Nisikawlane 9

Kiasusu ki Yesu ku Saule

(Nisikawlane 22.6-16; 26.12-18)

1Ku Saule pacungucungulwana kukuludru ki kiasususu ki Tamatama. La katwase kikawriva ki abebeelengenga ki barakalai, 2si kitubi ku abaadhane ku pacase ki lararubwane ki swa Yuda ikai ka Damasekuse, ku apalraingane iniane pwalra si ruthuku ki kiasusu tupapalra ki vaga ki Yesu, adravane ka sawvalai ka ababai, lri ruthuku si iluku mwa Yerusalrime.

3Sa katwatwase papia Damasekuse ikadadalrananenga, si lri padalrunga kela ki cekele, ala kiriimu ikai ku ledra twalai belenge mulebe, si paledra pangithalringulu iniane. 4La tubakebake, si kilalra ku vaga ku amia kai iniane, “Saule, Saule! Asu hakegai nakwane?”

5La kivaga, “Tamatama, aneanesu?” Kudra lingau la tubalre, “Amaniaku kwidra hakegaisu ka Yesu. 6Ngidrakala, la mwa cekele, lri ikai ku umawmase ku lri pelaela ku lrika apianesu.”

7Ku laredelane ki Saule la acegecege makanaelre, si kai maka kawriva, kialalra kudra lingau, ai kai maka wadrele kwini ki kawariva. 8Ku Saule la ngidrakale, si manumaca, la kai maka drelenga. Kudra twapapalra ku laumawmase la arake iniane, si ililuku iniane mudaane cekele Damasekuse. 9La makatulrulu kai maka drele ku lamanemane, la kai kane, kai waungulu.

10Ikai Damasekuse yakai ku tangea ku situ, sia Anania. La tarumara ku vaeva ku maburusi, ikai kwidra ki maburusi, ku Tamatama kawariva iniane, “Anania!” Kwini lasu la tubalre, “Tamatama, kawvadhaku.”

11Ku Tamatama la iya kikai, “Lu kirimwa papia ki sia Madringelrese ka kadalranane, ikai ki daane ki Yuda silape kudra tangea ka swa Tarusu, ku naganeini sia Saule. Kwi lasu saicengecenge inulrinulri, 12la drele ikai ki maburusi ku tangea ku umawmase, ka sia Anania, ku wakela mudaane si ansu iniane, si pasiwlriane cege.”

13Ku Anania la tubalre, “Tamatama, takalranga ku umawmase ku napeaelaela nakwane, kai lasu ku tahakegadhaneini ki lakiasususu muswane ikai Yerusalrime. 14Kikai lasu la ka wakelanga Damasekuse, mailuku ku kisudralruini ki marudrange ki barakalai ku puku, lri pwalra patuelre ku wasukusukubu muswane ku laumawmase.”

15Ku Tamatama la iya kai, “Lu mwa sikakathane! Asi lwiyane wapilringa naku iniane lrika amaninga ku lri pasikai nakwane kaungu, lai lri ikai ki sakamaelanane ka umawmase, ki la talialalai, si swa Iseraylri pelaelaela ku naganeli, 16Lri ngikakamaniaku cunu iniane, lri tara ngwalai nakwane kipadradresenge ku makaelaela ku akwalriane.”

17La katwase ku Anania. La mudaane kwini ki daane, la ansu ki Saule, si iya kikai, “Saule, kudra kiakawriva muswane sa ikaisu kadadalranane ka Tamatama ka Yesu, siakawlu nakwane, pakai ku adrelaneanasu, si kisuete ki Siri.” 18La makakai, twalai ki maca ki Saule mucilri ku mia ki karalabe ki kange, la siwlrianenga cege drele. Sa mianga kwini la ngidrakale, si kipabanau; 19sakanenga ku aga, la siwlrianenga sapukwane.

Ku Saule yakai Damasekuse dindu

Ku Saule la ikai Damasekuse taelre ki lasinzia maka piale. 20Kai lasu la makakai mwa ki lararubwane ki swa Yuda pelaela ku patharwakai ki Yesu, iya kikai, “Ku Yesu amani ku Lalake ki Twaumase.”

21Ku la kialalalra ku laumawmase makitwa kasamali makanaelre, si iya kai, “Kikai umawmase kaika amani kwidra yakai Yerusalrime kabebebetethe ki lasinzia? Kai lasu kudra kelaini kikai kaika pwalralra ruthuku ki sinzia, si iluku liniane baai ki marudrange ki barakalai?”

22Ai, ku Saule arwa sapukwanelringa pelaela kai vaga ki Twaumase, arakai ku sapukwane ku vaga pelaela ku Yesu ala ka Kirisitu, ku yakai Damasekuse ku swa Yuda la kai maka tubalrenga.

