Takatwasane Izipiti 17

Ngiabwale ki alrisapesape ku acilai

(Taasipane 20.1-13)

1Ku swa Iseraylri makanaelre la paluludu ku tapelaelane ki Tamatama katwase kwini calragulragu ka Singi, taluela mwa ki talidrumane. La daruru ka Ripidime la ikai kwini cegecege ku tasuladhane; ikai kwini laka kadrwa ku acilai ku aungulane, 2kwini lalasu la kirimu kaliliisi ki Musi si iya kai, “Ala baadha naiane ku aungulane ku acilai.”

Ku Musi la tubalre, “Anu kalilisi? Anu kirimu kithiathiathingale ki Tamatama?”

3Ai ku lamapapangale makadhamenga turamuru, la parwakai kalilisi ki Musi. La iya kai kwini lalasu, “Asu malra naiane katwase Izipiti? Anipacai ki kadhamane amiasu naiane si lalalake nai, paelre ki lanilapulapwane?”

4Ku Musi la pia kwidra kitubi ki Tamatama iya kai, “Lri pangitumanaku kikai ki mapapangale? Kikai pasana malramalranga ku lrenege si dukulru papacai nakwane.”

5Ku Tamatama la iya kai ki Musi, “Kusu mailuka ku tapiya ku kiacapicapili ki swa Iseraylri lani tupapalra muswane sacucubungu ki swa Iseraylri dadavace. Ku alrimasu la malra ku ukudru kudra salrumadhanesu ki acilai ka Nile. 6Lri acegecegaku icucubungu muswane, ikai lregelrege ka Hurebe ka vaeva ka alrisapesape. Lu mwa sititi kwini ki alrisapesape, lri ikaai ku acilai ku kainganai mwaludru si baai paungulu liniane.” Ku Musi la picucubungulringa ki kiacapicapili ki swa Iseraylri pia kikai.

7Kwini kadaengane sia Masa, la mialri si Miriba#17.7 “Masa ... Miriba” ku pacugane yai “kialrialringau ... akwaiya” amia.; asi lwiyane ku swa Iseraylri yakai kwini kalisi, kituthiathingale ki Tamatama. La kivavavaga, “Ku Tamatama kai watapalra mitane?”

Makakaruburu ki swa Amaleke

8Ku swa Amaleke wamwa kwini Ripidime kikaruburu ki swa Iseraylri. 9Ku Musi la iya kai ki Yesua, “Kusu pilria ku tapiya ku umawmase, si padulru ku akikaruburane ki swa Amaleke lwiya. Lwiya lri acegecegaku ikai kalididu ki lregelrege, ku alrimali lalri malraku kudra cunu malra iya nakwane ki Twaumase ku ukudru.” 10Ku Yesua la pangimia ku tacunane ki Musi, la katwase kikaruburu ki swa Amaleke, ku Musi, Arungu si Hure la mwa kalididu ki lregelrege dredredeele kwini ki makakaruburuburu. 11Ku Musi sana ciliki ku alrimaini, ku swa Iseraylri la pamalebe; sana pulebe ku alrima, la amalebe ki swa Amaleke. 12Ku alrima ki Musi la kwalringa, ku Arungu si Hure la alrugu ku vaeva ku lrenege, si panene iniane pibelenge; la tara ithili iniane paruthuku ki alrimaini, pakeela ku tamulebeane ki vai. 13Ku Yesua la pamalebe ki swa Amaleke.

14Ku Tamatama la iya kai ki Musi, “Malra kikai tapamalebeane si pacase, ku labibilrili mitane lani kai karimuru. Pelaela ki Yesua, lri demedemaku amudu ki swa Amaleke.” 15Ku Musi la cegecege ku taluvaale ku tapatarumaramarane, si sunagane pasi, “Ku Tamatama amani ku kalralradhali!” 16Kwini lasu amia kai, “Cidinga ku kalralradha ki Tamatama! Ku Tamatama lrika tamakakaruburuburanenga ki mwabaibalrithi ka swa Amaleke.”

Currently Selected:

Takatwasane Izipiti 17: NDV

Highlight

Copy

Compare