Nisikawlane 8

1Kikai takipapacadhane ki Setipane, ku Saule palraingi.

Kai Saule wahakegai ki kiwkai

Twalai kwini ki vai pathagili, ku kiwkai Yerusalrime kiapadradresenge ku matiangeange ku hakegai, kaika kathane ku lanisikawlane, ku sanaka sinzia makitu masawvagavagai mwa tali Yuda si tali Samaria. 2Yakai kwidra la kiasamula ku takisuswane ka laumawmase ku wamalra dralreke ki Setipane, si pasikai iniane akwadrau tubi.

3Ikai ki kikai, ku Saule yacengeecenge kabebebetethe ku awngane ki swa kiwkai, la taradadaane pwalralra ki sawvalai si ababai ka lasinzia, si malra emenge liniane putaememengane.

Ku hukuingi padaruru Samaria

4Kwidra la masawvagavagai ka lasinzia wamwa kidruanga pelaelaela ku hukuingi. 5Ku Pilripi wamwa Samaria, si papia ki swakai kwini pelaelaela ku patharwakai ki Kirisitu. 6Ku mapapangale la makitu kicacaligiri kilalalalra ki Pilripi ku pelaelaelaini ku vaga, kwini lalasu takwakilalalalra, si dredrele ku piaini ku pinangu Twaumasane ka puku. 7Latakaalra kwidra kiaikai ki aidridringane ku umawmase, kwini la aidridringane wakaraleale, si twalai kwidra ki kinawmasane ki kiaikai ka umawmase katwase, takalra ku malrunai, kwidra mapiapilai, la makitu kipawdringai. 8Ikai cekele Samaria swaeteane ku sakiaragai.

9Yakai ku tangea ku umawmase, ka sia Simune, ku lrisini nakiamathingathingale ki swa Samaria. Kwini lasu la mialri ngitatusaniange, 10kwini ki cekele sanaka umawmase kiararakete kilalalra iniane. La iya kai makanaelre, “Kikai umawmase yakai ku puku ki Twaumase, amani ku ‘Maadrau ku puku’. ” 11Asi lwiyane kwini lasu maulainga ku taarakaikaiyaneini ku lrisi si pamama liniane, lakamani kwini kiraraketeini turamuru. 12Ai, kwini lalasu sakipawtenganga kwidra pelaelaela ki Pilripi ku patharwakai ki puku ki Twaumase ka hukuingi si nagane ki Yesu Kirisitu, ku lasawvalai ku laababai la kipabanau makanaelre. 13Ku Simune la mialri kipawtenganga, sakipabanawnga laka tataelreane ki Pilripi, kwini lasu sadrelenga ku tapiane ki Pilripi ku kipuawnganeini ku matiasamaimali ka puku si pinangu Twaumasane ka puku, la kasamali turamuru.

14Ku yakai Yerusalrime ka lanisikawlane sa kilalra ki swa Samaria ka tarwamaranga ku matiakiragai ka vaga ki Twaumase, la sikawlu ki Pitiru si Yuhani pamwa liniane kwini. 15Kai tadrusa sadaruru, la pasikai ki lasinzia inulri, ku lrika atarumarane lini ki Siri. 16Asi lwiyane kwidra Siri kaiyana mwalebe mwa liniane ki natangeeanga, kai lalasu pangukaiyana ki nagane ki Tamatama ka Yesu kipabanau sikakathane. 17Kai Pitiru si Yuhani la ansu liniane, kwini lalasu la tarumara ki Siri.

18Ku Simune sadrele ku ansu ki lanisikawlane sa tarumara ki Siri makanaelre, la malra ku paisu baai ki nisikawlane, 19si iya kai, “Ala baadhaili kikai puku, sana answaku ki aneane, ani tarumaara ki Siri.”

20Ku Pitiru la iyalringa kai iniane, “Kusu ka adulrwane arakai ku paisu langai ku migemi ki Twaumase amia! Tupapalra ki paisusu kamudu. 21Kusu ikai kikai ki awngane nai kadrwa ku drulrusu, asi lwiyane, ikai cucubungu ki Twaumase, kwini kidremedremesu kai makalecege. 22Lakamani, kusu ngitatupela, la kidaila ki ngialisiane, si kitubi ki Tamatama ku apacepane ki ngimiyaiya kikai ki kidremedremesu. 23Wadrelaku matatangadresu kwini mapalili ka madru ki pathalrane, ka kiakerenge ki pasalrivane.”

