Nisikawlane 15

Takaigiane ikai Yerusalrime

1Yakai ku laumawmase ku twalai Yuda kainganai kela Anetiuke, la pathagili bulru ki laretesane si iya kai, “Lu kai numi paluludu pangimia ku hulrice ki Musi si kigelregelre kitulrisi kai numi lri maka kipalribulu.” 2La ngwalai kai ki mendai, ku Pawru si Barenabase la madrikidrikisi ku vaga lini liniane. Ngwalai kai, la mapalrailrainginga makanaelre pakatwase ki Pawru si Barenabase, si swakai kwini kiwkai ka tapiya ka umawmase karedele mu Yerusalrime, la kivaga ki nisikawlane si laciwru kikai miyaiya kai.

3Ku swa kiwkai la sateatedre liniane. Ikadadalranane la ngukakai Puinicia si Samaria, mwa kidruanga pelaela ku takisuswane ki Twaumase ki sakamaelanane ka umawmase. Kwidra la mapapangale sa kilalra la kiragai si kasasa. 4Sadarurunga Yerusalrime, la kikidredresenge ki swa kiwkai, ki lanisikawlane si laciwru. La pelaela liniane ku tapangukaiyane ki Twaumase liniane kipuawngane. 5Ai yakai ku la swakai ki Palrisai ku lasinzia ngiadrakale si iya kai, “Kai sakamaelanane ka umawmase lri tara kigelregelre kitulrisi, lai tara paluludu ku hulrice ki Musi.”

6Ku lanisikawlane si laciwru la kaigi pangukai kikai. 7Sa ngulraginga ki tuki mapelaela, ku Pitiru la acegecege iya kai, “Kunumi ka retesaneli, wathingale numi ku Twaumase patwalainga numiane pilri nakwane, ku lrika apelaelaneli ku hukuingi ki sakamaelanane ka umawmase, ku akilalrane lini si kipawtenga kasalru. 8Ku palregese thingale ku takidremedremane ki umawmase ka Twaumase wabaai ku Siri ki sakamaelanane ka umawmase, mia ku tabaadhane mitane, arakai kikai pathingale aka tarwamara kwidra ki sakamaelanane ka umawmase. 9Ikai mitane si ikai liniane, ku Twaumase kadrwa ku apatulrilrigane, ngwakai ku takasalrwane lini la bula ki takidremedremane lini. 10Kwini ngimiyaiya kikai, kaiasasane anu kituthiathingale ki Twaumase, si malra kwidra kaika maka siamece ki lacucungulaneta si kaika maka siameceta pasiamece ki la sakamaelanane ka sinzia? 11Kai ka tangimiane kwini, kiapawtengata kikai kipalribuluta ngwakai ki Tamatama ka Yesu ka nivwavuthane baai mitane, mia liniane mararamau.”

12La makitu isaselebane kilalalra ku pelaela ki Barenabase si Pawru ku taarakaiyane ki Twaumase liniane ikai ki sakamaelanane ka umawmase ku tapiane patuelre ku pinangu Twaumasane ku matiasamali ka awngane. 13Samaka pelaelanga, ku Yakubu la iya kai: Kunumi ka retesaneli, kilalra! 14Kuasane ku Simune palalrwainga pelaela ku tapangimiane ki Twaumase ki sakamaelanane ka umawmase, si patwalai liniane pilri ku lrika umawmaseini. 15Ku takawrivane ki yuginsia mamamwalringa kikai. Kai Sisiu amia kai ku tapacasane:

16Ku Tamatama amia kai: Lukabibilrili lri kelaku siwlri,

la pela cegecege ku mwakadrulu ku daane ki Davidi.

Lri patwaladhaku ki takaburukane si pela tubavane tudaane si pacegecege sawlri.

17Luka ngimiyaiya kikai, kwidra drumane ka umawmase,

kwidra lapilrili papia nakwane kwidra lasakamaelanane ka umawmase,

lri makitu kipasilape ki Tamatama.

18“Kwidra twalai kunadruma si padrekadrekase kikai ka Twaumase amia kikai pelaela.”

19Ku Yakubu la pacungulu iya kai, “Singikai ku tadrelaneli, takai pakwalri pakidulru kwidra lri papia ki Twaumase ka sakamaelanane ka umawmase. 20Kuta naika watigamita, pelaela liniane la nai kai kane kudra nipatarumaranenga ki samiamiange ka kaika mabula ka akaneane, ku kaika apasudringadhane kaika asudringadhane, kai kane ku erai ki nitherane papacai ka waudriwdripi si erai. 21Asi lwiyane twalai kunadruma, sana daruru ki Taisadrasadrane ka vai, ikai ki rarubwane ki swa Yuda yakai ku umawmase ku sialrigulrigu ku hulrice ki Musi, ikai ki cacekelenga yakai ku umawmase ku peaelaelaela ku sabulrwaneini.”

