Nisikawlane 26

Ku Pawru yacucubungu ki talialalai ka Ageripa kawriva ngipapalakebe

1Ku Ageripa la iya kai ki Pawru, “Kai lri katumane lu kawrivasu ngipapalakebe.”

Ku Pawru la sege ku alrimaini si kawriva ngipapalakebe:

2“Ageripa ka talialalai, kaikameane ku maka icucubunguli muswane, si kawriva ngipapalakebe ku takukuswane nakwane patuelre ki swa Yuda mwaesadhaku. 3Ku namatikiragainga wathingalesu patuelre ku kakudhane si mendai ku madrikidrikisi ki swa Yuda. Ngwalai kikai, lri kitubiaku muswane ku akiadilanesu kilalra kai apelaelaneli.

4“Twalai saka vavalakaku pakela kikai luka ngitwatumanaku ku takaumawmasaneli, kai swa Yuda kadrwa ku kai wathiingale. Ku takitulalakaneli ku tapanianianiakaneli yakaiyaku kai ki kunita, si ikai kai Yerusalrime. 5Anaiyasi kai lalasu la mubangalre pasikai nakwane pelaela kawriva, kai lalasu wathingale ala ka singikapathagilaku ikai ki takisuswaneta ka pangiamiamia turamuru ka swa Palrisai. 6Kikai acegecegeli ikai kai si kisaibaibange, ngwalai kudra sidramadramali papia ki Twaumase ku tapalrainganenga papia ki cucungulaneta. 7Kikai nipalrainganenga amani ku sukusukubu nai ka tai 12 ka zuku ka masakacekecekele, lukavaiyane lukamaungu ki Twaumase si sidramadrama ku amalrane. Talialalai, ngwalailringa kai ki nisidramadramane, alakamani ku kikukusuli ki swa Yuda! 8Ai, anu kirimu ka la swa Yuda kai kasalru ki Twaumase ku apasielanane ki wapacainga ka umawmase ala ka lri dulru pangimia?

9“Kunadruma maiyalriaku kasalru ku apakaelreane ku puku baebalre ki nagane ki swa Nazarethe ka Yesu. 10Sa ikaiyaku Yerusalrime pangimiaku kikai. La patwaladhaku ki marudrange ki barakalai malra ku puku, la ruthukaku ki takaalra ka lasinzia si emenge. La kainaku ka pangiamia kai sikakathane, kwini lalasu lulri kipathavungu si kipapacai, la mialriaku palraingi. 11Kudra drumane, kingiakalralaku ikai ki lararubwane ki swa Yuda pathavungu liniane, si vuthaku liniane paisadra ku takisuswane. Malrasaku turamuru kagirimucu liniane, pakelaku ku wamwa ki cekele ki maelane ka kuni hakegai liniane.”

Peaelaela ku Pawru ku takisuswaneini ki Yesu

(Nisikawlane 9.1-19; 22.6-16)

12“Yakai ku sinanguvalane, la mailukaku ku baai ki marudrange ki barakalai ku puku si drekase si katwase mu Damasekuse. 13Talialalai, salri ikaai kau mwalringedele, sa ikaiyaku kadadalranane wadrelaku ku sivale ka ledra, ka silrialribateana ki vai ka ledra, twalai belenge paledra nakwane si ngithalringulu kudra ki papalrali. 14La gurapangane nai idaedae. La kilalraku ku lingau, arakai ku vaga ki swa Hiburu iya kai nakwane, ‘Saule, Saule! Asu hakegakegai nakwane? Miasu ki sawvalai ka lwange ka arakai ku drapale tetere ki cecenekane ka salrumalrumadhane ki tawki, la kirimulringa ngipapakadula.’ 15La kivagaku, ‘Tamatama, aneanesu?’ Ku Tamatama la kawriva, ‘Amaniaku kudra hakegakegaisu ka Yesu. 16Ngidrakala, si acegecege! Kai adrelaneli muswane, lri tusasiakawlaku muswane si sikawlu muswane. Lri akasisu kaikameane sanaka drelesu kai la pangwakai nakwane si lubibilrili ku lrika apelaelaneli muswane ku awngane. 17Lri patwaladhaku ki alrima ki swa Iseraylri si sakamaelanane ka umawmase palribulu muswane, lai sikawlaku muswane pamwa liniane. 18Lri pamanumacasu ku maca lini, ku lrika atwaladhane lini ki kadradridrimitane ngibangulu papia ki kalealedrane, twalai ki puku ki Satange papia ki Twaumase, ku angukaiyane ki salrwane lini nakwane si kipacepe ku pasalrivane, lalri ikainga ku tasakaiyane lini ikai kudra ki pinilriane ki Twaumase ka laumawmase.’ ”

