Tapelane Drekase 2
2
1“Sakabilrilinga, la pasusu nai ku drekase ki Tamatama si ngibangulu ku tapapiane nai, mwa kwini ki papia calragulragu kavai laveke Suize. La kawlai nai ngithalrilringulu ikai kwini lregelrege Idume.
2-3“Sakabilrilinga, ku Tamatama la kawriva nakwane, makakelretenga ku tabalringaungavane nai ikai kwini tali lregelrege, naika papianga tali dradhanane katwase. 4Ani pelaela la iya nakwane kikai lebe kai vaga, ‘Lri ngukakai numi kwini lregelrege ki Idume, kwini amani ku kadaengane ki padailanenga ka retesane numi ka lamwabaibalrithi ki Isau. Adravane kwini lalasu ka mwakuludru numiane, kunumi kipapawlringava, 5madha kikaruburuburu liniane; asi lwiyane kainaku lri baai numiane kavai kadaengane, adravane kikai tasakaiyane kai kadrwa ku abadhaneli. Wabaaingaku liniane kikai tali Idume kai kadaengane ki lamwabaibalrithi ki Isau. 6Lri dulru numi patwalai liniane langai ku akaneane si aungulane.’
7“Thingala, ku Tamatama ka Twaumase numi ku tapangimianeini subulrubulru ikai ki tatumanane numi patuelre. Sa ikai numi kwini ki calragulragu acaicali, siarapale numiane. Ki nitara masupatelane ka caili, watapalra numiane, kadrwa ku takauramane numi.
8“La katwase nai lribate Idume, kwini ki kadaengane ki lamwabaibalrithi ki padailanenga ka retesane nai ka Isau, ngwakakai kwini kadalranane ka twalai Ilatha si Iziungebere daruru kavai Titimwane ka laveke, papia tali dradha ki talrawane si cubungu arwakai calragulragu Muabe. 9Ku Tamatama la kawriva nakwane, ‘Kunumi madha vangavangavange ki swa Muabe ku wamwa kikaruburu. Wabaainga naku kavai Are kwini ki lamwabaibalrithi ki Lute; kainaku lri baai numiane kavai kadaengane lini.’ ”
10Kunadruma yakai kudra tagagarange si ka tadradradrau ka zuku yakai kavai Are; mapangale ku umawmase lini, ku tacebeane lini mararamau ki swa Anake ku ta ngicaemane. 11Kwini lalasu mararamau ki swa Anake ka kiapasi Ripaime, ai ku swa Muabe pasia Imime liniane. 12Ku swa Huri nayakai Idume; ku lamwabaibalrithi ki Isau la pamulrakau liniane, si amudu ki kuni lini, la ikaikainga kwini, thadalrane ki swa Iseraylri sakabilrilinga patwalai kwini ki baai ki Tamatama liniane ka kadaengane si pawlrakau kwini ki labadha.
13“Sakabilrilinga, la pasusu nai ku drekase ki Tamatama talubalre drakerale Zarede; 14twalai ku takatwasane nai ka Kadise Barania, pakela ki tatalubalreane nai ki drakerale Zarede tara 38 ka caili. Singikai ku takiketeketane ki Tamatama, kwini saka zidai kudra tarakikaruburu makitwa pacainga demedeme. 15Ku Tamatama takiecebane liniane, pakela ku tapakamudane liniane.
16“Sa makitu pacainga makanaelre, 17ku Tamatama kawariva naiane, 18‘Kaikameane, kunumi lri twalai numi Are si ngukakai lribate tali Muabe. 19Ala lri padethe numi kwini ki kadaengane ki lamwabaibalrithi ki Isau ka talikai ki swa Amune, ai kunumi madha vangavangavange ki swa Amune, la madha kipudawdawlu liniane. Wabaainga naku kikai kadaengane ki lamwabaibalrithi ki Lute; kainaku lri baai numiane kikai kadaengane.’ ”
20Kikai kadaengane laka sia Ripaime, amani saka nataikaiyane ki swa Ripaime. Ku swa Amune Zamezumime amia liniane. 21Ku tacebeane lini thadalrane ki swa Anake ka tadradrau, la tapangale ku umawmase, ka tagagarange ka minzuku. Ai ku Tamatama waamudu liniane; ku swa Amune la drikisi kwini kadaengane kavai, la ikaikainga kwini cekecekele. 22Ku Tamatama napasiakai ki lamwabaibalrithi ki Isau ka swa Idume ku thadalrane ku tapangimiane. Pakamudu kwini ki yakai tali lregelrege Idume ka swa Huri; ku swa Idume la drikisi malra kwini ki kadaengane, si ikainga kwini cekecekele, pakeelanga kaikameane. 23Kwini la singikai Kerete ku umawmase nayakai kwini ngwa babiabila ki laveke Miditerania; kwini lalasu waamudu kwini ki naswakai kwini ki laumawmase ka swa Avime, si drikisi malra kwini ki kadaengane lini, daruru kavai tali lrawdru ka cekele Gaza.
