Nisikawlane 20

Tanguselane ki Pawru lrikape mu Makidunia si Gurike

1Sa idrengerenga ku takaricivane, wasarubu ki lasinzia ku Pawru si pasapukwane liniane, takukipusau liniane, ala katwase kwini, papia Makidunia. 2La salraelre talikai kwini, si pasapukwane pakakecenge ki lasinzia, ala daruru Gurike, 3la taratulru ka dramare ikai kwini, ku Pawru sa kisanu katwatwase nguvarukuru papia Siria, la patarathingale ki swa Yuda ala ka kiasanu papacapacai iniane, lakamani ku kalrithethe ku angukakaiyane Makidunia siwlri. 4Kwidra twapapapalra iniane, yakai ku swa Berea ka lalake ki Pidruse ka sia Supatere, yakai ku swa Tisaruniki ka sia Arisetarekuse si Sikundu, si swa Derebi ka sia Gaiuse la ikaiyana ku Timuthi si swa Asia ka Tikiku si Terupimu. 5Kai lalasu aswalala katwase, si mukalavalava naiane ikai Terua. 6Sangilribatenga ku Tamwalrane ku sapawsemakane ka lrisi, la twalai nai Pilripi ngukai ki varukuru, la maka lrimale nai ala daruru Terua, la madredresenge liniane, si makapitulu nai sulai ikai kwini.

Bibiilrilinga ku talrikapane ki Pawru ikai Terua

7Saka Duyubi sakamaungu#20.7 “Saka Duyubi sakamaungu” ku wahunyake madu iya kai “Saka niciwbi sakamaungu”., yaelrelre nai, si kalringulringulu. Ku Pawru la papia naiane pelaela ku vaga ki Twaumase pakela ki kabiceacelrakane, asi lwiyane lri katwasenga lukakaiyane. 8Kwini nikai ka taikaikaiyane nai makalra ku nipadaladhane ka tatinakiane. 9Yakai ku sia Yutiku ka yacengecenge wanene ikai ki lribange, sa pacungulu kawrivariva ku Pawru, kwini lasu la kidulrunga, la kasipelrenge si ereke, la twalai ki sankai tuverevere, kwini lalasu la drakale iniane, la drele la pacainga kwini lasu. 10Ku Pawru la mulebe si gurapangane makabelenge ki kinawmasaneini, la kebere iniane, si iya kai, “Madha kawpungu, yakaiyana kai niakeini!” 11Kai Pawru la siwlri mubelenge la papipithingi ku pange si kane. La pacungulu kawlai kawriva, pakela ki maliare ala katwase. 12Kwini lalasu la alra kwini ki yacengecenge ka papanianianiake satedre putavanane, la makitu kasasa turamuru makanaelre.

Twalai Turua si mwa Militu

13Aswala nai ubelenge ki varukuru, si papia ka Asesuse, si padulru ikai kwini kidredresenge ki Pawru, kikai yai padrekadrekaseini, asi lwiyane amanini ka nau tinudadavace amia. 14La madredresenge nai iniane ikai Asesuse la kidredresenge nai iniane mwa belenge ki varukuru, si papia Mitilini katwase. 15La twalai nai kwini katwasenga nguvarukuru, samaka pusale la daruru nai balrealreanane Kiuse, samakatulrulu, la ubila nai ikai Samu, samaka supatele la kela Militu. 16Ku Pawru malrithethenga ku kai yasadra ikai Ipisu, amani lu ikai tali Asia si udailane ku vai. Kai lasu maracange ku asaramwane Yerusalrime, mwarikai ku adulrwane makanaswala ki Malrimale ka vai ka lrisi.

