Nisikawlane 7

Ku Setipane wacarungucungane kawriva

1Ku abebeelengenga ki barakalai la kivaga ki Setipane, “Tengatengane ka yakai ku ngimiyaiya ki kikai?”

2Ku Setipane la tubalre, “Kunumi ka latarudrawdrange ka laretesane, kilalalra! Kwidra cucungulaneta ka Aberahame sa ikai Mesuputamia, sakaiyana iziu mu Harange, ku lrigu ka Twaumase papia iniane adrelane, 3si iya kai iniane, ‘Lri katwasesu ki cekelesu si laretetesanesu, la mwa kwidra ani mwa kwini iyali muswane ku kadaengane.’ 4Ku Aberahame la katwase ki kadaengane ki swa Kalediane, si katwase mwa ikai Harange. Ku tamaini sa pacainga, ku Twaumase la pataluela iniane pwa tini, kamani kikai taikaiyane numi kikai asasane. 5Sakamani kwidra ku Twaumase kadrwa ku manemane ku tacekecekelane ku baaini ki Aberahame, adravane ka tacegeceegane ku kadaengane kadrwa, ai ku Twaumase palraingi ku abaadhane iniane kikai kadaengane, ka lrika tacekecekelaneini si mwabaibalrithi iniane, kwidra kadruana ku lalakeini. 6Ku Twaumase amia kai iniane kawriva, ‘Ku mwabaibalrithi muswane lri salikai talidrumane ka kuni, lai lri ikai kwini aduri, si kitusinalreme tara 400 ka caili. 7Ai, kwidra twaduri liniane kudra kuni lri pathavungaku, lubibilrili kai lalasu lri katwase kwini, la lri ikainga kai sukubu nakwane.’ 8Ku Twaumase la cegecege ku samakaketeketane ki Aberahame, arakai ku kiagelregelre ka lrisi tusapatuthingalane. Lakamani, ku Aberahame saka samakavalrulu ku takitulalakane ki Isake pakiagelregelre tulrisi, la mialri ku Isake pakiagelregelre tulrisi ki Yakubu, ku Yakubu la pakigelregelre tulrisi kwini ki tamatama ki tai 12 ka zuku.

9“Kudra lalalake ki Yakubu pathalra ki bitakane lini ka Yusepe, la malra kilangai iniane pwa Izipiti. Ai ku Twaumase yakai tapalrapalra iniane, 10si palribulu iniane pakidaili ki amatikurwane patuelre, sa icucubungu kai lasu ki talialalai ki swa Izipiti ka talialalai yai, ku Twaumase patarwamara iniane ku tharirane si lrigilane. Ku talialalai la cegecege iniane kaamaninga ku abebeelengenga ku takicapilane ki kuni si taramarasikaikai patuelre ki daane ki talialalai. 11La kai tarathainu, wakela ku kalasilravane palraelre ki swa Izipiti si Kanange, la pakilringau turamuru ku tamatikurwane, ku cucungulaneta la sakaeleme ku taleke. 12Ku Yakubu sa kilalra ka Izipiti ala ka yakai ku taleke, la sikawlu ki lalalakeini, ka amani ku cucungulaneta, mwa kwini; kikai yai amani ku aswalaalanga ka tamwane. 13Saka ngusipusale mwa, ngiapapelaela ku Yusepe ala mathingathingale ki labetakaneini, ku talialalai la twalai kikai thingalenga ki lawacekecekele ki Yusepe. 14Ku Yusepe la sikawlu ki umawmase pamwa ki tamaini ka Yakubu, si dawlu iniane si wacekecekeleini makanaelre mwa Izipiti, kwidra wakela ku maretetese lu elrelreane ta 75 ka umawmase. 15Ku Yakubu la mulrawdru mu Izipiti, ku Yakubu si cucungulaneta la pacai ikai kwini. 16Kwidra kinawmasane lini la kisatedre pwa Sekeme, si dralreke pikai ki langai ki Aberahame ara paisu kwidra ki agagane ki Hamure ka tinubalrivane.

17“Ku Twaumase sa lri darurunga kwidra vai ku lrika apangimianeini ku tapukawnwaneini ki Aberahame yai, kai swa Iseraylri ikai Izipiti ku umawmase arwa padrima tapangale. 18Sakabilrilane la ikai kwidra tangea ka kadrwa ku tathingalaneini ki Yusepe ka bavane ka talialalai pathagili rathudu ki swa Izipiti. 19Kikai talialalai arakai ku nidraedrangelrane ka kakudhane si pamatikuru ki sakacekeleta, pakwalri ki cucungulaneta, la vutha liniane cilri kwidra ki ladaini, ku kaika apapanianiakane liniane. 20Saicengecenge ka ngimiyaiya kwini la kitulalake ku Musi; lu drele ku Twaumase matingulwalwadhane turamuru ku tacebeaneini, la ikai tavanane kilapu taratulru ka dramare. 21Saka takicilrianeini, ku lalake ki talialalai la alra si lapu iniane, ala ngitatulrabuthuini si pakadrau. 22La kibulru ku kakwakudhane ki swa Izipiti, la sasaiyaiyane si sapukwane kipuawngane.