Watigami baai ki sakamaelanane ka sinzia

22Kikai kwidra lanisikawlane si laciwru si la swa kiwkai makanaelre marathudu ku wapilri ku lri ngitalingikaiyane tupalra ki Pawru si Barenabase mu Anetiuke. La pilri ki sia Baresabase ka Yuda si Silra. Kikai tadrusa kiausakesakene ki mapapangale. 23Ku iluku lini ku tigami ngimiyaiya kikai ku tapacasane:

“Kwidra lanisikawlane si laciwru ka retesane numi mwadringadrengai numi amiamia numiane ka yakai Anetiuke, Siria, Cilikia patuelre numiane ka sakamaelanane ka retesane nai makanaelre. 24Yakai ku kilalra nai ku twalai naiane si katwase mwa numiane; ku takawrivarivane lini la pakwalri numiane. Ku patengane kai nai siakawlu liniane pakatwase pakawriva. 25Lakamani ku taelre nai mapelaela, makitu palraingi nai ku wapilri ku lri talingikaiyane naiane mwa numiane. La lri taelre ki kathalraita ka talragita ka Barenabase si Pawru karededele. 26Ka amani kwidra pasiakai kaungu ki Tamatama ka Yesu Kirisitu, si kai pathilipi ku kiapapacai ka Barenabase si Pawru tarwa drusa katwase. 27La pilri nai si sikawlu ki Yuda si Silra, lri icucubungu numiane si pelaela ku matikai numi ikai ki tigami. 28Asi lwiyane ku Siri palraingi naiane, kai paelre ku atara piapiane ku nitukakudhanane, kaika alrane ku drumane si pasiamece padrima numiane. 29Kunumi madha kanekane ku nipatarumaranenga ki samiamiange ku akaneane, madha kanekane ku erai si nitherane papacai ka waudriwdripi, la madha sudringai madha pasudringai. Mathaithaariringa lu kai numi pasalriu kilakikai. Kasulivalivaatanga makanaelre!”

30Kwini kiapilri sa kipadrekadrekasenga la mwa ka Anetiuke, si ikai kwini sarubu ki lasinzia makanaelre, la baai ku tigami liniane. 31Sa silrigunga ku tigami, la ngukai kwini ki tigami ku takipasapukwanane si kiraragai. 32Ku Yuda si Silra maiyalri ka atalingikaiyane ki Twaumase avavaga ka yuginsia, la kawriva papia ki laretesane ku makaalra ku vaga, pasapukwane liniane pakakecenge ku salrwane lini. 33La ikai kwini pangilribate ku kaika minakapialane, kwini lalasu la sateatedre liniane, si subulrubulru liniane ku akasulivatane siwlri.#15.33 Yakai ku sidrumane ka hungu ku padrima kikai mwasaka 34 ka vaga “Ai, ku Silra malrithethe ku asurwana ikai kwini.”

35Ku Pawru si Barenabase la ikaiyana padawdalru Anetiuke, la taelre ki laumawmase bulrubulru si pelaelaela ku vaga ki Tamatama.

Tamauvagadhane ki Pawru si Barenabase

36La ngilribatenga ku minakapialane ka vai, kai Pawru la kawriva ki Barenabase, “Tasiwlriwlri mwa kudra natadindwaneta ku vaga ki Tamatama ka lacacekele, tadrele ku tangimiamiane ki laretesaneta.” 37Ku Barenabase la kidremedreme ku wailuku ki Yuhani Maruku karedele katwase, 38ai ku Pawru kai palraingi, asi lwiyane ku paswalala kai mwabangalre asuru taelre liniane kaungu, la ikai Pamepilia katwase liniane. 39Kwini tadrusa la ngwalai kikai si maakulisi, sakabilrilane la mauvagai. Ku Barenabase la ilukunga ki Maruku nguvarukuru mwa ka Saipuruse. 40Ku Pawru la pilri ki Silra, ku laretesane lini sa patarumaranga liniane pikai ki migemi ki Tamatama si pakisirapale liniane la katwase. 41La dadavace salraelre Siria si Cilikia, pakakecenge ku salrwane ki lasinzia ki la swa kiwkai.

Currently Selected:

Nisikawlane 15: NDV

Highlight

Compare

Copy