Nisikawlane 25

Ku Pawru siadruru ki tinuhika ki swa Ruma

1Ku Huisetu saka samakatulrulu ku takicapilane, twalai Kaisaria katwase mudradha mu Yerusalrime. 2Kudra marudrange ki barakalai si kudra taramasasangililuku ki swa Yuda la papia iniane kukusu ki Pawru. Kwini lalasu kiatubi ki Huisetu, 3kiatubi iniane ku asatedrane ki Pawru pwa Yerusalrime, asi lwiyane kwini lalasu kiadremedreme ku aikaiyane lini kadadalranane lepenge si papacai iniane. 4Ku Huisetu la tubalre liniane, “Kikai kai Pawru kiaemenge ikai Kaisaria, lri kainaku tarathainu lai siwlriaku mwa kwini. 5Kudra taramasasangililuku numiane kai lri katumane lu tupalra nakwane mwa, alaiyasi kwini umawmase, lu ikai ku kaika tapangimiane ki kakwakudhaane ku kakudhaneini, pikaiyanga kwini kukusu iniane.”

6Ku Huisetu ikai liniane kwini la ikaiyana kau makamangeale ku makavalrulu, ala katwase siwlri mu Kaisaria. Sakakaiyane kwini lasu la saibange, la drekase mailuku ki Pawru. 7Ku Pawru la kela, kudra la twalai Yerusalrime kela ku swa Yuda la ngithalringulu acegecege, la arakai ku makaalra ku pinakilringavane tupasalrivane kukusu iniane, ai yadrepele ka kadrwa ku maka pwataluvaivai ku sapasudalepane. 8Ku Pawru la ngipapasikai ngilalakebe, iya kikai, “Kadrwana ku tapianeli sanaka maneemane ku wabaebalre ki hulrice ki swa Yuda, si tudreadrekase ki daane ki Twaumase, la kainaku pasalriu ki tinuhika ki swa Ruma.”

9Ai ku Huisetu pakai ku akikadadalamane ki swa Yuda, la kivaga ki Pawru, “Kusu palraingisu mudradha mu Yerusalrime, si ikai kwini tarumara ku sasaibanganeli patharukai kikai?”

10Ku Pawru la iya kai, “Kikai acegecegenga naku ikai ki tasaibaibangane ki tinuhika ki swa Ruma, kikai amani ku naika akisaibanganeli ikai, adravanesu wathingalesu, kwaku kadrwana ku tapasalrivaneli ki swa Yuda. 11Alaiyasi pasalrivaku ki kakudhane, si ikai ku manemane ku tapasalrivaneli ku naika akipapacadhane, lri kainaku mubere kwini ki nasapathavunganenga. Alaiyasi kai lalasu ku takukuswane lini nakwane, la kaika tangimiane patuelre, kadrwa ku aneane ku lri maka dulru malra nakwane si patarumara liniane. Lri papiaku ki tinuhika ki swa Ruma sidruru.”

12Ku Huisetu taelre ki tarakikaikake ki kwapingi samapelaelanga, la iya kikai, “Sana lri papiasu ki tinuhika ki swa Ruma sidruru, katwasa mwa ki tinuhika.”

Ku Huisetu peaelaela ki Ageripa ka talialalai ku patharukai ki Pawru

13Sangilribatenga ku kaika minakapialaneana ku vai, ku Ageripa ka talialalai si Berenike kaiyanganai mu Kaisaria kidredresenge ki Huisetu. 14Sa ikai kwini ku minakapialane ku vai, ku Huisetu kudra patharukai ki Pawru la pelaela ki Ageripa ka talialalai iya kai, “Ikai kikai yakai kai tangea kai umawmase, ka suru ki Huilikese ka tinupasalrivane, si itaememengane. 15Ku paswalala sa mwaku Yerusalrime, kudra swakai kwini ku swa Yuda ka marudrange ki barakalai si laciwru wakukusu iniane, si kitubi nakwane ku atupasalrivanane iniane. 16La pelaelaku liniane, lu singikaiyane ku kakwakudhane ki swa Ruma, ku kiapukunkwane lu kai ikaiyana maicubungu kudra ki lri pukunkwane, laka kadrwana ku tapikakwane ngipapasikai ngipapalakebe kawriva, kai madu lri maka dulru turingaringau tupasalrivane la iyaku. 17Kwini lalasu sakelanga makanaelre, kainaku pasalriu ki zikange, sakakaiyane la pathagilinga naku saibange, la drekasaku ku apulatadrane kwini ki lasu. 18Kudra nawakukusu la makitu acegecege si kawriva tulisi iniane, ai ku nikukuswane kai ngiamia kudra ki kidredredremeli ku satupasalrivanane. 19Kwini lalasu si kwini lasu ku maiyaiya lini makalilisi patharwakai ki takisuswane ka mendai, si kudra tangea ka sia Yesu ka umawmase, kai umawmase kai wapacainga, ku Pawru panianiakeana la iya. 20Patharukai kikai ki mendai, kainaku wathingale ku apangitumanane marasikai. La kivagaku ki Pawru lu palraingi lutumane mudradha mu Yerusalrime, si ikai kwini kisaibange. 21Ai, ku Pawru kiatubi ku akipasurane, si kisaibange kamani ki tinuhika, lakamani ku drekaseli si pasurwana pikai taememengane iniane, pakeela ku takipulatadraneini si mwa ki tinuhika ki swa Ruma.”

22Ku Ageripa la iya kai ki Huisetu kawriva, “Adravanaku maiyalriaku apikilalalra kai ki lasu lu kawrivariva.”

Ku Huisetu la iya kai, “Ku lri kilalrasu iniane lwiya.”

23Sakakaiyane, kudra Ageripa si kudra Berenike la masasipapedrengane, si matipalrelreme kainganai mwa kwini ki takikawrivarivane ki badhabadha, la tupapalra iniane ku kiacapili ki takudrulu ka kwapingi si kudra kiamusakesakene ki cekele. Ku Huisetu la drekase akuvale, ku Pawru la kimailuku kainganai. 24Ku Huisetu la kawriva, “Ageripa ka talialalai si kunumi ka la wanene ikai kai! Drela kai ki lasu, kai lasu amani ku kukusu papia nakwane ki yakai kaika swa Yuda si yakai Yerusalrime, si kitubi ku apapacadhane. 25Ai, kainaku maka kiadringai ku piaini ku manemane ku pasalrivane ku naika akipapacadhane, adravane kai lasu lri papia ki tinuhika sidruru, ani papia kwini kamani la iyanga naku. 26Kai ngwakai kikai ki lasu kadrwa ku maka malalrwai ku maka pacaseli si pelaela ki tinuhika, la kamani ku ilukuli iniane pucucubungu numiane makanaelre, inilringa icucubungu ki Ageripa ka talialalai, alau lri ikai ku malalrwai ku kidringai lini ku lrika sapelaelane lini. 27Asi lwiyane ku tadrelaneli lu satedreta ku kiatupasalrivane, la kai ikai ku malalrwai ku pacase luka ngwalai ki manemane kai pacengecenge amiaku.”

Currently Selected:

Nisikawlane 25: NDV

Highlight

Compare

Copy