Nisikawlane 10

Ku Pitiru wadindu ki Kurinilriu

1Ikai Kaisaria yakai ku tangea ku umawmase, ku naganeini sia Kurinilriu, ka kwapingi ki swa Ruma ikai “Takwapingane Italri” ka mabelenge. 2Ka mwasakene turamuru ki Twaumase ku takaumawmasaneini; ku wacekecekeleini makanaelre la tupapalra iniane mukuludru usakene ki Twaumase, matwabake turamuru kai watelrai palribulu ki matiakukuru ki swa Yuda, la kisamula turamuru inulri ki Twaumase. 3Yakai sa maka ulringedele, ikaai ku tulru ki tuki, la kipadrele ku maburusi; ikai kwini ki dreleini patakwalringau drele ku tangea ku sasiakawlu ki Twaumase ku mwadadaane, la dawlu iniane, “Kurinilriu!”

4Kwini lasu la leengethe drele ki sasiakawlu belenge, kasamali turamuru, la kawriva, “Tamatama! Manemane?”

Ku sasiakawlu la iya kai, “Ku Twaumase kialalranga ku inulrisu, la drelenga ku tapalribulribulanesu. 5Kikai asasane sikawla ku tangea pamwa ka Yupa, dawlu kudra ki sia Simune Pitiru. 6Kwini lasu abadhabadha ikai ki daane ki taratulrangilrangici ka sia Simune; ku daane ki Simune yababiabila ki laveke.” 7Sa katwase kwini kawarivariva iniane kwini sasiakawlu belenge, ku Kurinilriu la dawlu pataru drusa ki sasiakawluini si tangea ka sasiakawluini ka kwapingi, 8si pelaela liniane ku takipadradresenganeini, ala sikawlu liniane pamwa ka Yupa.

9Sakakaiyane, la karacange ku tadadavacane lini sa kelakelanga Yupa, lri ikai kau mwalringedele, ku Pitiru la mubelenge ki cavalri inulri. 10La kasilrawnga, si apikanenga ku aga. Kwini wacekecekele sa padulrudulru ku kudrali, kwi lasu la drele ku vaeva ku maburusi, 11wadrele ku ngwaelebane ka belenge, la ikai ku mwalebe ku taingeane ku lamanemane, mia ki maadrau ka makalrilau, kwini piyu ki makalrilau talusupatele laka nikerengane arakai ku calrisi, si pulrailrai pulebe, 12ikai adringi la ikai sanaka waudriwdripi, laadhadhame si labulabulai, la ikaiyana ku lawagulagulai. 13La ikai ku lingau ku amia kai iniane, “Pitiru, ngidrakala, la culu si kane!”

14Ai amia kai ku Pitiru, “Tamatama, kainaku lri maka pia kwini, kadrwana ku kaneli sanaka manemanenga kudra kaika nitumabulane.”

15Kudra lingau saka kingipusale iya kai iniane, “Ku mabula iya ki Twaumase, kaisu lri maka tumakudrulru.” 16La pia kwini edeede kingitulrulu, kwini lamanemane la kisawlri kipubelenge.

17Ku Pitiru sa kidremedremedreme ani miya kwini iya, kai maka thingale kwini kipadreleini ka manemane ku pacugane, kudra sikawlu ki Kurinilriu ku umawmase la kelanga ki daane ki Simune, si acegecege ikai lrawlrawdru latadre. 18La akwadrau kivaga, “Yakai kwini ku badhabadha numi ku sia Simune Pitiru?”

19Ku Pitiru sa kidredredremeana kudra kipadreleini ka maburusi luka manemane ku pacugane, ku Siri la iya kai iniane, “Yakai ka tatulru ka umawmase#10.19 “Yakai ka tatulru ka umawmase” yakai ku sidrumane ka hungu ku amia kai “Yakai ku laumawmase”. wakela silape muswane. 20Lu mulebea, si tupapalra liniane, madha kalrilriki, amaniaku ka siakawlu liniane kainganai.” 21Ku Pitiru la mulebe, si kawriva kwini ki laumawmase, “Amaniaku ku silasilape numi. Manemane ku kela numi?”

22La tubalre kwini lalasu, “Mabelenge nai ka Kurinilriu ka siakawlu naiane kainganai, kwi lasu mwakuludru usakene ki Twaumase ka madringelrese ka umawmase, ka kiausakene ki mapapangale ki swa Yuda. Yakai ku tangea ku sasiakawlu ki Twaumase ku peaelaela iniane, dawla iya iniane muswane mwa ki daaneini, ku akibulrwane muswane.” 23Ku Pitiru la pudaane liniane, si pasudalru pasulai liniane makavale.

