Nisikawlane 6

Tapitu ka taraparaluralubu

1Sakamani kwidra, ku sinzia lukakaiya arwa takaalra, kwidra arakaikai ku vaga ki swa Gurike ka swa Yuda si kwidra arakaikai ku vaga ki swa Hiburu ka swa Yuda makalilisi. Kwini arakaikai ku vaga ki swa Gurike ka swa Yuda la akuiya ki lanisikawlane ikai ki tapavalavalane ku saarakaiyane sikace ki vaivai ku kaika tapudriadringadhane apavalavala ki walibakane ka ababai. 2Ngwalai kikai, kai ta 12 ka lanisikawlane la sarubu kwini ki sinzia makanaelre, si iya kai liniane, “Pisadra kai apelaelane ku vaga ki Twaumase, si katwase marasikai ki akaneane lu iya numi naiane, kai pacengecenge. 3Lakamani, ikai ki Tamatama adringi ka laretesane, lri pilri patwalai numiane ku tapitu ka kiapakawnai, kiasuete ki Siri, la kalrigili ka umawmase, lani kamani ku marasiakai kikai awngane. 4Kunai yai, lri savaeva nai ku kidremedreme pikai ki ainulriane si adindwane ka awngane.”

5Ku ani pia kwini taiyane ki lanisikawlane la kipalraingi ki mapapangale, ala pilri ki Setipane ka makecenge ku salrwane, ka kiasuete ki Siri, la pilri ki Pilripi, Purukuru, Nikanure, Timunge, Paremena, si talwaela ku takisuswane a Yudaiyakiu ka swa Anetiuke ka sia Nikula. 6Ku mapapangale la pacegecege liniane picucubungu ki lanisikawlane, sa maka inulri ku lanisikawlane, la ansu liniane.

7Ku vaga ki Twaumase la pacungulu paruswadrau, ikai Yerusalrime ku sinzia la aru padrima aru takalrakaalra, la takaalra ku barakalai ku mialri tarumara si kisusu.

Takipwalrane ki Setipane

8Ku Setipane kiasuete ki migemi si puku ki Twaumase, la ikai ki mapapangale pia ku matiasamali ka awngane si pinangu Twaumasane ka puku. 9Ai yakai ku laumawmase ku wabaebalre iniane, kilakikai umawmase amani kwidra kaiingi ki “Ngialralrailraingi” ka rarubwane, paelre ki twalai Kurini si Alikesangeda kainganai ka swa Yuda ka umawmase. Kai lalasu si drumane ka twalai Cilikia si Asia kela ka la swa Yuda ka umawmase madradrikidrikisi ku vaga ki Setipane. 10Ku Siri la patarumara ku lrigilane ki Setipane, lakamani kwini lalasu kai maka kiaecebe ku taiyaneini ku vaga. 11Kwini lalasu la kirimu langai ki laumawmase ku akainganadhane kadraedrangelre kukusu iniane iya kai, “Kunai kialalra nai kikai ki lasu sa tulilisi ki Musi si tudreadrekase ki vaga ki Twaumase.” 12Kai lalasu arakai ku miyaiya kikai pangiracuku ki mapapangale, si laciwru, si tarabulrubulru ki Sisiu ka lasinsi. Kwini lalasu la kela silape ki Setipane, si ruthuku iniane, la malra iluku iniane pwa gikai. 13Kikai lalasu kwidra langai lini ka laumawmase la kainganai si iya kai, “Kai umawmase kai tarakawrivariva baebalre ki daane ki Twaumase si hulrice ki Musi. 14Kialalra nai sa iya kai kikai lasu, kai swa Nazarethe ka Yesu lri buruku ki daane ki Twaumase, si lai pakabalrithi kwidra sanaka kakwakudhane ka kipelaelata ki Musi!” 15Kwidra sanaka yakai gikai daane si nene ka umawmase la makitu drele ki Setipane, la drele kudra lringauini mia ki lringau ki sasiakawlu belenge.

Currently Selected:

Nisikawlane 6: NDV

Highlight

Compare

Copy