Nisikawlane 17

Taikaiyane Tisaruniki

1Ku Pawru si Silra la pacungulu ku kadalranane lini, la ngukakai Amipipulise, Apulunia la kela mu Tisaruniki, ikai kwini la ikai ku rarubwane ki swa Yuda. 2Ku Pawru la pangimia ku tapiapianeini mudaane ki rarubwane ki swa Yuda, edede ka nisangutulrulane ka Taisadrasadrane ka vai, la pasingikai ki Sisiu si kidrikisi ku vaga kwini ki laumawmase, 3ku Kirisitu lri tara tarumara ku akipakwalriane ala lri twalai ki wapacai si sielane la iya swaceacenge palalrwai, la iya kai, “Kikai Yesu kai pelaelaelali numiane, amani kwidra Kirisitu.” 4Ikai kwini la ikai ku laumawmase ku kiapawtenganga, si ka papalranga ki Pawru si Silra, la ikaiyana kwidra wasukusukubu ki Twaumase ka swa Gurike si kwidra kiacapili ki lamaliali maiyalri kipawtenganga.

5Ai, kwini yakai kwini ka swa Yuda pathalra, la dawlu si sarubu kwidra ki gurucuki, ikai ki cekele pangiracuku ku akathurikicane. Kwini lalasu la mudaane ki daane ki Yasune pasanu pwalra ki Pawru si Silra, pakai ku abilibilane liniane baai ki taralrumalrumai. 6Ai sa kai maka kidringai, la bilibili ki Yasune si kwidra ki drumane ka lasinzia pwa ki mabelenge ki cekele, kukusu iya kai, “Taralrithavuthavulu kawmasane ka laumawmase, kaiasasane wakelanga ki cekeleta, 7si kai Yasune la tarumaaralringa liniane pikai ki daane lini! Kabebetethe kai drekase ki tinuhika ki swa Ruma, si iya kai, yakai ku tangea ku talialalai, ka sia Yesu.” 8Kilakikai vaga la pangiracuku pakathathiburu ki mapapangale si ki mabelenge ki cekele. 9Kwini mabelenge ki cekele la drekase ki Yasune si drumane ka umawmase ku abaadhane ku paisu tusakipawlatadrane, ala pakatwase liniane.

Taikaiyane Biria

10Sakamaungunga kwini lasinzia la makakaai sateatedre ki Pawru si Silra papia Berea. Sa mwanga kwini, la mudaane ki rarubwane ki swa Yuda. 11Kikai laumawmase, mathiathingale ki swa Tisaruniki. Takisamwamula kilalalra kai sabulrwane, kivaivai dredredrele ki Sisiu, pakai ku athingalane ku takawrivane ki Pawru luka patengatengane. 12Ikai liniane la takaalra ku kiapawtenga, takaalra ku matiausakene ku lalabaibai ku lasawvalalai ki swa Gurike maiyalri kipawtenga. 13Ai ku yakai Tisaruniki ka swa Yuda sa kilalra ala ka yakai Berea ku Pawru pelaelaela ku vaga ki Twaumase, la makitu mwa kwini pakalrithavulu, pangiracuku ki mapapangale. 14Kwini lalasu la makakaai satedre ki Pawru papia talikai ki laveke. Ku Silra si Timuthi la asuru ikai Biria. 15Ku wasateatedre ki Pawru la pakela Athenese, ala siwlri mu Biria, si mailuku ku cunu ki Pawru, ku lrika akiraririmuane ki Silra si Timuthi mwa iniane.

Taikaiyane Athenese

16Ku Pawru sa ikai Athenese ukalavalava ki Silra si Timuthi, wadrele ki cekele la suete ku samiamiange, la kipakwalri ku kidremedremeini. 17La ikai rarubwane ki swa Yuda madradrikidrikisi kawriva ki swa Yuda si wasukusukubu ki Twaumase ka lasakamaelanane ka umawmase, lukakaiya la ikai ki tairuburubwane madradrikidrikisi ku vaga sanaka kipadradresengeini. 18Yakai ku la talikaikai ki Ipiciwru si talikaikai ki Sutuike ka langiathingale la kainganai si kidrikisi kawriva. La ikai ku amia kai, “Kikai dingace manemane ku vilravilravilrini?”

