Nisikawlane 22

1Ku Pawru amia kai, “Kunumi ka laretesaneli, kilalra kai lrika angipapasikaiyaneli kawriva.” 2Sa kilalra ku mapapangale ku taarakaiyane ku vaga ki swa Hiburu kawriva liniane, arwa isaselebane ku laumawmase. Ala pacungulu kawriva ku Pawru iya kai:

3“Kwaku swa Yudaku ka umawmase, ka kiatulalake ikai Tarusu, ka swa tali Cilikia, la kadravaku ikai Yerusalrime la kibulrwaku kicawcakwane ikai ki Gamalile kipalalrwai turamuru tarumara ku twalai ki cucungulaneta ku tinukakudhanane, mia numiane ku sakiasamwamulali pasikai ki Twaumase. 4Nawahakegadhaku ki pangiamiamia kikai ki kadalranane ka laumawmase, si papacai liniane. La pwalraku kudra ki sawvalai ki ababai ka sinzia, malra liniane putaememengane. 5Ku abebeelengenga ki barakalai si kudra swa takaigigiane makanaelre lri dulru pelaela ala ka tengatengane kai iyali. Tarwamaraku ku tigami patwalai liniane ku abaadhane ki laretesaneta ka swa Yuda ka yakai kavai Damasekuse, la katwasaku mwa kwini, si lri pwalraku kwini ki laumawmase, la kerenge liniane, si iluku siwlri papia Yerusalrime pakai ku apakipathavungane.”

Tapelaelane ki Pawru ku takisuswaneini ki Yesu

(Nisikawlane 9.1-19; 26.12-18)

6“Sa kisamulamulaku si padethenga naku Damasekuse, saka mwalringedele, ala ikai ku pangiacaeme ka ledra ku twalai subelebelenge paledra ngithalringulu nakwane. 7Ala kirimwaku tubakebake mwa ki daedae, la kilalraku ku lingau ku amia kai nakwane, ‘Saule, Saule! Asu hakegai nakwane?’ 8La kivagaku, ‘Tamatama, aneanesu?’ La tubalre nakwane iya kai, ‘Amaniaku kwini hakegakegaisu ka swa Nazarethe ka Yesu.’ 9Ku lapapalrali wadrele kwidra ki ledra, ai kai kialalra kwidra ki takikawrivaneli ku lingau. 10La kivagaku, ‘Tamatama, ala lri tumanaku?’ La iya kai tubalre nakwane, ‘Ngidrakala si mucekele Damasekuse, yakai ku yakai kwini ku lri pelaela muswane ku lrika apakaungane muswane ki Twaumase patuelre.’ 11Ngwalai ki pangicaemane ki ledra, la kainaku maka cegenga drele la arake nakwane ku papalrali, si iluku nakwane mucekele Damasekuse.

12“Ikai kwini yakai ku tangea ka sia Anania, laka kiasamulamula, si pasususu ku tinukakudhananeta, ka kiamathingathingale ki swa Yuda ka yakaikai kwini Damasekuse si ka kiamusakesakene. 13Kwi lasu wakela drele nakwane, si acegecege ithili nakwane, si kawriva, ‘Saule ka retesaneli ani siwlrianenga cege kwi macasu!’ Sa iya kwini, la siwlriane kai macali, si drelaku iniane. 14La iya kai kwini lasu, ‘Ku Twaumase ki cucungulaneta wapilringa muswane, si la thingalesu ku takidremedremaneini, dulrusu drele ku dringelresane ka sapalribulane, si la kilalrasu ku lingau twalai ki ngudwini. 15Asi lwiyane lri pasikaisu iniane akasi, ku tadrelanesu takilalranesu, lri pelaelasu ki sanaka umawmasenga. 16Ala kikai, manemaneana ku kavangavangesu? Acegecega, kitubi ki naganeini, si kipabanau, ku lrika akabulane ki pasalrivanesu!’ ”

Kiasikawlu ku adindwane ki sakamaelanane ka umawmase ku Pawru

17“Sa siwlringa naku mu Yerusalrime, si inulriaku ikai ki daane ki Twaumase la kipadrelaku ku maburusi, 18ikai kwini ki maburusi la drelaku ki Tamatama. La iya kai nakwane, ‘Lu katwasa, kidaili Yerusalrime, asi lwiyane kai swakai kikai kai laumawmase kai lri tarumara kwini lrika apelaelanesu pasikai nakwane.’ 19La tubalreaku iya kai, ‘Tamatama, kwi lalasu wathingale makanaelre ku tapwalraneli talrumadhaneli ki la kiasusu muswane ka umawmase ikai ki rarubwane. 20Adravane sa kipapacapacai ku sasiakawlusu ka Setipane, yakaiyaku kwini, si palraingaku kwini ki tapapacadhane, si drangalrungalru ku laimai paralubu kwidra ki lagurucuki.’ 21La kawriva nakwane ku Tamatama, ‘Mwa! Lri sikawlaku pwadaili muswane, lri mwasu kwini ki sakamaelanane ka umawmase!’ ”

22Ku laumawmase la kilalaalra ku taiyaiyane ki Pawru. Kwi lalasu sakilalra kikai vaga la akwadrau karariau, “Kai lasu apapacadhane, mwalra iniane! Papacadha iniane!” 23Kwi lalasu la takukarariariau, si takuvereverevere ku laimai, cabwabungu ku dae. 24Kudra taraililuku ki kwapingi ka swa Ruma, wadrekase ku ailukane pudaane ki takwapingane ki Pawru, si palrumai ki kwapingi iniane, la takupathavuthavungu si kivavavaaga iniane, lri silape luka ngwalai ki manemane ku akwadradrau kawriva ki laumawmase iniane. 25Kwi lalasu sa kerengenga si lri lrumai iniane, ku Pawru kawariva kwidra ki yathili acegecege ka abelenge ki kwapingi, “Papia kwidra ki umawmase ki swa Ruma, lu kai numi saibangeana la makakaai lrumai mamamwa ki kakudhane?”

26Sa kilalra kwini vaga ku mabelenge ki kwapingi, la makakaai katwase kikawriva ki tarasangililuku ki kwapingi, si iya kai iniane, “Lri pangitumanesu? Kavai yai swa Ruma ka umawmase!”

27Kwini abelenge ka tarasangililuku ki kwapingi la katwase kikawriva ki Pawru, si kivaga iniane, “Pelaelaili, swa Rumasu ka umawmase?”

Ku Pawru la tubalre, “Unu.”

28La iya kikai ku abelenge ka taraililuku ki kwapingi, “Arakaiyaku ku makaalra turamuru ku paisu, ala dulru aswa Ruma ka umawmase.”

Ku Pawru la iya kai, “Ngiamianga naku sa kitulalakaku.”

29Ala kwini lri pathavungu si kivavaga ki Pawru la makakaai muthili kivaga. Ku abelenge ka taraililuku ki kwapingi la mialri ukuludru, asi lwiyane wathingale ki Pawru ka umawmase ki swa Ruma, si la ka nawakerengenga iniane.

Yakai takaigigiane pelaela ku takivuthaneini ku Pawru

30Kudra abelenge ka taraililuku ki kwapingi, nau tara thingale ku takukuswane ki swa Yuda ki Pawru amia, ngwalai kikai, sakakaiyane, la mwalra ku sakerengane ki Pawru ku kicikici, la sarubu pataelre ki marudrange ki barakalai si swa takaigigiane, ala mailuku ki Pawru, si pacegecege iniane picucubungu liniane.

Currently Selected:

Nisikawlane 22: NDV

Highlight

Compare

Copy