Takatwasane Izipiti 18
18
Ku Yetheru walidrau ki Musi
1Ku tama ki labaibai ki Musi ka barakalai ki swa Midiange ka Yetheru, la kilalra patharukai ku Twaumase wasangiluku ki swa Iseraylri katwase Izipiti, 2la kela kikawriva ki Musi la mailuku kwidra suru ki Musi pikai ki daane ki tina ki labaibaini ka Zipura, 3si tadrusa ka lalakeini. Kwini tadrusa ka lalake ku tangea sia Geresume#18.3 “Geresume” si vaga ki Hiburu “saliakaikai badhabadhane” ku lingau mangangimia., asi lwiyane ku Musi amia kai, “Kunaku badhabadhaku ka saliakaikaiyaku babadhane”; 4ku tangea sia Ilriezere#18.4 “Ilriezere” ku pacugane “ku Twaumaseli tarapalribulu” amia., ku Musi amia kai, “Ku Twaumase ki ama paralubu nakwane, palribulu nakwane, la kainaku kipapacai ki talialalai ki swa Izipiti.” 5Ku Yetheru la iluku ki labaibai ki Musi si tadrusa ka lalakeini mwa ka calragulragu, kwini taikaiyane ki Musi tutasuladhane ka saniange ka lregelrege. 6Ku Yetheru paswalaala siakawlu ki umawmase pelaela ki Musi, lri kelanga nai iya. 7Lakamani ku mwa ki Musi kidredresenge iniane, sukubu pasudalru iniane. Samaka mangubarengeranenga ku vaga lini la mudaane ki balrawbau ki Musi. 8Ku Musi la malra kwini tapalribulane ki Tamatama ki swa Iseraylri, si tapangimiane ki Tamatama ki talialalai ki swa Izipiti si laumawmaseini singibila pelaela ki Yetheru. La pelaelana ki tamaini ka Yetheru kudra takipadradresengane lini tarakadadalranane si tapangimiane ki Tamatama palribulu liniane. 9Sakilalra ku Yetheru la kiraragai turamuru. 10La iya kai, “Drengedrengera ki Tamatama, amanini ka palribulu mukerenge numiane patwalai ki alrima ki talialalai ki swa Izipiti si lamapapangaleini! 11Kikai wathingalenga naku ku Tamatama sanianiangenga ki sanaka lanitutwaumasane; asi lwiyane sapakwalrialri ki swa Iseraylri ku swa Izipiti, pangiamianga kikai patuelre.” 12Ku Yetheru la patarumara ki Twaumase ku Lama ka lrisi si drumane ku sapatarumarane; ku Arungu si drumane ka kiacapili ki swa Iseraylri la makitu kela si kabalrulu kikai tinusaniangane ka niputalekane, tusasukubane ka kakudhane.
Siakawlu ki tarasaibaibange
(Tapelane Drekase 1.9-18)
13Sakakaiyane, ku Musi yakai ki lamapapangale marasikaikai ku makaririvu lini, singika mialrealre pakela ki maungu karacacaacange. 14Ku Yetheru la drele kikai tangimiamiane, la iya kai ki Musi, “Kusu manemane kai marasikaikaisu ki mapapangale? Anika taacegecegane kikai takaalra kai umawmase ka taikaiyane kikai mukalavalava ku apelaelanesu, lrika amanisu muringeangea marasikai kikai?”
15La tubalre ku Musi, “Lri tara piyaku kikai, kikai mapapangale wakela nakwane kivavaga ku takidremedremane ki Twaumase. 16Sana ikai ku tadrusa ku makakarivu, wasilape nakwane turathudana iya; kunaku la lri tara pasikaiyaku liniane turathudane ku saneaneane ku pacengecenge si ku saneaneane ku pasalriu, si takupelaela liniane ku kakudhane si takidremedremane ki Twaumase.”
17Ku Yetheru la iya kai, “Kai mathariri kikai tapangimianesu; 18kusu si kai mapapangalesu lri makitu kidulru numi. Kaisu lri maka sakalra turamuru ku akaungane. 19Kikai yakai kai ana pangimia ku iyaiyali muswane, ku Twaumase ani tapalra muswane. Ngiatalingikaiyanesu ki mapapangale, la malra kwini makarivurivu lini pucucubungu ki Twaumase, pacengecengesu kwini tamurikaiyanesu iniane. 20Ai, naika wamalrasu kwini kakudhane si takidremedremane ki Twaumase la bulru liniane, swacenge pelaela liniane, lani makitu thingale ku apangimiane lini ku takaumawmasane lini. 21Lakai kamaani kikai, kusu sikawla ku tapiya ku malrigili ka umawmase lani kicapili ki swa Iseraylri, ani ikai ku kiacapili ki takudrulu, si lani tara ikai ku kiacapili ki taidai, ki tamalrimale, ki tamangeale. Kwini lalasu lri tara ka amani ku mwasakene ukuludru ki Twaumase, ka asudralrwalrwane, kai wamalramalra ku pavangalre ku takaumawmasane. 22Kusu sikawla ku miyaiya kai ku umawmase kai lri susu ku vai marasikaikai ki mapapangale turathudane ku lakakudhane lini. Kudra takuciacingalre ku kakudhane ani iluku mwa muswane, kudra tadwadwai ku karivu lini lani makamanimaaninga maturathurathudane. Ala lu mia kikai, lri maka kivala ku akicapilanesu, lani aru kaliapapai ku amecesu. 23Lwiyasi pangimiasu kikai, ku Twaumase la mialri pia kikai cunu muswane, kaisu lrika takidulrwane si sicaemane, kudra la karivu ki mapapangale lalri maka sarakiturathudane.”
24Ku Musi la tarumara kwini ana pangimia kwini taiyane ki Yetheru, 25la ikai ki swa Iseraylri pilri ku malrigili ku umawmase, pakicapili ki takudrulu, ki taidai, ki tamalrimale si ki tamangeale. 26La makitu kisudralru, kai susu ku vai ku aturathurathudane ku lakakudhane ki mapapangale; ala ikaai ku pakakucingalre ku kakudhane, la mwa kivaga ki Musi, ku tatiitiki ku larivwane la ngikakamani lini marasikai.
27Ku Yetheru la kipusau ki Musi, si katwase siwlri mutavanane.
Currently Selected:
Takatwasane Izipiti 18: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