La ikai ku amia kai, “Kai lasu miakau peaelaelaela ku pangukai ki latwaumase si laaidridringane ki sakamaelanane ka kuni.” Kwini iya lini kwini amani sa pelaelaela ku Pawru matikai ki Yesu si tasielaneini ka hukuingi. 19Kwini lalasu la iluku ki Pawru mutakaigigiane Ariupaguse, si iya kai, “Kwini pelaelaelasu kwini bavane ka sabulrwane lri dulru nai thingale? 20Yakai kwini la kilalra nai kwi matiasamali turamuru, la apithingale nai luka manemane ku pacugane.” 21(Kai swa Athenese si yakai kwini ka labadhabadha ala ka madalame arakai ku zikange pangilribate pikai ki amapelaelane ku lakilalralalra lini.)

22Ku Pawru la acegecege ikai takaigigiane Ariupaguse si iya kai, “Swa Athenese ka laumawmase! Wathingalaku numiane ikai manemanenga pathingalane numi ku sawrikaikai numi ki takisuswane numi. 23Ku taikaiyaneli cekele dadadavace wadrelaku ku tapatarumaramarane numi, ala drelaku ku taluvale ku tapatarumaramarane ka nipacasane, ‘Patarwamara ki kaika nithingalane ka twaumase’. Kaiasasane lri pelaelaku numiane kikai ki kaika thingale numi ai amani ku usakesakene numi si sukusukubu numi. 24Kikai wabekace belenge, si kadaengane, si sanaka manemanenga ka Twaumase amani kwidra Tamatama ki yabelenge si kai kawmasane. Kai lri ikai ki tudaane ki umawmase, 25kai mwarikai ku akipasikaiyane ki umawmase, asi lwiyane amanini ka wabaai ku niake si amanianiakane si kai lamanemane kidruanga ki umawmase. 26Patwalai ki tangea ka umawmase si bekace, sanaka zuku la malra liniane pasawvagavagai pasalraelre kai kawmasane, la kelrete ku apalikaiyane ku caili si pagisane ki kadaengane. 27Kwini piaini kwini ani kipasilape ki Twaumase amia liniane, ala lri dulru ikai ki tasilapane si kidringai iniane. Ku tangimiane ku Twaumase kai adaili mitane. 28Yakai ku amia kai, ‘Kai tacekecekelane tangivelevelane, kai apanianiakaneta yakai ki alrimaini patuelre.’ Mia ku taiyane ki taratusenai numiane iya kai, ‘Kunai mialri nai ka lalakeini.’ 29Kikai kiasilalaketa iniane, takai kidremedreme ku arakai ku lrigilane ki umawmase capange ngubebelenge kidremedreme ku tangimiane ki Twaumase, si arakai ku kingi gingi ku lrenege tusamiamiange tuamani pakiramau. 30Kai umawmase sa ikaiyana kikabungu ki kulrungane kakadrwana ku thingale, ku Twaumase kai padrima dungudungu, ai kaiasasane padrekadrekase ki laumawmase ku akidailane ki ngialisiane ka kadalranane. 31Asi lwiyane wakelretenga ku vai, ku lrika arakaiyane ku tangea ku pilrini, lri arakai ku dringelresane saibange patuelre kai kawmasane, lri ngukai kikai ki tangea ku tatwaladhane ki wapacai sielane panianiake, wamalranga ku sapatuthingalane si baai ki sanaka umawmase.”

32Kwi lalasu sa kilalra ki Pawru ku taiyane matikai ki wapacai si sielane panianiake, la ikai ku mwalralrakai iniane, la ikaiyana ku amia kai, “Mwarikaiyana nai ku kialalra lu matikaisu kikai.” 33Ku Pawru la katwase takaigigiane. 34La ikai ku laumawmase ku twapapalra iniane si asinzia, ikai kwini yakai ku gingi ki swa Ariupaguse ka Diwnisiu, la ikaiyana ku ababai sia Damarise, si kwidra la drumane ka laumawmase.

Currently Selected:

Nisikawlane 17: NDV

Highlight

Compare

Copy