Nisikawlane 13

Ku Siri siakawlu ki Barenabase si Saule

1Ikai Anetiuke kiwkai, yakai ku layuginsia si latarabulrubulru, amani ku Barenabase, Simiune (kiapasi Icecelrenge), swa Kurini ka Luciu, si kudra papalra ki talialalai ka Hirudi kadrau ka Manaine, si Saule. 2Sa sukusukubu ki Tamatama si lailaisi yai, ku Siri amia kai liniane, “Kunumi sikawla ki Barenabase si Saule pasikai nakwane, ani pia kwidra awngane ku tadawlanengali liniane.”

3La kirimu kwini lalasu laisi inulri, si ansu liniane, la sikawlu pakatwase liniane.

Sa ikai Saipuruse

4Ku Barenabase si Saule kiasikawlunga ki Siri, la katwase mulrawdru mwa Silukia, twalai kwini nguvarukuru mwa Saipuruse. 5Sa daruru Salamise, la ikai ki rarubwane ki swa Yuda pelaelaela ku vaga ki Twaumase. Ku Yuhani Maruku la ikai kwini paraluralubu liniane kaungu.

6Kai lalasu la salraelre kwini ki kadaengane, daaruru ka Papu, ikai kwini la kipadradresenge ki tangea ka sia Bare Yesu ka taratulrisilrisi, swa Yuda ka umawmase, ka ngiatatu yuginsia. 7Kwini lasu matatalragi ki abelenge ikunkwane kwini ki cekele ka sia Seregiu Pawru, kwini mabelenge ikunkwane ngiathingale turamuru, la dawlu ki Barenabase si Saule, nau kilalalra ku vaga ki Twaumase iya. 8Ai, kudra taratulrisi ka Ilima (Ilima lu iya swa Gurikane ka naganeini) kai palraingi, pasana telenge kwini ki mabelenge kunkwane ku kaika akisuswaneini. 9Ki kikai kwidra, ku Saule, mialri si Pawru, kiasuete ki Siri, la lengethe drele kwini ki taratulrisilrisi. 10Si iya kai iniane, “Kusu ka lalake ki Akema! Kusu yai amanisu ku badha ki sanaka makaleecege ka kakwakudhane, ka kiasuete ki sanaka ngialisiane ka sadraedrangelrane, ka waraanau pathivalrau ku vaga ki Tamatama! 11Kikai ku sapathavungane ki Tamatama lri mulebe makakai muswane, la lri kamukicisu, si kaisu lri maka dreleana ki ledra ki vai.”

Ku Ilima la makakaai mia ki yakai ku icecelrenge ka ememe kabungu ki macaini, la sakerakeerapenga, si arakaili iya ki umawmase, si ililuku ki tadadavacaneini. 12Kwidra mabelenge ki swa kunkwane la drele kwidra tangimiane, la kirimu asinzia, pangukai kwidra sabulrwane ki Tamatama la kasamali turamuru.

Yakai Pisidia ka Anetiuke

13Ku Pawru si palraini twalai Papu nguvarukuru, sa lri kelanga tali Pamepilia ka sia Perega, ku Yuhani Maruku yakai kwini katwase liniane, siwlri mwa Yerusalrime. 14Kwini lalasu la twalai Perega pacungulu ku kadalranane lini, sa daruru tali Pisidia ka sia Anetiuke. Saka Taisadrasadrane ka vai, la mwa ki rarubwane ki swa Yuda, si nene ikai kwini. 15Sa maka silrigunga ku padradrekase ki Musi si pacase ki yuginsia, ku mabelenge ki tarakadrekadrenge ki rarubwane ki swa Yuda la sikawlu ki umawmase pelaela liniane, “Kunumi ka laretesane nai, alaiyasi ikai ku vaga numi ku apasapukwanane mitane makanaelre, kawriva.” 16Ku Pawru la acegecege, pubelenge ku alrimaini si kawriva:

“Kunumi ka sakacekeleli ka swa Iseraylri si la mwasakesakene ki Twaumase ka sakamaelanane ka umawmase, kilalra! 17Ku Twaumase ki swa Iseraylri wapilri ki cucungulaneta. Kwidra sa ikai Izipiti, ku Twaumase la pangiradhekane liniane si kavaevanga ka maadrau ka minzuku, la arakai ku pukuini ililuku liniane katwase Izipiti, 18sa ikai calragulragu la pacepe#13.18 “pacepe” yakai ku sidrumane ka hungu ku amia kai “sirapale”. liniane ikaai kau taramasupatele ka caili, 19la amudu ku yakai Kanange ku taipitu ku minzuku, kudra kadaengane lini la baai ki kawkawluini, 20kikai miyaiya ki kikai ikaai kau tara 450 ka caili.

