iniane, “Kusu lu mwa pakipapawlringau ki mapapangale, madha lribalribate ki saagisane kela drele nakwane, amani lwiyasi kai kilalra, lri takaalra ku umawmase ku wapacai. 22Adravane ku labarakalai mialri tara paswala ngibabula ala lri maka dulru adethe nakwane, amani lwiyasi kai kilalra, lri pathavungaku liniane.”

23Ku Musi la iya kai ki Tamatama, “Ku kawkawlusu kai lri mubelenge; asi lwiyane wacunungasu naiane tusaniange kikai ki lregelrege, si pikai babiabila ki lregelrege cegecege ku pagisane.”

24Ku Tamatama la iya kai ki Musi, “Kusu mulebea, la malra iluku ki Arungu. Ai ku labarakalai si mapapangale madha lribalribate ki saagisane si kela nakwane kikai, amani lwiyasi kai kilalra, lri pathavungaku liniane.” 25Ku Musi la mulebe lregelrege, siwlri mwa ki lasakacekeleini, la pelaela ku vaga ki Tamatama liniane.

Currently Selected:

Takatwasane Izipiti 19: NDV

Highlight

Copy

Compare