Nisikawlane 16

Tatupapalrane ki Timuthi ki Pawru si Silra kipuawngane

1Ku Pawru kaiyanganai mu Derebi Lusetera. Sa ikai Lisetera la kainganai ku tangea ku sinzia, sia Timuthi, ku tinaini swa Yuda si ka sinzia, ku tamaini swa Gurike. 2Ku Timuthi ikai Lusetera si Ikuniume kiadrengedrengere ki lasinzia. 3Ku Pawru la iluku iniane katwase la pakigelregelre iniane tulrisi, kwini ngwakai ki swa Yuda wathingale makanaelre ki tamaini ala ka swa Gurike. 4Kwi lalasu sa lribate kwini ki lacekele, la baai liniane ku tukakudhane ki lanisikawlane si laciwru ki swa Yerusalrime, peaelaela liniane ku apaluludane lini. 5La ngukai kwini ku lakiwkai ikai ki salrwane la kakecenge, ku laumawmase lukakaiyaiya la aru takalrakaalra.

Lingau ki swa Makidunia

6Kwini lalasu la katwase ngukakai lribate Peregia si Galatia ki lacekele, asi lwiyane, ku Siri kai palraingi liniane paikai talikai Asia pelaela ku vaga ki Twaumase. 7Sa darurunga pagisane ki swa Misia, la kidremedreme ku mwa cekele ki swa Bithinia, ai ku Ri ki Yesu waruthuku liniane, kai palraingi liniane. 8Lakamani ku lragau#16.8 “lragau” ku wahunyake madu iya kai “ngwakakai”. ki lalasu Misia si mwa Terua. 9Kwini sakamaungu, ku Pawru la tarumara ku maburusi, ikai kwini ki maburusi la drele ku tangea ku swa Makidunia, ku acegecege kitubi iniane iya kai, “Wadawdawlu nai muswane ku akelanesu mu Makidunia si paralubu naiane.” 10Ku Pawru sadrelenga kikai ki maburusi, la yasasaane nai makakai padulru ku apapiane Makidunia, asi lwiyane wathingale nai ki Twaumase aka wadawdawlu naiane ku akatwasane dindu ki swa talikai kwini.

Taasinziane ki Lidia

11La ngukai nai ki varukuru twalai Terua katwase, daruru kavai Samuthera, sakakaiyane la daruru Niapuli. 12La twalai nai kwini si papia Pilripi kamani ku aswalalanga ka cekele ki swa Makidunia#16.12 “kamani ku aswalalanga ka cekele ki swa Makidunia” yakai ku sidrumane ka hungu ku amia kai “kamani ku makuciacingalrenga ka cekele ki swa Makidunia”, la ikai ku sidrumane ka hungu ku amia kai “yatali Makidunia, kamani ku makucingalre ka cekele”., la ikai nai kikai kai maka piale. 13Saka Taisadrasadrane ka vai, matwase nai mulatadre ki cekele mwa babiabila ki kadravane, la kidremedreme nai, alau lri ikai ku tainulrinulriane ki swa Yuda iya. La nene nai, la papia nai kwini ki la yaelrelre ka laababai si bulru liniane. 14Ikai kwini ki lakialalalalra la ikai ku tangea ku twalai Tiatira ki cekele ka ababai, sia Lidia, ka tarakilangalangai ku thilalatadhane ka makalrilau ku awnganeini. Kai alisu musakesakene sukusukubu ki Twaumase; ku Tamatama la muelebe ki kidremedremeini, ku amaka dulrwaneini kicacaligiri kilalra ku takawrivane ki Pawru. 15Kwini alisu si lawacekecekeleini la makitu kipabanawnga. Sakabilrilanenga, la kitubi naiane, “Luiyasi kipawtenga numi ala ka masalrwaku ki Tamatama, bwala ikaiya ki daaneli.” Kwini alisu la kakeecenge ruthuku naiane.

Sa ikai taememengane Pilripi

16Yakai saka minakavalane, la mwa nai kavai tainulrinulriane, la ikai ku tangea ku duri ka ababai ka kainganai kidresenge naiane. Kikai duri ka ababai kiaikai ki aidridringane, la dulru tulrisi ku lrika angimiane lubibilrili, la ngukai kwini si pasikai ki tawkini ngukalrakalra ku paisu. 17Kai alisu mabibibilrili naiane si Pawru, la akwadradradrau kawriva iya kai, “Kai laumawmase kikai amani kwidra sasiakawlu ki Abebeelengenga ka Twaumase, lri pelaela numiane ku kadalranane ki akipalribulane.” 18Kwini alisu la makakalralenga ki vai iyaiya kikai tawtawtau, ku Pawru la taupungunga, la ngibangulu, si iya kai kwini ki aidridringane, “Lri pangukaiyaku ki nagane ki Yesu Kirisitu drekase muswane katwase twalai ki kinawmasaneini!” Kwidra aidridringane la makakaai katwase.