23“Sa taramasupatelenga ku caili ki Musi, la kalrithethe kidremedreme ku adrelane ku tangimiamiane ki sakacekeleini ka swa Iseraylri. 24Yakai saka kiningivalane, la drele ku tangea ka sakacekeleini ku kiatusinalrelrelreme ki swa Izipiti, la mwa si palakebe, pusakai iniane, la papacai kwini ki swa Izipiti. 25Alau lri pulringalringau kai sakacekeleli ku Twaumase ala ka lri arakai iniane palribulu liniane amia, ai kai lalasu ala ka kai pwalringalringau. 26Sakakaiyane, la drele ku tadrusa ka tara swa Iseraylri ka makakalisilisi, anau turathudane liniane la iya si iya kai, ‘Kunumi masakacekele numi, anu makakabebebeetethe?’ 27Kwini twasinalrelrelreme ki sakacekeleini la lrudrulu ki Musi si iya kai, ‘Aneane ku wadrekase muswane si lrika tamatamasu, tarasaibaibangesu si kelasu kicaicapili naiane? 28Kusu lri papaacaingasu nakwane pangimia kwiya ku tapapacadhanesu ki swa Izipiti?’ 29Kai Musi sa kilalra kikai vaga la twalai Izipiti mubere, la ikaikai ki tai Midiange, la ikai kwini tulalake ngudrusa ku sawvalai.

30“Sangilribatenga ku tinaramasupatelane ka caili, la ikai ubulane adethe lregelrege Sinai, la ikai ku tangea ku sasiakawlu ka belenge ku twalai kwidra ki kelrabe ki kwadaladalai ka cecenekane ka angatu papia ki Musi adrelane. 31Ku Musi sadrele ku tangimiane kikai la ngituluku si kasamali turamuru, si katwase arwacucubungu, lri drele luka ngiatumane, ki kikai kwidra, la kilalra ku lingau ki Tamatama ku amia kai, 32‘Kunaku Twaumasaku ki cucungulanesu, ka Twaumase ki Aberahame, Isake, Yakubu.’ Ku Musi la mukuludru si manutaketake, kai thurunga drele. 33Ku Tamatama la iyana kikai iniane, ‘Mwalra kwini kecesu, asi lwiyane kwi taikaiyanesu acegecege Alrivilrivi ka daedae. 34Kudra la kawkawluli ku taikaiyane Izipiti ku takipakwalriane lini wadrelenga naku patakulringau, la kilalraku ku tadaangane lini, lai kelaku mulebe si palribulu liniane. Bwala, nau sikawlu muswane mwa Izipiti.’

35“Kikai Musi amani kwidra kai kiatarumara kudra ki swa Iseraylri, si kikivaga iya kai, ‘Aneane ku wadrekase muswane si lrika tamatamasu, tarasaibaibangesu naiane si kelasu kicaicapili naiane?’ Kudra nakiaiya ka umawmase, ku Twaumase la pangukai ki sasiakawluini belenge si adrelane ikai ki cecenekane ka angatu, si sikawlu iniane tutamatama, tutarapalribulribulu. 36Kwini lasu wasangiluku ki mapapangale twalai Izipiti katwase, ikai Izipiti, ikai Suize ka laveke, si ikai ubulane ku tinaramasupatelane ka caili, paiya ku makaalra ku pinangu Twaumasane ka puku si matiasamali ka awngane. 37Amani kikai Musi kwidra peaelaela ki swa Iseraylri ka laumawmase iya kai, ‘Ku Twaumase lri twalai ki retesane numi pasikai numiane pacegecege ku tangea ku yuginsia, mia kikai ki tapacegecegane nakwane#7.37 “pasikai numiane pacegecege ku tangea ku yuginsia, mia kikai ki tapacegecegane nakwane” ku wahunyake madu iya kai “pasiakai numiane pacegecege ku miyaiya nakwane ka yuginsia”..’ 38Ku Musi yakai calragulragu taelre ki swa Iseraylri ka laumawmase, kwini lasu yakai taelre ki cucungulaneta si kwidra ki yakai Sinai lregelrege makakawriva iniane ka sasiakawlu belenge, kai lasu tarwamaranga ku lrika apalralrawthane ka matiakiragai ka vaga, la malra kwini vaga si pelaela mitane.

39“Ai, ku cucungulaneta kai kialalra iniane, la kai tumanemane iniane, si ka madadalameana siwlriwlri mu Izipiti. 40Kwini lalasu la iya kai ki Arungu, ‘Ala pasikaiya naiane darepe tutwaumase, lani icucubungu naiane si ililuku ki kadalranane nai, kunai kai nai wathingale kwidra ki waililuku naiane twalai Izipiti ka Musi luka kiapadradresenge ki manemane ka awngane.’ 41Ala kirimu darepe ku vaeva ka lwalwange kwini lasu, si patarumara ku sapatarumarane iniane, la pasikai kwini ki darepe lini kapeaperau tulrisisi. 42Ai, ku Twaumase wabangulu ku lringauini kai drele liniane, la pangilralraingi liniane mwa sukubu ki latariau ibelenge, miaku taiyane kudra yakai ki hungu ki yuginsia ku taiyane kai,

Kunumi ka swa Iseraylri ka laumawmase, ku taikaiyane numi calragulragu tara masupaatele ka caili,

kadrwana ku tapasikaiyane numi nakwane patarumara ku cinulwane ka waudriwdripi si lamanemane.

