Nisikawlane 27

Tanguvarukurane ki Pawru mwa Ruma

1Kudra sa turingaringawnga ka lri ngukakai nai aciacilai mwa Italri, kwini lalasu la malra ki Pawru si kudra drumane ka kiaemenge baai ki kiacapili ki kwapingi ki daane ki talialalai ki swa Ruma ka sia Yuliu. 2La mubelenge nai ki vaeva ka varukuru twalai Aderamitine, kikai varukuru katwasenga, lri siluludu kudra ki tawbilabilane ki lavarukuru kwini ki swa kai Asia. La ikai ku Arisetarekuse ka swa Makidunia ka swa Tisaruniki, maredele naiane. 3Sakakaiyane la daruru nai Sidune. Ku Yuliu la kilibake ki Pawru, la palraingi iniane ku matwase silape ki talrailragini, si kitubadhabadha. 4La twalainga nai kwini katwase, ai kiadresenge nai ki valrigi, kai varukuru la kisivagai ki valrigi, si ngukakai tali Saipuruse. 5La katwase nai talubalre papia tali Cilikia si Pamepilia, sa darurunga Likia ka Mira. 6Ikai kwini, ku Yuliu kiadringai ku vaeva ku twalai Alikesangeda kainganai ku varukuru, lri katwase papia Italri, la paubelenge naiane makanaelre ki varukuru.

7La pacungulu lu makapiale ku vai, kwini varukuru ngiabalai turamuru, kwalri ala daruru deethe Kenidu cekele. Asi lwiyane kiatelenge ki valrigi, la kai nai maka pacungulunga ngukai kudra tangukai taiyane nai, la ngukakainga nai Kerite ka vuvugu ngulralrilrikudru katwase, ngulalakipi Salemuni lribate. 8La tara babiabila nai ki laveke papucucubungu katwase, la pakaelre nai ku puku nai ala daruru nai kudra ki sia Mathariri ka tawbilabilane ki lavarukuru ka wadethe cekele Lasia.

9La makakalralenga nai ku vai, la ngilribate ku talailaisane ka lrisi, kai matiapacungulunga katwase. Lakamani ku pakipapawlringau ki Pawru ki laumawmase makanaelre, 10iya kai, “Kunumi makanaelre, lu drelaku lu pacunguluta katwase ngukai kai matiaukuludru, kai lri kakathane kai lamanemane si varukuru ku asipunaneta, adravane kai niaketa makucingalre kai lri katumane iya.” 11Ai, kudra mabelenge ki kwapingi masawsalru ku vaga ki kiacapili ki varukuru si kudra ki pivarukurane, la kai kasalru ki Pawru. 12Kikai tawbilabilane ki lavarukuru kaika mathariri ngilribate ki kalakecelrane ikai kai, la ngwalai ku tapapangale ku palraingi ku akatwasane, malrelreme ku adarurane Huiniki ngilribate ki kalakecelrane. Kai Huiniki ikai kwini amani kudra vaeva ka tawbilabilane ki lavarukuru Kerite niyane ka vuvugu, ka wacubungu tali talriwgane lrawdru si talriwgane dradha#27.12 “talriwgane lrawdru si talriwgane dradha” ku wahunyake madu iya kai “dradha talrawane si lrawdru talrawane”..

Tavalrigane sa ikai ki laveke

13Kwidra, la ikai ku saseverane ku twalai tali lrawdru, alau lri maka pangimiata kudra takikakaneta katwase la iya makanaelre, la pubelenge ku parenere si katwase, ngubabiabila Kerite ka vuvugu katwase. 14La kai tarathainu, ala ikai ku pangiacaeme turamuru ku valrigi twalai tali talrawane singikai kwini ki vuvugu kainganai. 15Kudra varukuru la kivalrigi, si kai maka kiecebe, kadrwanga ku nau pangimia iya nai, la singikai nai ku tapangimianenga ki valrigi mailuku. 16Ku varukuru la ngukakai kudra ki vaeva ka vuvugu lrilrikudru ki valrigi katwase, kwini vuvugu ka kadaengane sia Kauda. Pakakuciingale nai ala paidrengere nai kwini sakipalribulribulane ka varurukuru. 17Kwini la tara ikaikai ki varukuru, la malra pubelenge pwa ki maadrau ka varukuru, la arakai ku calrisi ka rupu pakerenge. Kwini lalasu la mukuludru ku mwapungupungu ikai Libia ki aenaenai, la pulebe kwini varukuru, la singikai ki valrigi ku tapapinwanenga kipeapelai. 18La pacungulu kudra valrigi, sakakaiyane, kwini lalasu la kirimunga cilri kwini laamece pwa ki laveke, 19samakatulrulu, adravane kudra rarukudrane ki varukuru la cilringa. 20Maulai nai kai drele ku vai si latariau, ku valrigi si bikabiki la aru pangicaeme, la kakadrwanga ku kipukadavane nai ku akipalribulane.