Ku Pawru peaelaela ku awnganeini

19“Ngwalai kikai, Ageripa ka talialalai, kainaku ka pathaele ku twalai belenge ku sapelaelane ka maburusi. 20Paswalaku ikai Damasekuse si Yerusalrime, ala palraelreaku ki swa Yuda si sakamaelanane ka umawmase pasapukwanaku liniane ku atara ngitatupelane, si papia ki Twaumase, ku tatwatumanane ku tangivelevelane ku amasasudalepane ku tangitatupelane ki kidremedreme. 21Ngwalai ku tangimiamiane kai, sa idaanaku ki daane ki Twaumase, kai swa Yuda ka laumawmase la ruthuku nakwane, si kisanu papacai nakwane. 22Ai, pakela kaikameane, la kiparalubaku ki Twaumase, la maka dulrwaku acegecege ikai kai si papia sanaka matiausakene si matiatudrekase ka laumawmase akasikasi. Kai kawrivarivali mialri ka amani kudra taiyane ki yuginsia si Musi kudra lrika angimiane mutaluvaivai lukabibilrili. 23Amani kudra, ku Kirisitu lri tara kikabebetethe, si lai ka aswalalanga twalai ki wapacai sielane, la papia ki swa Yuda si sakamaelanane ka umawmase pelaela ku sapalribulane ka ledra ala ka wakelanga.”

24Ku Pawru paiya kikai ngipapalakebe kawriva, ku Huisetu la akwadrau tawtau iya kai iniane, “Pawru, amamamangasu, kai lrigilanesu paamamanga muswane!”

25Ku Pawru la iya kai, “Marudrange ka Huisetu! Kainaku amamama, kai kawrivarivali patengatengane kadrwa ku nidraedrangelrane. 26Talialalai la mialrisu thingale kilakikai, lakamani ku kagarangeli cungucungu kawriva ki talialalai, masalrwaku ki talialalai ka kiararaketenga patuelre. Asi lwiyane kilakikai minathingathingalane ki laumawmase. 27Ageripa ka talialalai, masalrusu ki yuginsia? Wathingalaku ala ka masalrusu!”

28Ku Ageripa la kawriva ki Pawru iya kai, “Lu kidremedremesu sana kawrivaku pasapukwane ku tikiyane lri a Kirisite amiasu nakwane?”

29Ku Pawru la tubalre iya kai, “Adravane kakalra ka bekelane ku vagali, ku kitubitubili papia ki Twaumase, kusu si kaikameane kai la yakai kai kilalalalra kai la kawrivarivali kai laumawmase, ani mia nakwane makanaelre, ai madha twalrau nakwane mailuku kai kicikici!”

30Ku talialalai, sutuke, Berenike, si drumane ka laumawmase la makitu ngidrakale acegecege. 31Kwini lalasu sa katwasenga, la maiyaiya kai, “Kai umawmase kai, kadrwa ku pasalriuini ku manemane ku naika akipapacadhane ku naika akiemengane ku pasalrivane.” 32Ku Ageripa la kawriva ki Huisetu iya kai, “Kikai umawmase kai, ana kai papia ki tinuhika ki swa Ruma sidruru nai pakatuasenga madu.”

Currently Selected:

Nisikawlane 26: NDV

Highlight

Compare

Copy