43Mabulribulri numi ku Alrivilrivi ka balrawbau ki Muluki ka twaumase,

la mabulribulri numi ku tinusamiamiangane ka Ripange,

kamani kwidra darepe numi si sukusukubu ka samiamiange.

Lakamani, ku apataluelaneli numiane pakatwase mwa ki kaika swa Babilunia!

44“Ku cucungulaneta sa ikai calragulragu yakai ku tapangimiane ala ka tapalra ikai ku Twaumase ka Alrivilrivi ka balrawbau, kamani ku Twaumase ka peaelaela ki Musi ku lrika apasingikaiyane ku takipadrekadrekasaneini si patwalrau darepe. 45Sakabilrilane ku cucungulaneta la mucungulu kikai ki Alrivilrivi ka balrawbau; ku Twaumase kwidra lu icucubungu liniane pakatwase ki sakamaelanane ka umawmase, si malra kwini kadaengane ikai kwini yai, kai Yesua si kwini lalasu la malra kwini Alrivilrivi ka balrawbau si salri pwa kwini, pakela ki zidai ki Davidi. 46Ku Davidi la kikiragai ki Twaumase, la kitubi ku apalraingane iniane pasikai ki Twaumase ka Twaumase ki Yakubu darepe tuvaeva ku daane#7.46 “apalraingane iniane pasikai ki Twaumase ka Twaumase ki Yakubu darepe tuvaeva ku daane” yakai ku sidrumane ka hungu ku amia kai “pasikai ki swa Iseraylri tudaane ku vaeva ka daane ki Twaumase”.; 47ai, sakabilrilane ku pasiakai ki Twaumase darepe tudaane amaninga ku Sulumungu.

48“Ku patengatengane, ku Abebeelengenga ka Twaumase kaika lri ikai ki tudaane ki umawmase adringi, mia ku taiyanenga ki yuginsia iya kai:

49Amia kai ku Tamatama: Taetalaneli subelebelenge,

tapudrapalaneli kai kadaengane.

Lri darepe numi pasikai nakwane tungitwatumane ka daane?

Yakai inu ku lrika taisadrasadraneli?

50Kikai sanaka manemanenga kainaku kamani ka wabekace patuelre?

51“Kunumi ka makelrathe ka laumawmase, nicelrepane kwini kidremedreme numi, yakai ku calringa numi, ai kai kialalra ku vaga ki Twaumase! Kunumi miyaiya numi ki cucungulane numi ka tara kiaecebe ki Siri! 52Aneane ku yuginsia ku kai kia hakegai ki cucungulane numi? Ku layuginsia peaelaela lri kela kwidra madringelrese ka sasiakawlu iya, ku cucungulane numi la malralringa papacai liniane, kikai la piyanga numi kilangai kwini ki sasiakawlu, si papacai iniane. 53Kunumi amani numi kudra tarwamaranga ku hulrice ki Twaumase, si kikai hulrice amani ku sasiakawlu belenge ku pwa kawmasane, la kai numi pangimia kwini hulrice.”

Ku Setipane kiapapacai ngwalai ki vaga ki Twaumase

54Kwini yagikai ka lagiingi sa kilalranga kilakikai vaga ki Setipane, la kagirimucu turamuru si papia iniane pararitaiti. 55Ku Setipane la kisuete ki Siri, la paswabelenge drele, la drele ku lrigu ki Twaumase, si la drele ki Yesu ku acegecege ikai tali vanale ki Twaumase. 56La iya kai, “Wadrelaku ngwaelebanenga ku lrawlrawdru ka subelebelenge, ku Lalake ki Umawmase la acegecege ikai tali vanale ki Twaumase!”

57Kwini lalasu la akwadrau kawriva, si tamenge ki calringa lini, la katwase makitu mucucubungu, ruthuku ki Setipane, 58la alra lrudrulu pulatadre ki cekele, la arakai ku lrenege cabiri iniane. Kwidra lawadredredrele ku laumawmase la mwalra kwidra sapakabelengane lini ku laimai si baai pakadrenge ki tangea ka sia Saule ka yacengecenge. 59Kai Setipane saicengecenge kicabicabiri la kitubi ki Tamatama iya kai, “Tamatama ka Yesu, kiatubiaku ku atarumaranesu kikai abakeli!” 60La pidruru si akwadrau iya kai kwini lasu, “Tamatama! Madha papiapia liniane kikai pasalrivane!” Sa maka iyanga kwini kawriva la pacai.

Currently Selected:

Nisikawlane 7: NDV

Highlight

Compare

Copy