Sakakaiyane, ku Pitiru la tupapalra liniane, ku twalai Yupa kainganai kudra lalasu la tupapalra iniane. 24Saka pakavale, la kela Kaisaria. Ku Kurinilriu la dawlunga ki laretesaneini si talrailragini ikai tavanane ukalavalava. 25Ku Pitiru salri mudaane, la kainganai ku Kurinilriu, mucucubungu ki drapale ki Pitiru pidruru sukubu iniane. 26Ku Pitiru la makakai drakale iniane, si iya kai, “Ngidrakala mialriaku ka umawmase.” 27Ku Pitiru la takukawrivariva ki Kurinilriu, si takumudadaane. La drele ku takaalra ku laumawmase ku yadaane, 28la iya kai liniane, “Wathingale numi makanaelre, singikai ku kakwakudhane nai, ku swa Yuda ku umawmase kai mangwalatatatadre ki maelane ka zuku ka umawmase, ai ku Twaumase peaelaelanga nakwane, sanaka umawmase madha tumakudrulru tudreadrekase. 29Lakamani, sa pakainganai numi sikawlu dawlu nakwane yai, kainaku pasiaulri, kaiyanganadhaku. Kikai lri kivagaku, ku dawlu numi manemane ku pacugane?”

30Ku Kurinilriu la iya kai, “Ku sapakasupatele, ikai ki maka mwalringedele ki tulru ki tuki, yakaiyaku tavanane inulrinulri. Ala kirimu ikai ku tangea ku sialaimai ku wathelare ku laimai ku acegecege icucubungu nakwane, 31la iya kai, ‘Kurinilriu! Ku Twaumase kialalranga ku inulrisu, la thingale ku palribulribulusu ku lamathariri ku awngane. 32Sikawla ki umawmase pamwa ka Yupa, si dawlu kwidra ki sia Simune Pitiru ka umawmase. Kiatubadhabadha ikai ki daane ki taratulrangilrangici ka Simune, ku daane ki Simune yakai babiabila ki laveke.’ 33Alakamani, ku makakaaili sikawlu ki umawmase dawlu muswane, ku dulrusu si kela, mathariri turamuru. Kikai yacucubungu nai ki Twaumase makanaelre, lri kilalalra nai ku pelaela muswane ki Tamatama patuelre ku vaga.”

Bulru ki Pitiru

34Ku Pitiru kawariva iya kai, “Kikai pwadriadriingadhaku thingale, ku Twaumase aparamaramau drele ki sanaka umawmase. 35Sanaka mwasakene ukuludru iniane, la kadringelrese ku kakwakudhaneini, kai wasusu ku sumanemane, madalame patuelre. 36Wathingale numi, ku Twaumase pangwakai ki Tamatama ki naumawmasenga ka Yesu Kirisitu pelaela kudra rathudane ka hukuingi, si baai ki swa Iseraylri. 37Ku tapelaelane ki Yuhani pangwakai ki pabanau ka hukuingi pakela kai, kudra twalai Galrilri pathagili dindu si palraelre Yuda yai wathingale numi. 38La thingale numi ki swa Nazarethe ka Yesu, ku tapiane ki Twaumase paswaete ku Siri si puku pikai ki kinawmasaneini, si pasalraelre dadavace sanaka inunga, pia ku mathariri ku awngane, pawdringai ki sanaka kiaruthuku ki aidridringane ku umawmase, asi lwiyane ku Twaumase yakai tapalra iniane. 39Kunai amani nai kudra wadrele si thingale sa ikai Yerusalrime si talidrumane Yuda ku takaunganeini. Kwini lalasu la malra iniane pwa ki ziwzika si kedrekedre papacai. 40Ai, saka samakatulrulu, ku Twaumase pasiaela iniane, si padrele pathingale ki umawmase; 41kaika mwataluvaivai padrele ki mapapangale, padrele sikakathane naiane ka kiapilri ki Twaumase ka amani ku lri pelaela. Sa sielanga twalai ki wapacai, mabalrulunga nai iniane kane si ungulu. 42Wadrekase naiane ku apelaelane ki kikai hukuingi ki laumawmase, si siwmi kamani ku cegecege ki Twaumase, kamani ku lri saibange ki panianianiake si wapacainga. 43Sanaka yuginsia laka pasiakai iniane pelaela; amia kai makanaelre, sanaka masalru iniane, lri dulru ngukai ki naganeini si kipacepe ku pasalrivane.”

Ku sakamaelanane ka umawmase tarwamara ki Siri

44Sa bulrubulrwana ku Pitiru, mwalebe ku Siri makakai ki kinawmasane kwidra ki tarwamara ku sabulrwane ku laumawmase. 45Kwidra twalai Yupa kainganai tupapalra ki Pitiru kudra lasinzia ka swa Yuda, wadrele sa baai ku Twaumase ku migemi ki Siri ki sakamaelanane ka umawmase, la kasamali turamuru; 46asi lwiyane kialalra kai ki lalasu sa kawriva ku vaga ki abake, si drengedrengere ku matisamaliane ki Twaumase. Samianga kwini ku Pitiru la iya kai, 47“Kikai laumawmase tarwamaranga ki Siri, mia naiane, aneane ku lri dulru ruthuku liniane ku akipabanavane lini arakai ku acilai?” 48Ngwalai kikai, la pelaela liniane ku apangukaiyane ku nagane ki Yesu Kirisitu kipabanau. Kwini lalasu la kitubi ki Pitiru ku aikaiyaneana liniane maka piyale.

Currently Selected:

Nisikawlane 10: NDV

Highlight

Compare

Copy