19Kwidra tawki kwini ki duri ka ababai sa thingale ala ka lri twalai karetege ku tatwaladhane ki akaesadhane, la ruthuku ki Pawru si Silra, la sarairalidri liniane pwa ki swadrau ka kalatadrane pakidrele ki mabelenge, 20la iluku liniane pucucubungu ki mabelenge ki swa Ruma, si kukusu iya kai, “Kikai laumawmase swa Yuda, la kela lrithavulu ki cekeleta. 21Kikai lalasu la tumaelaelane baebalre ki kakudhane, ka kaika amaka dulrwaneta tarumara pasusu ka swa Ruma ka laumawmase.” 22Ku mapapangale la patupapalra kiecebe liniane, ku mabelenge la padrekadrekase pamwalra ku laimai lini si lrumai liniane. 23Ku lakwapingi la masasigirimucane lrumai ki Pawru si Silra. Ala emenge liniane, si drekase ki tarakadrekadrenge ku akipapawlringavane kadrenge. 24Ku tarakadrekadrenge sa kipadrekadrekasenga, la alra kerenge ki drapale lini arakai ku kicikici.

25Lri ikaai kau kabiceacelrakane ki maungu, ku Pawru si Silra la inulrinulri, senasenai drengedrengedrengere ki Twaumase, ku drumane ku kiaemenge la makitu kilalalalra. 26La kiriimu pangicaeme lingilingi, adravane ku dudai ki takiememengane la ngivelevele, la yasasaane nguelebane patuelre ku lrawlrawdru ki takiememengane, ku sakerengane ku kicikici ki lakiaemenge la makitu ngwalrane. 27Ku wakadrekadrenge la pacunu, la drele ku saelelebane ki taememengane la nguelebanenga, lri tara ka mwabeerenga makanaelre ku lakiaemenge la iya, la sudru ku lrabu si kisanu ngikakabebetethe. 28Sadrele ku Pawru, la tawtau akwadrau, “Madha ngikakabebebetethe, yakaiyana nai makanaelre!” la iya.

29Ku tarakadrekadrenge la dawlu ki umawmase, malra ku tinaki la iya, la katwase lailai mudaane, masasithathiburane pidruru mucucubungu ki Pawru si Silra. 30Ala ililuku liniane pulatadre si kivaga iya kai, “Tadrusa ka sinsi, itumanaku si dulrwaku tarumara ku akipalribulane?”

31Kwini lalasu la iya kai, “Kasalrwa ki Tamatama ka Yesu, kusu si wacekecekelesu makanaelre lri dulru tarumara ku akipalribulane.” 32Kwini tadrusa la bulrwana iniane ku vaga ki Tamatama si lawacekecekeleini makanaelre. 33Kwidra sakamaungu, kwini tarakadrekadrenge la iluku liniane si bula pakademele ku dula lini, kwini lasu si wacekecekeleini makanaelre la makakaai makitu kipabanau. 34Kwini lasu la dawlu ki Pawru si Silra pamwa ki daane lini, si pakane liniane. Kwini lasu si wacekecekeleini makanaelre la kisueteane ki sakiararagai, asi lwiyane ngwalai ki takisuswane lini ki Twaumase.

35Sakakaiyane sakaliare, ku mabelenge ki swa Ruma la sikawlu ki mabelenge ki kisace iya kai, “Kwidra ki tadrusa pakatwasanga!”

36Ku tarakadrekadrenge la iya kai ki Pawru, “Ku mabelenge yakai kai drekaseini pakatwasanga iya muswane si Silra, kunumi kaiasasane lri dulrunga numi katwase takiememengane, kasulivaatanga kwi kidremedreme numi katwase.”

37Ai ku Pawru kawariva ki kisace iya kai, “Swa Ruma nai ka umawmase, la ka kadrwa ku akitupasalrivane nai, la lrumalrumadhana naiane picucubungu ki laumawmase, si emenge naiane. Kikai asasane la kisanu kibububulinga pakatwase naiane; kikai kaika tapiapiane! Dawla ki mabelenge ki swa Ruma lani ngikakamani ililuku naiane pulatadre!”

38Kai mabelenge ki kisace sapelaela kikai lavaga ki kiacapicapili. Kwi lalasu sa kilalra ka swa Ruma ku Pawru si Silra la mukuludru turamuru. 39La mwa taememengane si kiaseasene liniane, la pulatadre liniane, si pakatwase liniane kwini ki cekele. 40Ku Pawru si Silra sa mulatadrenga ki takiememengane la katwase papia ki daane ki Lidia, la ikai kwini si kikawriva ki lasinzia, si pasapukwane liniane ala katwase.

Currently Selected:

Nisikawlane 16: NDV

Highlight

Compare

Copy