Nisikawlane 14

Sa ikai Ikuniume

1Ku thadalrane ku awngane mialri ngimianga ikai Ikuniume. Ku Pawru si Barenabase la mwa rarubwane ki swa Yuda, ku takawrivane lini takaalra ku swa Yuda si sakamaelanane ka umawmase ku ngwalai si asinzia. 2Ai, kudra la kaiyana masalru ka swa Yuda pangiaracuku ki sakamaelanane ka umawmase, ku lrika akavalracevacane lini ki sinzia. 3Kwini tadrusa la ikai kwini makakaalrale ku vai, la karakace pelaelaela ku ngwakai ki Tamatama, ku Tamatama la baai liniane ku apiane ku pinangu Twaumasane ka puku si matiasamali ka awngane, la arakai kikai pelaela akapatengane kwidra pelaelaela lini ku ngwakai ki migemini ka hukuingi. 4Ku mapapangale kai ki cekele la ngwalai kai si matatulrigane, yakai ku sakai ki swa Yuda, ai yakaai ku pwasakai ki nisikawlane.

5Ai, ku swa Yuda si sakamaelanane ka umawmase maelre kwidra ki tarasangililuku liniane si kalrithethe ku akiecebane ki nisikawlane, lri arakai ku lrenege papacai liniane. 6Ku nisikawlane sa thingale kikai, la kiwlrau papia tali Likawnia ka sia Lusetera si Derebi ka drusa ka cekele si kwidra ngwadadethe ki talikaiyane kwini, 7ikai talikaiyane kwini pacungulu pelaelaela pasalraelre ku hukuingi.

Sa ikai Lisetera si Derebi

8Ikai Lusetera ka cekele yakai ku tangea ku kai matulrepenge ku takaumawmasane, singi takitulalakane kapiapilai, kadrwana ku tadadavacane. 9La nene ikai kwini kilalalalra ku tabulrwane ki Pawru. Ku Pawru la drele iniane ka yakai ku salrwane ka lri dulru kipawdringai la kirimu lengethe drele iniane, 10la iya kai, “Ngidrakala si acegecege pakadringelrese kwi drapalesu.” Kwini lasu la ngidrakale ituku si pathagili dadavace. 11Ku laumawmase sadrele ku tapiane ki Pawru, la arakai ku vaga ki swa Likawnia akwadrau iya kai, “A umawmase ku Twaumase si mulebe ikai mitane!” 12La pasi Ziwse ki Barenabase, la pasi Heremi ki Pawru, asi lwiyane kwini lasu amani ku tara maililuku kawriva. 13Ikai latadre ki cekele yakai ku tangea ku barakalai ki tasamiamiangane ki Ziwse, la mailuku ku lwange, la iluku ku bengelrai, si kainganai mwa lrawlrawdru ki cekele, lri karededele ki laumawmase patarumara baai ki nisikawlane.

14Ku Barenabase si Pawru sa kilalra kwidra apiane lini, la thuriace ku laimai, si katwase mukabicelrakane ki laumawmase si akwadrau iya kai, 15“Kunumi makanaelre, anu piya kikai? Mia nai numiane ka umawmase, kai kela nai kikai si pelaelaela kai hukuingi, pakai nai ku acilriane numi ki kadrwa ku pacugane ka samiamiange, si papia kwidra ki panianianiake palralrawthu ka Twaumase ka amani ku wabekace belenge, si kadaengane, laveke si yakai adringi sanaka manemanemane. 16Kunadruma, ku Twaumase pangialralraingi ki sanaka umawmase ku tadadavacane lini, 17ai, ku Twaumase pangwakakaikai ki makaelaela ku mathariri ka awngane ngipapelaela ala ka yakai panianianiake, maruamaninga: Lu twalai belenge paudale numiane, si pakitaleke numiane ngukaalra, patarwamara numiane ku akaneane, ku lrika asueteane ki kidremedreme numi ku akiragadhane.” 18Adravane saiyanga kwini kawriva kwidra nisikawlane, sakamiya kai maka payadrengere ki laumawmase ku apatarumarane baai liniane.

19Ai, yakai ku la swa Yuda ku twalai Pisidia ka Anetiuke si Ikuniume kainganai, kai lalasu la papugarange ki laumawmase la arakai ku lrenege cabiri ki Pawru, alau wapacainga la iya iniane, la saralidri iniane pulatadre ki cekele. 20Ku lasinzia sa ngithalringulu iniane, la ngidrakale si acegecege, si katwase siwlri mucekele. Sakakaiyane, la tarudrusa ki Barenabase papia Derebi.

Siaulri mwa tali Siria ka Anetiuke

21Ku Pawru si Barenabase sa ikai Derebi pelaelaela ku hukuingi, takaalra ku umawmase ku asitu liniane. Kai lalasu la siwlri mwa Lusetera, ala mwa Ikuniume, la mwa tali Pisidia ka Anetiuke. 22Kai lalasu la mwa kidruanga pakakececenge ku salrwane ki lasinzia, si pasapukupukwane liniane ku apacungulane satalu ki Yesu, la pelaelana liniane, “Lri tara ngukakaita ku makaalra ku akwalriane ala lri dulruta kamaninga ku umawmase ki kuni ki Twaumase.” 23Kai tadrusa la pasikaiyana ki lakiwkai pacegecege ku ciwru, sa inulri si maka laisinga, la alra liniane patarumara ki satalutalu lini ka Tamatama.

24Kai tadrusa la lribate tali Pisidia, si daruru Pamepilia. 25Sa ikai Perega pelaelaela ku vaga ki Twaumase, ala katwase mwa Atalia, 26la twalai kwini nguvarukuru siwlri mu Anetiuke. Sakapathagilane, amani ku taikaiyane lini kikai, kisudralru ikai ki migemi ki Twaumase si kipuawngane kikai nitulrepenganenga ka awngane.

27Kai lalasu sa siwlri mu Anetiuke, la sarubu ki lasinzia ki swa kiwkai, si pelaela liniane ku tapangimiane ki Twaumase pangukai liniane kaungu, ku tapangimiane sudalrane, ala kipawtenga kai sakamaelanane ka umawmase. 28Kai lalasu la ikai kwini taelre ki lasinzia kawlai.

Currently Selected:

Nisikawlane 14: NDV

Highlight

Compare

Copy