24Ku Simune la kawriva ki Pitiru si Yuhani iya kai, “Ala pasikaiyaili kitubi ki Tamatama, kikai tapelaelane numi lani kai ngimia ikai ki kinawmasaneli.”

25Ku Pitiru si Yuhani la ikai kwini akasi, pelaelaela ku matiakiragai ka vaga ki Tamatama, ala katwase siwlri mu Yerusalrime. Sa siwlriwlringa ikadadalranane, la ikai Samaria ki lacekele pelaelaela ku hukuingi.

Pilripi si sasiakawlu ki swa Ithiwpia

26Yakai ku tangea ku sasiakawlu ki Tamatama ku peaelaela ki Pilripi, “Ngidrakala si katwase papia tali lrawdru, mwa kwini ki twalai Yerusalrime sapapia Gaza ka kadalranane.” (Kikai kadalranane ubulanenga#8.26 “Kikai kadalranane ubulanenga” ku wahunyake madu iya kai “Kikai kadalranane ngwakakai calragulragu”..) 27-28Ku Pilripi la katwase papia kwini, sa ikadalranane, la kipadradresenge ku tangea ka mabelenge ka swa Ithiwpia. Kikai lasu tangea ka abelenge ku takipuawnganane ka marasiakaikai ki tacekecekelane ikai ki ababai ka talialalai ki swa Ithiwpia ka Kantaki. Kikai lasu wamwa Yerusalrime sukubu ki Twaumase, sa siwlriwlringa ikadalranane, wanene ikai ki palridingini si silrigulrigu ku hungu ki Isaiya ka yuginsia. 29Ku Siri la iya kai ki Pilripi, “Lu mwa dethe tupapalra ki palridingi dadavace.” 30Ku Pilripi la lailai mwa, la kilalra kwini ki mabelenge sa icengeecenge silrigulrigu ku hungu ki yuginsia ka Isaiya, la kivaga iniane, “Kikai silrigulrigusu pwalringalringausu?”

31Kai lasu la tubalre, “Lu kai ikai ku wabulru tumanaku dulru pulringalringau?” La dawlu ki Pilripi pubelenge ki palridingi si tadrusa nene. 32Kwidra silriguini ku Sisiu amia kai:

Kikwini lasu mia ki vaeva ka kiu ka kiabilibili putaculuculwane,

maraamau ki vaeva ka kiu ka yasaseleebane ikai ki tarakaciaciane ki ubale ka umawmase.

Thadaalrane, kwini lasu kadrwa ku naniakuvalanenga ku vaga.

33Kiadili ku akitusinalremeane,

kadrwa ku umawmase ku arakai ku dringelresane marasikai iniane,

la mialri kakadrwa ku umawmase ku makapeaelaela ku tatwaladhaneini,

asi lwiyane kai lasu paliakainga ku niake ku taikawmasananeini.

34Kwini mabelenge la kivaga ki Pilripi, “Ala bulruaili, kikai taiyane ki yuginsia amani ki aneane? Ngiakakamanimani, amanimani ki palrapalra?” 35Ku Pilripi la avavaga, patwalai kikai ki Sisiu pathagili, pelaela swacenge iniane ku patharukai ki hukuingi ki Yesu. 36Kai lalasu la lribate ku taluvale ku yakai ku acilai ithili ki kadalranane, kwini mabelenge, la iya kai, “Kai yakaikai kai acilai, kainaku lri maka pikakwa ikai kai kipabanau?”#8.36 Yakai ku sidrumane ka hungu ku padrima kai mwasaka 37 ka vaga “Ku Pilripi la iya kai iniane, ‘Alaiyasi ka patengatenganesu kipawtenga, lri dulrusu kipabanau.’ Kwini lasu la tubalre, ‘Kiapawtengaku ala ka Lalake ki Twaumase ku Yesu Kirisitu.’ ”

38Kwini lasu la paisadra kwini palridingi, ku Pilripi la tupapalra kwini ki mabelenge talebe mwa ki acilai, si pasikai iniane pabanau. 39Kwini lalasu sa ubelenge twalai ki acilai, ku Ri ki Tamatama la malra iluku ki Pilripi, la kai drelenga iniane kwini mabelenge, kwi lasu la pacungulu ukadalranane katwase, si suete ku sakiaragai ki kidremedremeini. 40Sakabilrilanenga la ikai ku umawmase ku kiapadradresenge ki Pilripi ikai Azutuse, yatalikai kwini salraelrelre ki lacacekele si pelaelaela ku hukuingi, pakela ku takelaneini Kaisaria.

Currently Selected:

Nisikawlane 8: NDV

Highlight

Compare

Copy