Tapasapukwanane ki Pawru ki laciwru ki swa Ipisu

17Ku Pawru siakawlu ki umawmase patwalai Militu silape ki laciwru ki Ipisu kiwkai, ku akelane lini kikawriva iniane. 18Sakelanga kwi lalasu, la kawriva ku Pawru liniane iya kai, “Wathingale numi, twalai satawkelaku Asia, watumanaku ku tataelreaneli numiane, 19ngiatatwalebeaku si alralreselrese pasikaikai ki Tamatama, la ngwalai ku tulilisiane ki swa Yuda si kipadradresengaku si ngilribate ku makaalra ku akipakicawcakwanane. 20La mialri numi thingale patuelre, adravane ikai rarubwane, ku yakai ki ladaane numi, lu pelaelaelaku bulrubulru numiane, sanaka lri pakaesai numiane, kadrwa ku puteatedrali. 21Adravane papia ki swa Yuda ki sakamaelanane ka umawmase, twakucingalraku pakipapawlringau liniane, ku lrika angitatupelane lini, ku apapiane lini ki Twaumase, si kasalru ki Tamatamata ka Yesu. 22Kaiasasane, pakai ku apasalaladhane ki Siri, lri mwaku Yerusalrime. Ikai kwini kainaku wathingale luka manemane ku akipadradresengane; 23wathingalaku sikakathane, ku Siri pathingale nakwane ikai ki cacekecekele, yakai ku taememengane si amatikurwane ukalavalava nakwane. 24Ai, pakai ku atulrepengane ku kipuawnganeli, si pangimia ku baai nakwane ki Tamatama ka Yesu ku awngane, amani ku apelaelane ku hukuingi ki migemi ki Twaumase yai, kainaku ngiatataulra kai niakeli.

25“Masasawlriwlriaku ikai numiane, si pelaelaela ku puku ki Twaumase! Kaiasane wathingalaku, twalainga kaikameane lri kai numi maka drelenga nakwane. 26La kamani, kaikameane twakucingalraku pelaela numiane, alaiyasi ikai numiane lu ikai ku mwarenere ki pasalrivane, kai yakainga nakwane ku pasalrivane. 27Asi lwiyane kadrwanga ku putedrali kai pelaela numiane ku kidremedreme ki Twaumase. 28Kunumi ngikakamania kipapawlringau, la dradrela pasikai sirapale patuelre ku sudralru ki Siri numiane. Lapwa ku kiwkai ki Twaumase#20.28 “kiwkai ki Twaumase” yakai ku lasidrumane ka hungu ku amia kai “kiwkai ki Tamatama”. ka amani ku nibalrithane pangukai ku tapacadhane ki Lalakeini#20.28 “nibalrithane pangukai ku tapacadhane ki Lalakeini” ku wahunyake madu iya kai “pangwakai ku tapacadhaneini”.. 29Wathingalaku, lu katwasenga naku, lri kela ku matiakiwcu ka tawpungu ubulane mwa kiibu numiane si pakadadula ki lakiu. 30Adravane ikai numiane, yakai ku lri beabekace ku drangelrane, si lrilrigili ki lasinzia katwase tupapalra liniane. 31Lakamani, kunumi kasimeameaca, si pulringalringau, ikai kai ki tinara tulrwane ka caili, ku tapangimianeli arakai ku lrese pivai pimaungu pakipapawlringalringau, si bulrubulru numiane ka tangeea.

32“Kaiasasane lri malraku numiane si baai sudralru pikai ki alrima ki Twaumase, si vagaini ka migemi. Lri dulru pakakecenge ki salrwane numi, si baai numiane kudra pasikaini ki umawmaseini padulrudulru ku akaesadhane. 33Kadruana ku karauli ki naaneeanenga ku kingi gingi si laimai. 34Wathingale numi makanaelre nakwane ka arakaikaiyaku kai alrimali kaungu, si la ngibababaadhaku, wabaadhaku ki papalrali ku urikai lini. 35Ikai ki makaelaela ka awngane wasurunga naku baai numiane ku atwalralravane numi, la pelaelaku numiane ku apiane numi kikai kisamula kaungu, si paralubu ki twaramuru ka umawmase. Pulringava ku taiyane ki Tamatama ka Yesu, amia kai, ‘Kudra wabaai makiraragai kudra ki tarwamara.’ ”

36Samaka iyanga kawriva kilakikai, ku Pawru la kisasilange liniane makanaelre pidruru si inulri. 37La tubi makanaelre, si kebere uma ki Pawru kipusau iniane. 38Kai lalasu ngwalai ku twalainga kikai kai lri maka drelenga iniane taiyaneini kawriva, lakamani ku tubi turamuru. Kwi lalasu la sateatedre iniane pubelenge ki varukuru.

Currently Selected:

Nisikawlane 20: NDV

Highlight

Compare

Copy