Nisikawlane 23

1Ku Pawru la lengethe drele kwidra ki yakai takaigigiane ki laumawmase, si iya kai, “Laretesaneli, ku takaumawmasaneli ikai kawmasane, icucubungu ki Twaumase ku takidremedremaneli alrivilrivi, pakela kaikameane.” 2Ku abebeelengenga ki barakalai ka Anania la pelaela kwini ki taratupapalra ka sasiakawlu pwa lrumai ki ngudui ki Pawru. 3Ku Pawru la kawriva iniane iya kai, “Kusu ka pinaderavane pangiragelane ka balingibingi, ku Twaumase lri sititi muswane! Kusu inenesu ikai kwini si pangukai ki hulrice saibange nakwane, ai wathaelesu ki hulrice, si kawriva liniane sititi nakwane!”

4Kwini taratupapalra ka sasiakawlu la iya kai, “Kusu twamwamulrace ki abebeelengenga ki barakalai ki Twaumase!”

5La tubalre ku Pawru iya kai, “Lasakacekeleli, kainaku wathingale aka abebeelengenga ki barakalai kwini lasu. Ku Sisiu amianga kai, ‘Madha tulilisi ki taramarasikaikai ki mapapangale ka tabebelenge.’ ”

6La thingale ku Pawru kai ki iyarubu ka laumawmase yakai ku la swa Sadukise yakai ku swakaikai ki Palrisai. La akwadrau ikai ki takaigigiane iya kai, “Lasakacekeleli, kwaku swa Palrisaiaku ka umawmase, ka lamwabaibalrithi ki swa Palrisai ka umawmase. Kaikameane kai kikivavavagali ngwalai ku sidramadramali ku asielane ki wapacai ka umawmase!”

7Sa iya kwini akuvale avavaga ku Pawru, ku swa Palrisai si swa Sadukise kiarimu makaririvu, la mialri ku mapapangale mau drusa. 8Asi lwiyane ku swa Sadukise kai kiapawtenga ki siaela, si kai kipawtenga ka yakai ku sasiakawlu belenge si ri, ai ku swa Palrisai kiapawtenga patuelre kwini ki taitulrwane. 9Sa aru akwadradrau ku tamagagiringane ku lingau, la ikai ku la swa Palrisai ka tarabulrubulru ki Sisiu ku acegecege, si pangicaeme kiecebe kawriva, “Kai nai maka kiadringai ku atupasalrivanane kikai ki lasu! Lau patengane ku Ri ki Twaumase si sasiakawlu belenge ka peaelaela iniane!”

10Ku tamakalilisiane, la aru paramuraamuru, ku mabelenge ki kwapingi la mukuludru ki Pawru lu kimatulutuluthu ki lalasu, la drekase kwini ki kwapingini pamwa, si malra ribici ki Pawru patwalai ki laumawmase, si iluku mudaane takwapingane.

11Kwidra sakamaungu, ku Tamatama la acegecege ithili ki Pawru, si kawriva iya kai, “Masasigarangana! Ikai Yerusalrime pasiakaingasu nakwane akasi, lalri tungimiyaiyasu ikai Ruma akasikasi.”

Nimadrekadrekasane ka apapacadhane ki Pawru

12Saka samakapusale sakamialrealre, ku la swa Yuda yaelrelre madrekadrekase, si makitu kiketekete iya kai, lu kai maka papacai ki Pawru, takai kane kai ungulu. 13Kudra maramaramau kidredredreme tapapacai iya ki Pawru, ikaai ku tamasupatele si ikai. 14La katwase mwa ki marudrange ki barakalai si ki laciwru, iya kai, “Kunai kiaketeketenga nai, lu kai nai papacai ki Pawru takai kane sanaka manemane iya! 15Kaiasasane, kunumi si swa gikai kitubia ki mabelenge ka kiacapili ki swa Ruma, malra ki Pawru pwa kikai, la ngikadraedrangelra lri pudriadringai nai kivavaga ki Pawru iya; lri padulrunga nai pudriadringai, lu kaiyana daruru kai, la papacainga iniane.”

