Amuse 3
3
1Swa Iseraylri, kilalra ku pelaelaela numiane ki Tamatama ku vaga; kikai vaga amanimani numiane ka kuni palraelre ka laumawmase. Ku Tamatama napatwalai numiane Izipiti ililuku; 2amia kai, “Ikai kai ki kiacaebe belenge ka tathathatha ka lakuni, kathane numiane ku pilrili, la pasalrisaalriwana numi ka thathatha; ngwalai kikai, lri tara pathaavungaku numiane.”
Awngane ki yuginsia
3Ku tadrusa lu kai maka mapapalraingi,
lri maka tarudradrusa dadavace?
4Ku raiyungu lu kai maka kidringai ku apananeini,
lri maka ikai angatungatu girigiringi?
Ku yacengecenge ku raiyungu lu kakadrwa ku panaini,
lri maka ikai ki barunguluini girigiringi?
5Lu kakadrwa ku paene ki dringai ki adhadhame,
lri maka kipudringai ku adhadhame?
Lu kakadrwa ku wapungupungu ki dringai ki adhadhame,
kwini cekadeini lri maka ngibatiikisi?
6Sana ngirapa akuvaale ka sapelaelane ka amakakaruburane,
ku yadaane ki cekele ku laumawmase kai lri mukuludru?
Lu kaika takidremedremane ki Tamatama,
ku amatikurwane lri mulebe mwa kai ki cekele?
7Ku abebeelengenga ka Tamatama lulri ngivelevelenga,
lri tara paswala pelaela ki sasiakawluini ka layuginsia ku kikakeini.
8Lu girigiringi ku raiyungu,
aneane ku kai lri mukuludru?
Lu kawrivariva ku abebeelengenga ka Tamatama,
aneane kulri lreme kai pelaela ku vagaini?
Ku amulisiane ki swa Samaria
9Lu katwasa pelaela kudra ki la yakai ki daane ki talialalai ka swa Izipiti si swa Asedude ka laumawmase iya kai, “Lri irubu numi ikai ki ngiathalringulu Samaria ki lalregelrege, si dredredrele ku lrika angimiane kalrithavulu, madredredrepete ikai adringi ki cekele.”
10Ku abebeelengenga ka Tamatama amia kai, “Kwini laumawmase paswaete pikai ki daane lini ka talialalai ku niravasane si nivuthaane malra ku lawbubulu; kwini lalasu kai wathingale aparamaramau malangalangai. 11Ngwalai kikai, ku badha lri lringulu ki cekele lini, si kabebetethe ki saravadrane lini, lai lri malra demeedeme ku yakai ki daane ki talialalai lini.”
12Ku Tamatama amia kai, “Lri mia ki taraagwagu ki kiu ka umawmase ku malraini ribici patwalai ki ngudwi ki raiyungu drwadrusanga ka drapale ki kiu si vaeva ka calringa, kai yakai Samaria ka kadrwa ku ngikakelretane ku tacekecekelane ka swa Iseraylri lri mialri ka tabeekele ku lri dulru ngilribate ki matikurwane.”
13Ku abebeelengenga ka Tamatama ka abebeelengenga ki sanaka kwapingi ka Twaumase amia kai, “Kilalra! Pakipapawlringava ki mwabaibalrithi ki Yakubu iya kai: 14Lu pathavungaku ku tapasalrivane ki swa Iseraylri, lri burukaku ku tapatarumaramarane kavai Bithele; sanaka piu ki tapatarumaramarane lri kipici, si ukadrulu ikai cakena. 15Lri burukaku ku taikaikaiyane lini ku daane luka kaladralrangedrangane si kalakecelrane. Ku niarakaiyane ku valisi ki zu pangiraeragelane ka daane si nitumatharirane ka maadrau ka daane lri kaburuku patuelre, si akinaburukane.” Ku Tamatama amia kikai pelaela.
Currently Selected:
Amuse 3: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