21Kudra yabelenge ki varukuru ku laumawmase la makakalralenga ku vai kai kaneana ku namaneemanenga, ku Pawru la acegecege icucubungu liniane si iya kai, “Kunumi makanaelre, ana sara kilalra numi ku vagali, si kai ngukai Kerite, nai kaita mia kai kipadradresenge ku asipunane. 22Kaiasasane lri pasapukwanaku numiane madha kakalithi, kadrwa ku lri pacai ku natangeanga numiane, kathane kai varukuru ku asipunaneta. 23Asi lwiyane kudra kisususuli, ka sukusukubuli ka Twaumase, ku maungu siakawlu ki sasiakawluini belenge si iya kai nakwane, 24‘Pawru, madha mukuludru! Lri tara acegecegesu icucubungu ki tinuhika ki swa Ruma. Ngwalai ki sakialibake ki Twaumase, ku Twaumase la kelreteenga ku apalribulane kwini ki latwapapalra muswane nguvarukuru ku niake lini.’ 25Lakamani, kunumi makanaelre kadralrwa kwi kidremedreme numi, masalrwaku ki Twaumase lri tara pangimiya ku taiyane nakwane kawriva. 26Ai lri tara kipawbilata pwa kudra ki vaeva ka vuvugu.”

27Sa daruru ki maungu ki samaka 14 ka vai, kudra varukuru nai laka sakamiya ikai ki laveke Aderiase kipeapeapelai. Sa daruru ki kabiceacelrakane sakamaungu, kudra tarakawaungu ikai ki varukuru alau padethengata ki daedae la iya. 28La pulebe ku calrisi ku saleketane, si lekete ku mwadringane ki acilai, ala ka masupatele ka mituru, la katwaseana aru adili ala pela lekete, ala ka matulrulu ka mituru. 29Kwini lalasu la mukuludru ku watakela ki alrisapesape, la patalikai tali tawtawthu ki varukuru pulebe ku supate ku parenere, si mukalava ku akaliarane. 30Kudra taraikaikai ki varukuru la kisanu mubere kwini ki varukuru, la surusuru pulebe pwa ki laveke kudra sakipalribulribulane ka varurukuru, ngikapulelebeane ku Parenere patwalai tali awlru ki varukuru. 31Ku Pawru la iya kai ki mabelenge ki kwapingi si lakwapingi kawriva, “Kilakikai umawmase lu kai asuru ibelenge ki varukuru, lri kai numi makadulru kipalribulu.” 32Kudra lakwapingi la pwa retege kudra calrisi ki sakipalribulribulane ka varurukuru, si pakatwase ku tapapiane kipeapelai.

33Sa lri padalrunga si kaliare, ku Pawru la pasapukwane liniane makanaelre ku akaneane ku lamanemane. Si iya kai, “Kai kathathibuthiburu numi, si kai kanekane kai ungungulu, maka 14 ka vai. 34Kaiasasane lri pasapukwanaku numiane ku akaneane numi ku lamanemane, ala lri dulru numi kakecenge, asi lwiyane kunumi ka tangeea adravane ka vaeva ka isiu kadrwa ku lri kalisi si asawlra.” 35Sa iyanga kai kawriva, ku Pawru la malra kudra lapange, si icucubungu liniane makanaelre la papia ki Twaumase patarumara ku sakiaseasenane, ala apapipithingi si kane. 36La makitu kadralrunga ku kidremedreme lini makanaelre, si kanenga. 37Kunai ka sakaturedele ikai ki varukuru ta 276 ka umawmase makanaelre. 38Sa kabucukunga makanaelre, pakai ku apakaliapadhane ku telregane ku amece ki varukuru, la cilri pwa ki laveke ku yakai belenge ki varukuru ku mugi.

Mwathene ki enaenai ku varukuru

39Sakaliarenga, kwini taraikaikai ki varukuru la kai thingale kwini ki kadaengane, ai sadrele kudra taluvaale ku baiyu, si la aenaenadhane, la kidremedreme ku apangimiane pubabiabila kwini varukuru. 40Kwini lalasu la paswala retege kwini calrisi ka rupu, la pulebe ku parenere, si takulruka kwini calrisi ka savelevelevelane ki varukuru, la malra bilibili pubelenge kwidra balrawbau ki varukuru, ku lrika apakuvaivalrigane kwini ki varukuru papia babiabila. 41Ai, kwini varukuru wamwa takela ki aenaenadhane, kwini awlru ki varukuru la kiruthukunga, kai maka ngivelevele, kudra tawtawthu ki varukuru, la kipangicaeme kibikabiki, la kalalisinga pakilringau.

42Kudra lakwapingi la kisanu papacai patuelre kwini ki lakiatupasalriu ka lakikekerenge, ku kaika aikaiyane ku walredepe si mubere. 43Ai kudra mabelenge ki kwapingi lri palribulu ki Pawru, la kai palraingi ku acapangane pangivelevele liniane, la kirimu drekase paswala ku la wathingale lredepe ituku mwa ki acilai, si lredepe ubila. 44Kudra la drumane ka umawmase la arakai ku labaali si lapapithingane ki varukuru ka angatu mubila. Sa pia kikai, la makitu ubila si kipalribulu makanaelre.

Currently Selected:

Nisikawlane 27: NDV

Highlight

Compare

Copy