Nisikawlane 21

Ku Pawru mwa Yerusalrime

1Samaka kipusawnga nai liniane, la nguvarukuru nai lecege mu Kuse ka vuvugu ka kadaengane, sakakaiyane la daruru nai Rudi, si twalainga nai kwini mwa Patara. 2Ikai Patara la ikai ku lri papia Puinicia ku vaeva ku varukuru, la mubelenge nai si katwase. 3Sa adrelanenga tali Saipuruse la lragau ngutali lrawdru si papia Siria, la ubila nai ikai Tayre, asi lwiyane kwini varukuru lri pulebe ku amece pikai kikai. 4La ikai nai kikai kipasilape ki lasinzia si taelre liniane makapitulu. Kwini lalasu la kipapukidremedreme ki Siri si kawriva ki Pawru ku kaika amwane Yerusalrime. 5Ai, palikainga ku taikaiyane nai kwini ku zikange, la pacungulu nai ku kadalranane nai, kwidra lasinzia si lataelrelre lini si lalalake lini la makitu sateatedre naiane pakela lrialringulu ki cekele. La makitu ikai ki babiabila ki laveke pidruru si inulrinulri. 6Ala mauvagavagai nai si mubelenge nai ki varukuru, la makitu katwase mubalriu.

7La pacungulu nai twalai Tayre si daruru Tulimai. Si kikawriva nai kwini ki swakai kwini ka laretesaneta si taelre liniane makavaale ki vai. 8Saka samakapusale la katwase nai kwini si mwa Kaisaria, la mwa nai ki daane ki Pilripi ka dindusi si ikai kwini taelre iniane. Kwini lasu amani kwidra tangea ikai kwidra ki tapitu ka pinilriane ka taraparaluralubu kipuawngane. 9La ikai ku tasupate ku lalakeini ku latawvailekelekete, la makitu kibaai ki Twaumase ku apelaelane ku vaga ki Twaumase. 10Sa ikai nai kwini makapiyale, la ikai ku tangea ku yuginsia ka sia Agabuse, ka twalai Yuda kela. 11Kwini lasu wakela drele naiane, la malra ku lakete ki Pawru si kerenge ki alrima si drapaleini la iya kai, “Ku Siri amia kai kawriva: Ku pilaketane lri kipikai Yerusalrime kikerenge ki swa Yuda, si baai ki lasakamaelanane ka umawmase.”

12Sa kilalra nai kwini vaga la taelre nai kwini ki swakai kwini kitubi ki Pawru ku kaika amwane Yerusalrime. 13Ai, ku Pawru amia kai, “Kunumi anungitha mia kikai tubi, pakasuburu ki kidremedremeli? Ngwaladhaku ki Tamatama ka Yesu, ani ikaiyaku Yerusalrime kikerenge, ani ikaiyaku kwini pacai akiragadhaneli.”

14Kai nai maka watumane iniane, la kataamengenga nai, si iya kai, “Ku takidremedremane ki Tamatama ani ngimiya.”

15La ikai nai kwini makapiyale ki vai, la suragele nai ku lawbubulu nai si mwa Yerusalrime. 16La tupapalra naiane ku twalai Kaisaria ku lasinzia, la ililuku naiane, mwa kwidra ki aswala ku takisuswane ka sia Menasune; ka swa Saipuruse la lri ikai nai kwini sulai.#21.16 “la ililuku naiane, mwa kwidra ki aswala ku takisuswane ka sia Menasune; ka swa Saipuruse la lri ikai nai kwini sulai” ku wahunyake madu iya kai “kwini lalasu wailuku ku tangea ka swa Saipuruse ka papapalra ki Manasune, lri ikai nai kai ki daane ki lasu la iya”.

Ku Pawru walrikape ki Yakubu

17Sa darurunga nai Yerusalrime, ku laretesaneta kiaragai si pasudalru naiane. 18Saka samaka pusale, twapalra naiane ku Pawru kikawriva ki Yakubu, ku laciwru ki kiwkai la ikai kwini makanaelre. 19Ku Pawru mwadringadringai numi la iya, ala pelaela patuelre ku takaungane pasikai ki Twaumase ikai ki sakamaelanane ka umawmase. 20Sa kilalranga kai lalasu la drengedrengere ki Twaumase, si iya kai ki Pawru, “Retesane, kwidra tangimiane miyaiya kikai, ikai ki swa Yuda yakai ku tapangale ku sinzia, kamani kwidra pangiamiamia ku padradrekase ki Musi. 21Kai lalasu ku kilalra lini wabulrubulrusu kwini ki yakai badhane ka swa Yuda ku acilriane ku padradrekase ki Musi ka tinukakudhanane, ku kaika apakigelregelrane kitulrisi ki lavavalake, ku mialri ku kaika apatupapalrane ku kakudhane ki swa Yuda. 22Kwi lalasu lri tara kilalra ala ka yakaingasu kikai lalri tumane nai? 23Kaiasasane lri singikaisu ku taiyane nai, kai yakai kai tasupate ka kiaketeketenga. 24Ililuka liniane, la karedele liniane katwase kitulrisi kibula, la ngitalikaiyane liniane baai ku paisu. Lu piasu kikai, kwi lalasu lri dulru kigulrugulru. Lu piasu kikai, lalri makitu thingale, kwidra kilalra lini ku pangukai muswane ala ka kaika tangimiamiane, lalri thingale ala ka pangiamiamiasu ku padradrekase ki Musi. 25Pangukai ki sakamaelanane ka sinzia, twatigaminga nai pelaela ku kaika akaneane sanaka nipatarumaranenga ki samiamiange ka akaneane, madha kanekane ku erai si nitherane ka nilapulapwane, la madha piapia ku apadralrane.”

