Nisikawlane 24

Ku swa Yuda wakukusu ki Pawru

1Sangilribatenga ku minaka lrimalane, ku abebeelengenga ki barakalai ka Anania si kwidra laciwru, maredele kwidra ki tangea ka binkusi ka sia Teretulu, kainganai kela Kaisaria. Kwi lalasu la icucubungu ki sutuke ka Hilikese kukusu ki Pawru. 2Ku Pawru la kidawlu putasaibaibangane, ku Teretulu la kukusu iniane si iya kai:

“Huilikese ka marudrange! Ngwalai ki lrigilanesu rathudu, la dulru nai kisupilri kawlai kasulivalivate, kai kuni la tupelanga ku tangilisianane. 3Papia ku tarathudanesu si pakaesai naiane, lri kiaseaseasene nai muswane sikakathane. 4Kainaku wathuru palribate upungu muswane, lri kitubiaku sikakathane ku akicacaligiranesu kai edrekane kai kukusu nai. 5Wadrelenga nai patakulringau, kai umawmase kai, matiaukuludru ku takaumawmasaneini. Kai lasu salraelrelre kawmasane ki swa Yuda si beabekace ku angilrithavulane, la kamani ku tamatama ki Nazarethekiu, 6adravane ka daane ki Twaumase twadreadrekase, la malra nai ruthuku iniane.#24.6 Kikai vaga nidrimane ikai ki drumane ka sidrumane ka hungu, “Taarakai ku hulriceta si saibange iniane naamia nai, 7 kai nai wathingathingale ala kela kithathengete ku tabebelenge ka Lrisia, si patwalai ki alrima nai malra ribici iniane, 8 si drekase ki lawakukusu kela kikai makanaelre.” 8Ani kivavaga kai ki umawmase lri pulringalringawsu patuelre ku tatakaiyane nai kukusu iniane.” 9Ku yakai kwini ku la swa Yuda la mialri maramaramau ku vaga lini makanaelre kukusu, lu kidremedreme kwini taiyane patengane patuelre.

Ku Pawru ngialalakebe kawriva

10Sakamani kai kwidra, ku sutuke papia ki Pawru si tangelre ku awlru, ani kawriva iya iniane. Ku Pawru la iya kai, “Wathingalaku ala ka tarasaibaibangesu ikai kai ki kuni kawlainga ka caili, ngwalai kikai, mwabangalraku ikai cucubungu muswane pelaela ngipapalakebe. 11Kaisu lri pakakucingalre kilalrwai, twalai kudra takatwasaneli mwa Yerusalrime drihai pakela kaikameane maka 12 ka vai. 12Kwini lalasu kadrwa ku wadrele nakwane sa ikaiyaku ki daane ki Twaumase lu madradrikidrikisi nai ku vaga ki naneaneanenga, ka kadrwana ku wadrele nakwane pikai rarubwane ki swa Yuda si lacekele ki natali drumaanenga lu pangiracuracukaku ki tapangale ka laumawmase. 13Kwini lalasu kai lri maka baai muswane ku sakukuswane lini ku pacase nakwane. 14Ai, yakai ku taingeane ku patengane aiyaneli, singiakaiyaku kwidra ki maelane ka kadalranane ku takisusu iya lini, si kainganai sukusukubu ki Twaumase ki cucungulaneta. Maiyalriaku kasalru kudra tuhulrice ki Musi si kudra pacase ki yuginsia patuelre. 15Papia ki Twaumase piakaiyaku ku thadalrane liniane kudra sidramane, ka sidrama ki sanaka umawmase, anika mathariri ka manganga, lri tara sielane twalai ki wapacai. 16Lakamani, ku tangipapasapukwananeli, ikai cucubungu ki Twaumase si umawmase, ka tapikaiyaneli ku alrivilrivi ku takidremedremane.

17“Ku takatwasaneli Yerusalrime lri ikainga kau la tara piya ka caili. Kai akatwasaneli siwlri mudradha mailukaku kai sapalribulane ka paisu ki sakacekeleli, si takupatarumara ku sapatarumarane. 18Kai lalasu sadrele nakwane pikai ki daane ki Twaumase, maka ngiatatulrisinga naku pakabula, la icengecengengaku patarumaramara, kainaku paiyaruburubu ki laumawmase, la kainaku rivurivu pakalrithavulu. 19Ai yakai ku tapiya ku twalai tali Asia ka swa Yuda ku yakai kwini, kikai laumawmase alaiyasi ikai ku akukuswane nakwane, nai kamani ku mwa cucubungu muswane si kukusu. 20Lu kai ngimia kwini, putaluvaivadha kai ki yakai kai ki laumawmase, sa ikaiyaku ki takaigigiane pelaelaela luka yakai ku pasalrivaneli ku kakwakudhane. 21Sa acegecegaku icucubungu liniane kathane ku yakai ku takwadravaneli avavaga ku niakuvalane, amani kwini, ‘Kaikameane kai kisaibaibangeli numiane, ngwalai kwidra ki siaela panianiake ku wapacainga ku umawmase niyane.’ ”

22Kai Huilikese papia kai ki kadalranane nawathingale turamuru, la isadra ku akilalrane, si iya kai liniane, “Taukalavana lu kelanga kudra taradrekase ki kwapingi ka sia Lrisia, ala nau pasikai numiane turingaringau.” 23Kwini lasu la drekase kwini ki mabelenge ki kwapingi kadrenge ki Pawru, si tubadhabadha iniane, la palraingi kwidra ki latalragilragini lu kela baai ku murikaini ki vaivai.

Sa icucubungu ki Huilikese si Durusila ku Pawru

24Sangilribatenga ku minaka pialane, ku Huilikese si labaibaini ka swa Yuda ka sia Durusila maredele kela. Kwini lasu la dawlu ki Pawru, lri kilalra ku salrwaneini patharukai ki Yesu Kirisitu. 25Ku Pawru la kawrivana ku ngwakai ki makalecege, ngiararuthuku, lukabibilrili ku asaibangane ku lamiyaiya kai ku sabulrwane. Ku Huilikese la kirimu mukuludru, la iya kai ki Pawru, “Lu katwasanga kaiasasane, lu picugunga naku nau dawlunga muswane pela.” 26Kwini lasu la murikai ku abaadhane ki Pawru ku paisu iniane, lakamani ku tadawdawlane iniane, si makakawrivariva iniane.

27Sangilribatenga ku tinara drusane ka caili, ku Pureciu Huisetu la ubalrithi ki Huilikese, si asutuke. Ku Huilikese la pakai ku akikadalamane ki swa Yuda, la tusakamiya ki Pawru pasuru pikai taememengane.

Currently Selected:

Nisikawlane 24: NDV

Highlight

Compare

Copy