24“Sa lribatenga nai Muabe, ku Tamatama peaelaela naiane, ‘Kikai lri katwase numi talubalre kadravane Arenunge. Lri malraku si baai numiane kwini kacekelane ki Hesebunge ka talialalai ki swa Amuri ka Sihunge si kadaenganeini. Lri makakaruburu numi liniane, si drikisi ki kadaenganeini. 25Twalainga kikai, lri paukuludraku ki yakawmasane numiane. Sana kilalra ku nagane numi lri ukuludru manugiligili.’ ”
Ku swa Iseraylri Pamalebe ki talialalai ka Sihunge
(Taasipane 21.21-30)
26“Sakabilrilinga, la sikawlaku patwalai calragulragu Kidimuthe ku sasiakawlu mwa ka Hesebunge kikawriva ki talialalai ka Sihunge, si arakai ku mathariri ka vaga kawriva iniane, 27‘Ala palrainga naiane pangukakai ki kadaengane numi. Lri ngukai nai ki ngwaadrau ki kadalranane numi, si leecege katwase lribate, kai thivalrau ki madradrau ka kadalranane. 28Palraingi nai langai numiane ku akaneane si aungulane ku acilai. Sana ngukakaai nai ki kadaengane numi, 29si talubalre kadravane Yuredange, mudaane ki abadhane naiane ki Tamatama ka Twaumaseta ka kadaengane. Kwini yakai Idume ka lamwabaibalrithi ki Isau si yakai Are ka swa Muabe la makitu palraingi naiane ngukakai ki kadaengane lini.’
30“Ai, ku talialalai ka Sihunge la kai palraingi naiane ngukakai ki kadaengane lini. Ku Tamatama ka Twaumase nai pakakawlukulu ku kidremedremeini, ani papamalebe iya naiane, si drikisi ki kadaenganeini; pakela kaikameane wadrikisi nai si malra kikai kadaengane.
31“Sakabilrilinga, ku Tamatama kawariva nakwane, ‘Drela! Wamalrangaku ki Sihunge si lakadaenganeini si baai numiane. Lri mwa numi drikisi.’ 32Ku Sihunge la sangiluku ku kwapingi ikai Yahaze kidresenge kikaruburu. 33Ai ku Tamatama ka Twaumase nai wamalra liniane demedeme si baai naiane. La papacai nai liniane, si lalalakeini si tara kikaruburu ka lakwapingi. 34La drikisinga nai, si kabebetethe pakaburuku singibila ki cekele, la malra kwini ki yacekele ka umawmase, kai pilri ku sawvalai ku ababai tarudrawdrange lavavalake, demeedeme papacai, kadrwa ku natangeanga ku nipasurane. 35La malra nai ravase ku lanilapulapwane, ravase singibila kwini ki cekele sanaka manemanenga. 36Ku Tamatama ka Twaumase nai la padrikisi naiane nguelre sanaka cekele, twalai babiabila valrwalru ka Arenunge ka Arure, daruru kwini kabicelrakane vaalru ka lacekele, pakeela kavai Gileade, nguelrenga drikisi. 37Ai singikai ku drekase ki Tamatama madha piyaiya kwini iya, kai nai ngwadadethe ki kadaengane ki swa Amune si tarabalrealreanane kadravane Yabuke, la kai nai ngukakai kwini lacekele ka ngwalralregelrege.”
Currently Selected:
Tapelane Drekase 2: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