23Kai tarathainuana ku tangilribatane, ku swa Yuda la madrekadrekase ku apapacadhane ki Saule. 24La ikai ku wathingale si pelaela ki Saule ku kisanu pangimiamia lini. Kwini lalasu lukavaiyane lukamaungu la ikai takalre ikai ki lrawlrawdru ki cekele, pakai ku apapacadhane ki Saule. 25Ai, yakai sakamaungu, ku situini arakai ku karadrare pangukai tali latadrane ki alradre ki cekele surusuru iniane pulebe.

Ku Saule yakai Yerusalrime

26Sa ikai Yerusalrime ku Saule, nau ngulatatadre mwa ki lasitu ki Yesu la iya. Ai, kwini lalasu kai masalru iniane ala ka situnga ki Yesu, mwakuludru iniane makanaelre, 27kathane ku Barenabase ka kaiyanganai paralubu iniane, la ililuku iniane pakikawriva ki lanisikawlane, si pelaela liniane ku takikawrivane ki Saule ikai kadalranane papia Damasekuse ki Tamatama, ku tatungimiyaiyane kawriva iniane ki Tamatama. La pelaelana liniane ku garangane ki Saule sa ikai Damasekuse bulru pangukai ku nagane ki Yesu. 28Ku Saule la taelrenga makisudawdalru ki lanisikawlane, ikai Yerusalrime la kagarange pangukai ku nagane ki Tamatama dindu. 29La pelaelaela pakalalrwai ikai kwidra ki la swa Gurike ka swa Yuda ka laumawmase, si la madrikidrikisi ku vaga lini, kai lalasu la kidremedreme ku apapacadhane iniane. 30Sathingale ku laretesaneini, la iluku iniane mwa Kaisaria, si sateatedre iniane papia Tarusu.

31Sakamani kwidra, ku lakiwkai ikai Yuda, Galrilri, Samaria yacengecenge kasulivalivate. Ku lakiwkai mwasakesakene mukuludru ki Tamatama, la ikai ki taparalubane ki Siri adiadili ngiradhekane, la pivai drima ku sinzia.

Sa ikai Lrida si Yupa ku Pitiru

32Ku Pitiru salraelrelre papia kidruanga, yakai saka nikingivalane, la lrikape ki swakai Lrida ka lasinzia. 33Ikai kwini, la kipadradresenge ku tangea, ka sia Aenease, kikai lasu kiapucaemane kalrunai, laka tapeecane taravalrunga ka caili. 34Ku Pitiru la iya kai iniane, “Aenease, ku Yesu Kirisitu pawadringainga muswane. Ngidrakala, la malra kwi sapasu!” Ku Aenease la makakaai ngidrakale. 35Ku yakai Lrida si yakai Sarungu ku laumawmase la drele iniane makanaelre, si makitu kisusunga ki Tamatama.

36Ikai ka Yupa yakai ku tangea ku situ ku ababai sia Tabitha (arakai ku vaga ki Gurike sia Dureka ku naganeini, ku pacugane kisisi amia). Makaalra ku piapiaini ku mathariri ka awngane, kiaragai paralubu ki matiakukuru ka umawmase. 37Yakai saka minakavalane, kwini alisu la kacaeme, si pacai. Ku laumawmase la pabanau ki kinawmasaneini, si pasutelrai pikai nikai ka taikaikaiyane. 38Kai Yupa wadethe Lrida, ku yakai Yupa ku lasitu kialalra aka yakai Lrida ku Pitiru, la pamwa ki tadrusa kikawriva iniane, si kitubi iniane, “Bwala kirimwa kela mwa naiane kikai” iya. 39Ku Pitiru la makakai katwase, tupapalra liniane. Sa kela ku Pitiru, la ikai ku waililuku iniane mwa ki nikai ka taikaikaiyane. Ku lawalibakane ka lamaliali ngiathalringulu ki Pitiru si tubitubi, si malra ku nacaicaisi ki Dureka ku sapakadriadringane si sapakabelengane ka laimai padrele iniane. 40Ku Pitiru la pakatwase liniane pulatadre, si pidruru inulri, ala ngibangulu papia ki kinawmasane ki wapacai, si iya kai, “Tabitha, ngidrakala!” Ku Tabitha la manumaca, si drele ki Pitiru, la ngidrakale si nene. 41Ku Pitiru la katwase arake drakale iniane, si dawlu paudaane ki lasinzia si lawalibakane ka ababai, la alra ki panianianiake ka Dureka baai liniane. 42Patharukai kikai la salraelre ikai Yupa, la takaalra ku masalru ki Tamatama. 43Ku Pitiru la ikai kawlai Yupa ki daane ki Simune ka taratulrangilrangici.

Currently Selected:

Nisikawlane 9: NDV

Highlight

Compare

Copy