Nisikawlane 12

Arwa drima ku takihakegadhane ki kiwkai

1Lri ikaai samiamia kwini ku vai, ku Hirudi ka talialalai pwalrima hakegai ki kiwkai kwidra ki lasinzia. 2Papacai ki Yakubu ka taka ki Yuhani. 3Kai lasu la thingale ka madalame ku swa Yuda ku tapiane kikwini, la pela katwase pwalra ki Pitiru (kikai kwidra yacengecenge ka kalalrisiane ki Sapawsemakane ka lrisi.) 4Sa pwalranga ki Pitiru, la emenge iniane pitaememengane, si baai ki taisupatane ka tarakadrekadrenge pakadrenge, ki taingea tasupate ku kwapingi. Nau saibangenga picucubungu ki laumawmase, lu ngilribatenga ki atulrisisiane ki Takilragavane ka lrisi iya kikake ku Hirudi. 5Ngwalai kikai, ku Pitiru la kikadrenge turamuru ku taikaiyaneini taememengane; ku swa kiwkai ku lamaretetese la inulri turamuru pasikai ki Pitiru papia ki Twaumase.

Ku Pitiru kiapalribulu si kipulatadre taememengane

6Sa lri mukaiyanenga si saibange ku Hirudi ki Pitiru picucubungu ki laumawmase sakamaungu, ku Pitiru masipelrenge ikabicelrakane ki tadrusa ka wakadrenge, la ka sipusale ku kicikici pakerenge iniane, tali latadre ki lrawlrawdru la ikaiyana ku wakadrekadrenge. 7Ala kiriimu, ikai ku sasiakawlu ki Tamatama acegecege ikai kwini, la ikai ku ledra papia ki taememengane paledra, ku sasiakawlu belenge la tapetape ki tabalangane ki Pitiru, si aceace iniane, la iya kikai, “Kirimwa ngidrakale!” Kudra sakerengane ku kicikici la makakaai mucilri twalai ki alrima ki Pitiru. 8Ku sasiakawlu belenge la iya kai iniane, “Silaketa si sikece.” Ku Pitiru la pangimiya ku taiyaneini, ku sasiakawlu belenge la pela iya kikai, “Siebela, la tupapalraili.” 9Ku Pitiru la tupapalra iniane ulatadre taememengane, ai kai pwalringalringau ala ka patengatengane kai tapiapiane ki sasiakawlu belenge, maburusi kikai dreleli amia sikakathane. 10La lribate kwidra ki yakai kadrekadrenge ikai sadadaanenga si mwasakadrusa, sakabilrilinga la kela kudra ki sapapia ki cekele ka adreme ka saelelebane, kwini lrawlrawdru la ngikakamaani nguelebane, la ulatadre, si ngukai ki vaeva ka kadadalranane; ku sasiakawlu belenge ala kirimu katwase ki Pitiru.

11Samianga kwini ku Pitiru ala pulringau, si iya kai, “Wathingalengaku kikai ala ka patengane, ku Tamatama siakawlu ki sasiakawluini, palribulu nakwane patwalai ki alrima ki Hirudi si naika akabebetethane nakwane ki swa Yuda ka laumawmase.”

12Sathingalenga ku tangimiamiane, la katwase papia ki daane ki Malria, ka tina ki Yuhani Maruku, takaalra ku laumawmase irubu ikai kwini inulrinulri. 13Ku Pitiru la bangebange ki lrawlrawdru latadre, la ikai ku tangea ku sasiakawlu ku sia Ruda twabalre si kainganai, 14la thingale ka lingau ki Pitiru, ku sakiaragaini kai mwaelebe, makakaai siwlri lailai mudaane pelaela liniane makanaelre, acegecege ilatadre ka Pitiru iya. 15Kwini lalasu la iya kai, “Amamamasu!” Kwini sasiakawlu ka ababai la kakecenge tenganeli iya, kwini lalasu la iya kai, “Lri tara ka sasiakawluini.”

16Kikai kwidra ku Pitiru la apapelaela bangebange ki lrawlrawdru, kwini lalasu la muelebe ku lrawlrawdru, sadrele ala ka tengatengane kamani, la kasamali makanaelre. 17Ku Pitiru la ara alrima paicelrebe liniane, si pelaela liniane ku tapangimiane ki Tamatama ililuku iniane ulatadre taememengane, ku Pitiru la pelaela liniane pelaelanga ki Yakubu si lasinzia iya, sa iya kwini, la katwase papia talidrumane.

18Sa kaliarenga, kwidra la wakadrenge la kalrithaavulunga, kaithingale luka ngiatumane ku Pitiru. 19Ku Hirudi la drekase pasilape, ai kai maka kiadringai ku tapapiane ki Pitiru, la saibangenga kudra ki la wakadrenge, si thiabe papacai liniane.

Kikai sangilribatenga, ku Hirudi la katwasenga Yuda, papia Kaisaria, si ikai kwini kai tarathainu.

Tapacadhane ki Hirudi

20Ku Hirudi papia ki swa Tayre si swa Sidune ki laumawmase kalisi, ngwalai kwini, kwini lalasu la pakatwase ku la wadaihiu kikawriva ki Hirudi. Paswala kikakalithi kudra ki taramarasikaikai ki daane ki talialalai ka Belasetu, ala katwase papia ki Hirudi kikadalru, asi lwiyane mwarikai ku alrane ku taleke patwalai ki erece ki Hirudi ki lacekele.

21Ikai ki nikelretane ka vai, ku Hirudi la silaimai ku laimaini ka talialalai, nene ikai ki taetale ki talialalai, si papia ki laumawmase kawriva bulru. 22Kwidra laumawmase la riariange kawriva, “Kikai yai kaika lingau ki langumawmawmase, lingau ki Twaumase!” 23Ku sasiakawlu ki Tamatama la makakai lrumai ki Hirudi, asi lwiyane kai lasu kai wabaai ki Twaumase ku lrigu, la kikace ki lubalubai si pacai.

24Ku vaga ki Twaumase arwa swadradrau, pivai aru ngiradhekane.

25Ku Barenabase si Saule sa tulrepengenga ku awngane lini, matwase Yerusalrime#12.25 “matwase Yerusalrime” yakai ku sidrumane ka hungu ku amia kai “la siwlri mu Yerusalrime”., la ililuku karedele ki Yuhani Maruku.

Currently Selected:

Nisikawlane 12: NDV

Highlight

Compare

Copy