26Ku Pawru la sangiluku kwini ki lalasu, saka samakapusale la karedele liniane kipakabula tulrisi. La mwa ki daane ki Twaumase si pelaela aliakainga ku akabulane ku vai, aukalavanenga ku akelane ki barakalai ku apasikaiyane liniane patarumara.

Ku Pawru yakai ki daane ki Twaumase kipwalra

27Sa lri tulrepenge ku minaka pitulane, wadrele ki Pawru sa ikai ki daane ki Twaumase kudra twalai Asia kela ka swa Yuda, la patata ki mapapangale ku apwalrane ki Pawru. 28La akwadrau kawriva iya kai, “Swa Iseraylri, bwala kirimwa paralubu! Kai umawmase kai wamwa kidruanga bulrubulru, ku akiecebane ki swa Iseraylri si tinukakudhanane ki Musi, si mialri kiecebe ki daane ki Twaumase, la thuru iluku ki swa Gurike mudaane ki daane ki Twaumase, si kudrulru kikai ki Alrivilrivi ka taikaikaiyane.” 29(Ku taiyane kwini amani ku tadrelane lini ki Terupimu ka swa Ipisu sa tupapapalra ki Pawru ikai ki cekele, lakamani ku Pawru ku waililuku iniane mudaane ki daane ki Twaumase iya.)

30Ala kirimu kathurivulu ku sakatucekelane, si makitu kainganai lailai isarubu la pwalra ki Pawru si ala saralidri pulatadre si kirarimu elebe ku lalrawlrawdru ki daane ki Twaumase. 31Kwini lalasu tapapacai ki Pawru sa iyaiya, kialalra kwidra abelenge ki kwapingi ki swa Ruma, ku takalrithavulane ki swa Yerusalrime. 32Kai abelenge ki kwapingi la makakaai sangiluku ki kwapingi si lakiacapili ki kwapingi si mwa kwini ki mapapangale. Kwini lalasu sadrele ki abelenge ki kwapingi, la isadra ku lrumai lini ki Pawru. 33Kwini abelenge ki kwapingi la mwa pwalra ki Pawru, si arakai ku kicikici kerenge iniane. La kivaga, “Kai lasu aneane? Manemane ku piaini?” 34Ikai kwini ki mapapangale amia kai ku drumane, amia kwini ku drumane kalrithavulu ku tangimiamiane, kudra abelenge ki kwapingi la kai maka thingale ku tangimiamianelringa, la drekase ki kwapingi malra ki Pawru pudaane ki takwapingane. 35Sa lri katwase ngukakai ki tataetaetale ku Pawru, kiamabulribulri ki kwapingi, pakai ku kaika akisititane ki tara rivurivu ka laumawmase. 36La kabibibilrili ku mapapangale, akwadradrau kawriva, “Papacadha iniane iyaiya!”

Ku Pawru ngiapapalribulu kawriva

37Sa lri kipudaanenga ki takwapingane, kawariva ku Pawru ki abelenge ki kwapingi, “Kai lri katumane lu akuvalaku muswane?”

La kivaga ku abelenge ki kwapingi, “Mialrisu thingale ku vaga ki swa Gurike! 38Kaisu kamani kwidra pakaapucu ki cekele ku paswalala, si sangiluku ki tasupate ka kudrulu si ubere muubulane ka swa Izipiti?”

39Ku Pawru la tubalre, “Kunaku swa Yudaku ka kiatulalake ikai Cilikia ka swa Tarusu. Ka umawmase kai ki kiamatikaikai ka cekele. Lri kitubiaku muswane ku apalrainganesu pakawrivana nakwane ki mapapangale.”

40Kwidra abelenge ki kwapingi la palraingi iniane, ku Pawru la acegecege ikai ki tataetaetale, si paicelrebe ki mapapangale. Sa isaselebenga ku mapapangale, ku Pawru ala kawriva arakai ku vaga ki swa Hiburu.

Currently Selected:

Nisikawlane 21: NDV

Highlight

Compare

Copy