“Sangilribatenga kwidra, ku Twaumase la pasikai liniane cegecege ku tamagarange, pakela ki yuginsia ka Samuile. 21Sakabilrilinga, kai lalasu ala kitubi ku apikaiyane ku talialalai, ku Twaumase la patwalai ki swa Biniyamingi ka zuku pilri ki Saule ka lalake ki Kise, si pacegecege paatalialalai iniane, ikaai kau taramasupatele ka caili. 22Sa kicilringa ku Saule, ku Twaumase la pasikai liniane cegecege ki Davidi paatalialalai. Pangukai ki Davidi, amia kai ku Twaumase, ‘Kiadringaingaku ki lalake ki Yesi ka Davidi, mamamwa ki kidremedremeli, sanaka maneemane pasalaladha ki kidremedremeli.’ 23Patwalai ki mwabaibalrithi iniane, ku Twaumase singiakai ku tapalrainganeini pasikai ki swa Iseraylri cegecege ku tangea ka Takipalribulribulane, amani kwidra Yesu. 24Sa kaina pathagili kaungu ku Yesu, ku Yuhani papia ki swa Iseraylri makanaelre dindu, ku lrika acilriane lini ku pasalrivane, si kipabanau. 25Sa lri padaalrunga si tulrepenge ku awnganeini ku Yuhani, papia ki swa Iseraylri iya kai, ‘Lu kidremedreme numi aneane amia numi nakwane? Kainaku kamani kwidra mukalavalava numi, ai kwidra lri kainganai kabibilrili nakwane adravane ka amukeceane iniane kainaku lri sudalepe.’

26“Kunumi ka lasakacekeleli ka lagagane ki Aberahame si mwasakesakene ki Twaumase ka sakamaelanane ka umawmase makanaelre, kikai nipelaelane ka matiakiragai ka sapalribulane baai ki Twaumase mitane! 27Ai, ku yakai Yerusalrime ku umawmase si la tarasangililuku liniane kai wathingale iniane ala ka Takipalribulribulane, la mialri kai pulringalringau kudra nisilrigulrigwane luka Taisadrasadrane ka vai kudra pinacasane ki yuginsia. Kikai lalasu twapasalrivane ki Yesu, ala ka ngiamianga ku yugingi ki yuginsia. 28Kai lalasu adravane kai maka kidringai ku atakaiyane iniane si tupasalrivane, kiatubiana ki Pilatu ku apapacadhane iniane. 29Kai lalasu sa pangimianga ku pacase ki yuginsia patharukai ki Yesu patuelre, la patwalai ki ziwzika pulebe iniane, si pasutelrai pikai ki balriu. 30Ai, ku Twaumase pasiaela iniane patwalai ki wapacai, 31si la ikai kwidra ki minakapialane ka vai, la kingikalrale adrelane kudra ki natwapapapalra iniane twalai Galrilri mwa ka Yerusalrime ka laumawmase, kikai laumawmase kaikameane ikai Iseraylri la kamaninga ku tarapelaelaela pangukai iniane. 32-33Kaiasasane kai pelaela nai pakela baai numiane kikai hukuingi, pangukai ki tasielane ki Yesu, ka palraingi ki Twaumase ka apangimiane pasikai ki cucungulaneta, ka ngiamianga papia mitane ka lagagane. Ngiamia kwidra ki Lasenai ka mwasakadrusa amia kai:

Kusu amanisu ku Lalakeli;

kaikameane amaniaku ku Tamasu.

34Pangukai ku tasielane twalai ki tapacadhane, si lrika palralrawthunga kai lri pacainga, ku Twaumase amianga kai kawriva:

Lri malraku kwidra palraingingali baai ki Davidi

kwidra alrivilrivi ka patengane ka migemi si baai numiane.

