Nisikawlane 19

Taikaiyane Ipisu ki Pawru

1Sa ikai Kurintu ku Apuluse ku Pawru mwa babadhane ngukakai tali lregelrege, la kela Ipisu ikai kwini, la kipadradresenge ki lasinzia, 2la kivaga liniane, “Sa kisusu numi ki Tamatama, kai numi tarwamara ku Siri?”

Kai lalasu la tubalre iya kai, “Kai nai kialalrana ku yakai ku Siri ku amia.”

3Ku Pawru la kivaga, “Lumia kwini, ku tarumara numi laka manemane ka sapabanavane?”

Kwi lalasu la tubalre, “Sapabanavane ki Yuhani.”

4Ku Pawru la iya kai, “Ku sapabanavane ki Yuhani pasiakai kudra ki langiatatupelanga ku umawmase, la pelaela ki swa Iseraylri ka laumawmase kasalrwa kudra ki tangea ka bibilrili iniane kainganai ka Yesu.”

5Kai lalasu sakilalra kikai vaga, la pangukai ku nagane ki Tamatama ka Yesu kipabanawnga. 6Ku Pawru la ansu liniane, ku Siri la mulebe ikai ki kinawmasane lini, kai lalasu la kirimu kawriva ku vaga ki ngwakai ki Ri, la pelaelana ku vaga ki Twaumase. 7Kai lalasu lri ikaai kau ta 12.

8Waedeede taratulru ka dramare, ku Pawru paiya ku tapiapiaaneini murarubwane ki swa Yuda, si kagarange pelaela ku vaga ki Twaumase, la kidrikisi ku vaga liniane patharukai ki kuni ki Twaumase, si pakalrumale ki umawmase pakisusu. 9Ikai liniane yakai ku la makelrathe kai mubangalre kipawtenga, ikai ki cucubungu ki mapapangale la pitaluvaivai tulilisi ki vaga ki Tamatama. Ku Pawru la iluku ki sinzia katwase liniane, lukakaiyaiya#19.9 “lukakaiyaiya” yakai ku lasidrumane ka hungu ku amia kai “lukakaiyaiya twalai ki mialrealre ki 11 ka tuki pakela ki miauawbu ki supate ki tuki”. la ikai ki tabulrubulrwane ki Tiranu madrekadrekase. 10Kikai miyaiya kaika awngane la pacungulu tara drusa ka caili, ngwalai kikai, sanaka yakai Asia ku umawmase, anika swa Yuda ka sakamaelanane ka umawmase, kialalra ku vaga ki Tamatama makanaelre.

Lalalake ki Sekiva

11Ku Twaumase pangwakai ki Pawru pia ku lamatiasamali ku pinangu Twaumasane ka puku. 12La ikaiyana ku umawmase ku wamalra ku arakaingaini ku sibini si tupi si sarare pikai ki kinawmasane ki macaeme, la mudringai ku macaeme, si la katwase ku aidridringane twalai ki kiaikai ka umawmase. 13La ikai ku la wamwa kidruanga tavuvuvulrucu, kudra tarapakatwatwase ki aidridringane ka swa Yuda mialri kisanu arakaikai ku nagane ki Tamatama ka Yesu pia kilakikai. Kai lalasu amia kai ki aidridringane, “Lri pangukaiyaku ku nagane ki Yesu ka amani kudra pelaelaela ki Pawru, drekase numiane mulatadra.” 14Ku paiyaiya kikai amani kwidra tapitu ka lalalake ki Sekiva ka marudrange ki barakalai ki swa Yuda.

15Ai, ku aidridringane la tubalre liniane, “Wathingalaku ki Yesu la thingalaku ki Pawru, ai, laka aneane numi?”

16Kwidra kiaikai ki aidridringane ka umawmase la mwa lredepe liniane, si dengece liniane la kadadula, si pakapapurici ku laimai lini, la kabakisale katwase mubere kwini ki daane. 17Sanaka yakai Ipisu ka la swa Yuda si sakamaelanane ka umawmase sa kilalra kikai, la makitu mukuludru turamuru, ku nagane ki Tamatama ka Yesu twalai kai la aru kiusakene. 18La ikai ku tapangale ku sinzia ku pathagili ngipapelaela carungucungane ku tangilribatane lini. 19Tapangale ku taraivigi ku mailuku ku hungu lini, la sarubu, si lama icucubungu ki laumawmase. Lu asipi paapaisu kikai lahungu ikai ku lrima ka kudrulu ka paisu. 20Ngwalai ki kai, ku vaga ki Tamatama la aru salraelre aru ngiradhekane.