16Ai, kialalra kudra sawvalai ka lalakeini ki Pawru (lalake ki betakaneini ka ababai), kikai apapacadhane ki Pawru, la mwa takwapingane pelaela ki tamaini ka Pawru. 17Ku Pawru la dawlu kudra tangea ka kiacapili ki kwapingi, si cunu iniane, “Iluka kai ki ngwakathabarane mwa kikawriva ki mabelenge ki kwapingi, yakai ku apelaelane iniane.” 18Kudra kiacapili ki kwapingi la iluku kwini ki ngwakathabarane mwa ki mabelenge, si iya kai, “Amani ku Pawru ka kiatubi nakwane ililuka kai ki ngwakathabarane kikawriva muswane yakai ku aiyaneini muswane.”

19Ku mabelenge ki kwapingi tarwamara ku alrima ki ngwakathabarane si arake muthili, la kivaga iniane, “Manemane ku apelaelanesu?”

20La tubalre ku ngwakathabarane, “Ku la swa Yuda marathudunga ku akitubiane muswane, lwiya ani iluku ki Pawru putakaigigiane si tadraedrangelre ngikakivavavagane ki Pawru. 21Madha tuvaga si palraingi liniane, asi lwiyane, tamasupatele ku watakatakalre iniane, ka lakiaketekete makanaelre, lu kaita papacai ki Pawru kaita lri kane kaita lri ungulu iya, la padulrunga si takatakalre la mukalavalava ku apalrainganesu.”

22Kudra mabelenge ki kwapingi la iya kai iniane, “Madha pathingathingale ki palrapalra aka peaelaelangasu nakwane kilakikai.” Ala pakatwase iniane.

Kiailuku ku Pawru patarumara baai ki Huilikese

23Kudra mabelenge ki kwapingi, la dawlu ku tadrusa ku kiacapili ki kwapingi, si apadrekadrekase kawriva, “Padulrwa ku ta 200 kudra ngwalalebe ka kwapingi, tamapitulu ku ngwarigi ka kwapingi, ta 200 ku siaidiri, kai maungu ki bangate ki tuki la papia Kaisaria katwase. 24La padulrwanga ku angukaiyane ki Pawru ku rigi, si sateatedra iniane pakela ki mabelenge ki tarakadrekadrenge ka Huilikese.” 25La pacase ku tigami ku mabelenge ki kwapingi, amia kai kudra tapacasane:

26“Kunaku ka Kelawdiu Lrisia wapacasaku kikai, patarumara muswane ka usakeneli ka mabelenge ka tarakadrenge ka Huilikese. 27Kai swa Yuda pwalra ruthuku kai ki lasu pasana papacai kai, la thingalaku ka umawmase ki swa Ruma kikai lasu, la mailukaku ki kwapingi mwa palribulu iniane. 28Nau pudriadringai thingale amiaku ka ngwalai ki manemane kudra kikukusuini, la kamani ku ilukuli iniane mwa ki takaigigiane lini. 29La thingalaku iniane ka kadrwa ku akipapacadhane ku naika akiemengane ku tapasalrivane. Kikai kukusu lini alau wacapili pangukai ki tinukakudhanane. 30Ala ikai ku wakela si pelaela nakwane kwidra madrekadrekadrekase ki swa Yuda tapapacai iya iniane. La makakaiyaku mukerenge iniane si satedre baai muswane, si apadrekadrekase kudra ki lawakukusu iniane mwa cucubungu muswane kukusu.”

31Ku lakwapingi la pangimia ku kipadrekadrekase lini, si iluku ki Pawru, takamaungu papia Anetipatirise. 32Sakakaiyane la siwlri kudra taradadavace ka kwapingi, si pakamaninga ki tarangurigi katwase satedre ki Pawru. 33Kwini lalasu sadarurunga Kaisaria, la baai patarumara kudra tigami ki mabelenge ki tarakadrekadrenge, si malra ki Pawru baai iniane. 34Ku mabelenge ki tarakadrekadrenge la silrigu kudra tigami, si la kivaga ki Pawru la ka swatalininu ki kadaengane, sa thingalenga ka ngwakai ki daane ki Cilikia, 35la kawriva iya kai, “Lu darurunga kai kudra la wakukusu muswane, nau marasikainga kikai pangukai muswane.” Sa iya kwini la padrekadrekase malrana ki Pawru emenge pikai ki daane ki Hirudi.

Currently Selected:

Nisikawlane 23: NDV

Highlight

Compare

Copy