35Kwidra yakai talidrumane ku twasenai ki Lasenai, la iyaiyana kai:

Kaisu lri palraingi pakaburau kwidra ki makalecege ku sasiakawlusu.

36“Ku Davidi sa ikawmasaneana pangiamia ku takikakane ki Twaumase, sapacainga la kidralreke pikai thili ki cucungulaneini, si la kaburau; 37ai, ku pasiela ki Twaumase patwalai ki wapacai kwidra lasu kai maburau. 38-39Kunumi ka sakacekeleli, naika pwalringalringau numi makanaelre, kwidra pangwakai ki akipacepane ku pasalrivane, amani kai Yesu ku padaruru pelaela numiane. Kunumi thingala, ku hulrice ki Musi kai lri dulru pakidaili numiane sanaka pasalrivane, ai sanaka kiapawtenga ki Yesu ku umawmase lri dulru twalai ki pasalrivane kitukudha. 40Lakamani, kunumi kipapawlringava, amani lu ngimia ikai ki kinawmasane numi ku taiyane ki yuginsia:

41Kunumi ka twadreadrekase ki Twaumase ka laumawmase!

Drela, lri mukuludru numi, lri pacai numi!

Asi lwiyane ikai ki zidai numi ku piali ku awngane,

adravane ikai ku umawmase ku peaelaela pakipapawlringau numiane,

kai numi maka masalru!”

42Ku Pawru si Barenabase sa lri katwase rarubwane ki swa Yuda, kudra lalasu makanaelre kiatubiana liniane ku akelaneana lini ngusela lu pela ka Taisadrasadrane ka vai si pelaelana liniane palalrwai ki kikai miyaiya kai. 43Sa mawvagavagainga, takaalra ku swa Yuda si kiasusunga ki Yudaiyakiu ka sakamaelanane ka umawmase kaiyanganai tupapalra ki Pawru si Barenabase. Kikai tadrusa la pasapukwane liniane ku lrika apacungulane ikai ki sikace lini satalu ku migemi ki Twaumase.

44Sa peelanga ka Taisadrasadrane ka vai, ku sakatucekelane makanaelrenga kela, kilalalra ku vaga ki Tamatama. 45Ku swa Yuda sadrele kai ki tathathatha ki laumawmase, la pathalra ku kidremedreme lini turamuru, si baebalre ku taiyane ki Pawru, la tusinalrelreme iniane. 46Ai, ku Pawru si Barenabase arwa kagarangelringa pelaela iya kai: “Ku vaga ki Twaumase lri tara paswala padaruru numiane. Ai, kai numi tarwamara kai numi ngiapapasudalepe ku amalrane ku palralrawthu ka niake, lakamani, ku lrika akatwasane nai numiane, papia ki sakamaelanane ka umawmase, 47asi lwiyane ku Tamatama peaelaelanga naiane iya kai:

Wakelretenga naku ku lrika ledra numi ki sakamaelanane ka umawmase,

lri pakamaniaku numiane ku lri iluku kai sapalribulane papia ki yainu kidruanga.”

48Ku sakamaelanane ka umawmase sa kilalra kikai vaga la kiragai turamuru makanaelre, si drengedrengere ku vaga ki Tamatama, kwidra la kiapilringa ki Twaumase si kainganai tarumara ku palralrawthu ka niake ku umawmase, la asinzianga makanaelre.

49Ku vaga ki Tamatama ikai talikai kwini la salraelrenga. 50Ai, ku swa Yuda la putata kwidra ki latabebelenge ki swakai kwini si kwidra matiausakene ka la kiasusunga ki Twaumase ka labaibai, pathagili hakegai ki Pawru si Barenabase, la pakatwase liniane kwini. 51Kai tadrusa la visivisi ku thuvugu ki drapale lini, la pakipapawlringau liniane, ala katwase papia Ikuniume. 52Ku yakai tali Pisidia ka Anetiuke, ku lasitu kiasuete ki Siri si kiraragai turamuru.

Currently Selected:

Nisikawlane 13: NDV

Highlight

Compare

Copy