Takaricivane ikai Ipisu

21Sangilribatenga kwini, ku Pawru la kalrithethe#19.21 “ku Pawru la kalrithethe” ku wahunyake madu iya kai “ku Pawru kiapadrekadrekase ki Siri, si kalrithethe”. ku ngwakai Makidunia si Akaia, si mwa Yerusalrime. La iya kikai, “Lumwanga naku kwini lai lri tara lrikapaku Ruma.”. 22La sikawlu ki tadrusa ka taraparaluralubu iniane ka Timuthi si Irasetuse, mwa Makidunia, ku Pawru la asurwana padaalru ikai Asia.

23Saicengecenge kwini, la ngwalai ki kadalranane ki Tamatama, la pakilringau kalrithavulu ikai Ipisu. 24Yakai ku taradarepe ki gingi ka sia Dimiteriwse, ka taratusamiamiange tuababai ka Aretemise; kai awngane kai pakaesai ki taradarepe. 25Ku Dimiteriwse la sarubu kai ki tarakawaungu si kudra sanaka thadaalrane lini ku kipuawawngane. La iya kai liniane, “Kunumi makanaelre wathingale numi kai ngiradhekaneta wasataluta kai ki awngane kai. 26Kikai kialalranga numi, la drelenga numi ki Pawru ka watumatumane. Kai lasu amia kai, ‘Ku niaralrimane ki umawmase darepe tutwaumase patuelre kaika twaumase.’ Kikai vaga kai ku swa Ipisu si swa tali Asia, kiasanu makanaelrelrenga kasalru. 27Lu drelane kikai awnganeta matiaukuludrunga kisanu kitudrekadrekase. Kai ngiamia kikai sikakathane, adravane kai biu ki madradrau ka Aretemise ka twaumase ka ababai lai mialri kitudrekase, ikai tali Asia si kiacaebe belenge kudra sukusukubu lini ka twaumase ka ababai ku lriguini lai mialri kikabebetethe!”

28Ku laumawmase sakilalra kikai vaga la arukudalai ku lisiane, si riariange iya kai, “Saniange turamuru kai Aretemise ka ababai ka twaumase ki swa Ipisu!” 29La ngiracukunga salraelre ki cekele. Ku laumawmase la ruthuku ki twapapalra ki Pawru ka tadrusa ka swa Makidunia ka Gaiuse si Arisetarekuse karedele mwa ki tasiavavavane ki iga. 30Ku Pawru la kisanu mucucubungu kwini ki yarubu ki mapapangale, ai ku lasinzia kai palraingi pamwa iniane. 31La ikaiyana ku latarasangililuku ka swa Asia, ka talragi ki Pawru la sikawlu ki umawmase madha ngikagagagarangane mwa iya ruthuku ki Pawru, kwini ki tasiavavavane ki iga iya ki Pawru. 32Kikai yakai ki tairubwane maapucu si kalrithavulu, thalrialriale, laka takakalra ku umawmase ku kai wathingale ku tairubwane luka manemane. 33Kudra la swa Yuda la drurudruru pucucubungu ki Alikesangeda, la ikai ku umawmase ku ikamani kai lasu ka kiacapili kai tangimiane kai amiya, ku Alrikesaneda la pubelenge ku alrimaini, nau avavaga palalrwai ki mapapangale iya. 34Ai, ku mapapangale sathingale kwini ki lasu ka swa Yuda, kiarimu masiasilange riariange, “Saniange turamuru kai Aretemise ka ababai ka twaumase ki swa Ipisu.” Iyaiya ngudrusa ki tuki.

35Sakabilrilinga, kwidra tarapacase kwini ki cekele wasasa paicelrebe ki mapapangale. La iya kai, “Kunumi ka swa Ipisu! Aneane ku kai wathingale ki swa Ipisu ka cekele ala ka amani ku wadrangalrungalru ki biu ki Aretemise ka twaumase ka ababai si kwidra twalai belenge mulebe ka niwsakenane ka lrenege? 36Kikai kadrwa ku umawmase ku wadulru ini iya ki kikai, kunumi icelreba, madha siupupungane ngivelevele. 37Wamalra numi iluku kai ki laumawmase pwa kikai, ai kai lalasu kadrwa ku kupa lini patwalai ki biu ku lamanemane, la kai tudreadrekase ki ababai ka twaumaseta. 38Alaiyasi kai Dimiteriwse si thadalradalraneini kipuawngane lu lri kukusu ki aneane, kudra yakai ku nikelretane ku vai ku asaibangane si lri kilalalra ku takukuswane ku abelenge, ku lri matubaebalrenga. 39Alaiyasi ikai ku drumane ku awngane, lai lri dulru ikai ki takaigigiane karathudu. 40Kai tamiane kaikameane kariciu, lri tara kikivavaaga nai. Kikai takarivwane patuelre kai pacengecenge, adravane nai kai nai wathingale iya ku tatwaladhane.” 41Sa iyanga kikai la pasivavagai ki mapapangale.

Currently Selected:

Nisikawlane 19: NDV

Highlight

Compare

Copy