Nisikawlane 28

Taikaiyane Maleta ka vuvugu

1Sakipalribulunga nai ubila si tabelenge wathingale nai ala ka sia Maleta kwini vuvugu. 2Ku la swakai kwini ki vuvugu ka laumawmase kialibake naiane turamuru. Sakamani kwidra la ngwalai sa udawdale, la nakakeecelrenga, kwi lalasu la twapui si pasudalru naiane. 3Ku Pawru la siludu ngulrepelrepe ku angatu si kainganai pwa ki apwi. La ikai ku vaeva ku siduduku ka sulrau ku kai wabeserenga ki culwane la kainganai mutaluvaivai si kalriti ki alrimaini. 4Kwini swakai kwini ki vuvugu ku laumawmase la drele kwini ki sulrau sangitakilili ikai ki alrima ki Pawru, la makitu maiyaiya kai, “Kikai lasu lri tara ka pasalriu papacai ki umawmase, kiapalribulu twalai ki laveke, ai ku yabelenge kai palraingi papanianiake iniane.” 5Ai ku Pawru wamalra visivisi kwini ki sulrau pwa ki apwi, la kakadrua ku takatumanane. 6Mwakalava makanaelre si drele ki alrimaini lu ubalrake, adravane alau lri tubakebake si pacai, ai sakawlainga ukalava, kai maka wadrele ku takaelaneini, kwini lalasu la kirimu akabalrithi ku takidremedremane lini si iya kai, “Kai lasu twaumase.”

7Yakai ku wadeethe kwini ku kadaengane ki mabelenge ki swakai kwini ka sia Pubeliu. Kiadredresenge naiane, si pasudalru naiane makatulrulu. 8Kwidra tama ki Pubeliu la icengecenge kipakilringau kacaeme kaculu si pakacelau, la apece itapeapecane. Ku Pawru la mwa ki tapeapecaneini si pasikai iniane inulri, ansu, si pawdringainga iniane. 9Sangimianga kwini, ku la swakai kwini ki vuvugu ku lamacaeme ku laumawmase la makitu kela si kipawdringai. 10Kwini lalasu la baai naiane ku saceacebe, sa lri katwasenga ku varukuru ku lrika satumatumane nai la satedre pwa ki varukuru.

Twalai Malita kela Ruma

11Sangilribatenga ku tinara tulrwane ka dramare, la mubelenge nai kudra ki vaeva ka varukuru ka twalai Alikesangeda kainganai, kudra nagane ki varukuru sia “Pudradrwadrusa ka twaumase” amia, ka yasadra ikai kwini pangilribalribate ki kalakecelrane. 12Kudra varukuru sadaruru Siraku la ikai nai kwini makatulrulu. 13Ala katwase nai si daruru Rigiume. Sakakaiyane la singi tali lrawdru ku valrigi, la makapusale nai ala daruru Putiuli, 14ikai kwini la kipadradresenge nai ki laretesaneta, la kitubi naiane ku aikaiyaneana nai kwini makapitulu. La pangimia nai kwini ala daruru nai Ruma. 15Ku lasinzia ikai Ruma sa kilalra ala ka wadarurunga nai kwini, la kainganai mwa Siwbai ka Apiu si Tulru Inise kidredresenge naiane. Ku Pawru sadrele liniane la kiaseasene ki Twaumase si aru sapukwane.

Ku Pawru yakai Ruma

16Sakelanga nai Ruma la kipalraingi ku Pawru, tadrusa kwini ki tarakadrekadrenge iniane kitukudha ikai talidrumane.

17Sangilribatenga ku minaka tulrulane, ku Pawru la kelrete ku zikange ku akikawrivane ki marudrange ki yakai kwini ki swa Yuda. Sakelanga kwini lalasu ku Pawru la kawriva, “Laretesane, kadrwa ku pasalriuli ki sakacekeleta, ku baebalreli ki kakwakudhane ki cucungulaneta, ai waemenge nakwane pikai Yerusalrime, si malra nakwane baai ki swa Ruma. 18Kwini lalasu la saibange nakwane, ai kai maka kiadringai ku atakaiyane tupasalrivane nakwane si papacai, la kidremedreme ku apawlatadrane nakwane. 19Ai kudra swa Yuda ku laumawmase pakaicilri, laiyasitumane la iyaku si kamani ku sidruruli papia ki tinuhika ki swa Ruma, ai kainaku ka twalilisi ki sakacekeleli. 20Ngwalai kikai, lakamani ku kitubili nau kikawriva iyali numiane. Kai kiparaisili kai kicikici, ngwalai kudra ki tangea ka sidramadrama ki swa Iseraylri.”

21Kwini lalasu la iya kai ki Pawru, “Patharukai muswane kadrwa ku tarumara nai ku tigami ku twalai Yuda ku watumane amia muswane, laka kadrwa ku retesaneta ku twalai inu kela si pelaela watumane iya tulilisi muswane. 22Ai, apia kilalalra nai ku kidremedremesu, asi lwiyane, wathingale nai, kwini kisusususu yakai kidruanga kibaebaebalre ki laumawmase.”

23Lakamani, kwini lalasu makaketekete ki Pawru ku airubwane ku vai. Sakavai kwini ku wakela mwa ki taikaiyane ki Pawru ku laumawmase takalra turamuru, twalai sakamialrealre pakela sakamaungu, ku Pawru la pelaela palalrwai liniane patharukai ki kuni ki Twaumase. La malra kudra hulrice ki Musi si kudra pacase ki yuginsia, ku lrika akasalrwane lini ki Yesu. 24Patharukai kwini kawrivariva ki lasu, yakai ku masalru, yakai ku kai masalru. 25Kwini lalasu kai wadulru maramaramau palraingi, la masivavagai. Sa kaina masivavagai, ku Pawru la iya kai akuvaale kawriva, “Ku tapangukaiyane ki Siri ki yuginsia ka Isaiya kawriva ki cucungulane numi kai pasalriu! 26Ku Isaiya amia kai:

Lu pelaela kikai ki lamapapangale:

Kialalranga numi la peela kilalra, la kai numi pulringalringau,

wadrelenga numi, la peela drele, la kai maka drele.

27Asi lwiyane kikai lamapapangale makulrungulriinga ku kidremedreme,

kai lalasu wacelrepe ku calringa lini,

wamemecane ku maca lini.

Ana kai ngimia kwini, kwi maca lini nai dulru drele,

ku calringa la nai maka kilalra,

la pulringalringau ku kidremedreme, si ngibangulu ku takidremedremane,

la nai pawdringadhaku liniane.”

28La iya kai ku Pawru, “Lakamani kunumi thingala, ku sapelaelane ku sapalribulane ki Twaumase wadarurunga ki sakamaelanane ka umawmase. Kwini lalasu alau lri kilalra kamani!”#28.28 Yakai ku lasidrumane ka hungu ku wadrima kai mwasaka 29 ka vaga “Kwini lalasu samaka kilalra kwini lavaga, kudra swa Yuda ka laumawmase la makitu madrikidrikisi ku vaga si masivavagai.”

30Ku Pawru yakai kwini ki takisalrwaneini ku daane taradrusa ka caili. Sanaka wakela lrikape la pasudaalru. 31La kagarange pelaela ku patharwakai ki kuni ki Twaumase, bulrubulru ku patharukai ki Tamatama ka Yesu Kirisitu, kadrwa ku manemane ku kiruruthukuini.

Currently Selected:

Nisikawlane 28: NDV

Highlight

Compare

Copy