Nisikawlane 11

Peaelaela ki swa Yerusalrime ka kiwkai ku Pitiru

1Ku sasiakawlu si yakai Yuda ku laretesane kialalra ku yakai ku sakamaelanane ku umawmase ku mialri tarumara ku vaga ki Twaumase amia. 2Ngwalai kikai, sa kela Yerusalrime ku Pitiru, kudra lri tara kigelregelre kitulrisi kai sakamaelanane ka umawmase amia la iya kai kawariva iniane, 3“Yakaisu abadhabadha kwidra ki kai kiagelregelre ka sakamaelanane ka umawmase, la nataelrengasu liniane kane ku aga!” 4Ku Pitiru la pelaela palalrwai nguvavaeva patuelre ku tangimiane liniane.

5La iya kai, “Sa inulrinulriaku ikai Yupa kiapadrelaku ku vaeva ku maburusi. La drelaku ku vaeva ku lawbubulu twalai belenge mulebe, mia ki vaeva ka maadrau ka makalrilau, ikai ki piyu kwini ki makalrilau la pakerenge si usarare ithili nakwane; 6la pudriadriingadhaku drele, ikai adringi yakai sanaka waudriwdripi, laadhadhame si lawagulagulai. 7Pacungulu, la kilalraku ku lingau ku amia kai nakwane, ‘Pitiru, ngidrakala, si culu la kane!’ 8La iyaku kai, ‘Tamatama, kainaku lri maka pia kwini, kikai kaika nitumabulane kai lamanemane, kadrwana ku takaneaneli.’ 9Twalai belenge ku vaga la pela iya kai, ‘Ku mabula iya ki Twaumase kaisu lri maka tumakudrulru.’ 10La edeede kingitulrulu pia kai. Ku bibiilrilinga, kwini lamanemane la kisawlri kipubelenge. 11Sa icengecenge mia kikwini, kudra kiasikawlu twalai Kaisaria kainganai silape nakwane ka tatulru la kelanga ki taikaiyaneli kwidra ki daane lrawlrawdru. 12Ku Siri la pelaela nakwane lu tupapalra liniane, madha kalrikilriki iya. Kwini twalai Yupa kela ka taeneme ka lasinzia la mialri karedele naiane katwase. La kelanga nai makanaelre mwa ki daane ki Kurinilriu. 13Ku Kurinilriu la pelaela naiane, ku tadrelaneini ki sasiakawlu belenge sa acegecege ikai ki daaneini, si iya kikai iniane, ‘Sikawla ki umawmase pamwa ka Yupa, si dawlu kwidra ki sia Simune Pitiru kainganai. 14Yakai ku vagaini ku aiyane muswane, ku akipalribulane numi ka wacekecekele makanaelre.’ 15Sapathagilaku kawriva, mwalebe ku Siri ikai ki kinawmasane lini mia sakapathagilane sa mulebe ku Siri ikai mitane. 16Sa mia kikai la ngulringavaku ku natakawrivane ki Tamatama, ‘Ku Yuhani arakai ku acilai pabanau, ai kunumi lri tarumara numi ku sapabanavane ki Siri.’ 17Athingalane, ku Twaumase mialri baai ki sakamaelanane ka umawmase ku migemi, mia sa kasalruta ki Tamatama ka Yesu Kirisitu yai, mialri baai mitane. Aneanaku, si maka dulrwaku telenge ki awngane ki Twaumase?”

18Sa kilalra kikai vaga kwini lalasu, la kai tulisinga kawriva, makitwa drengedrengerenga ki Twaumase iya kai, “Ku Twaumase ku angitatupelane si amalrane ku niake mialri baai ki sakamaelanane ka umawmase!”

Kiwkai ki Anetiuke

19Kaiasasane, ku lasinzia ngwalai ku takipapacadhane ki Setipane si twalai kikabebetethe la mawvagavagai sarau mwa kidruanga, yakai ku wadaruru Puinicia si Saipuruse si Anetiuke, kikai lalasu wadindu ki swa Yuda ka umawmase la sikakathane. 20Ai, yakai ku drumane ku swa Saipuruse si swa Kurini ka lasinzia wakela Anetiuke, si mialri papia ki swa Gurike pelaela ku patharukai ki hukuingi ki Tamatama ka Yesu. 21Ku puku ki Tamatama yakai tapalra liniane, la takaalra turamuru ku umawmase ku masalru, si papia ki Tamatama.

22Kikai lamiyaiya kikai la thingalenga ku swa kiwkai Yerusalrime, la sikawlu ki Barenabase mwa Anetiuke. 23Ku Barenabase sa kelanga, la drele ku tasubulrubulrwane ki Twaumase ki swakai kwini, la kiragai turamuru, si pasapukwane liniane, ku asalikavaevane ku kidremedreme lini satalu ki Tamatama. 24Ku Barenabase mwalecege ka umawmase, kiasuete ki Siri, la sapukwane ku salrwane ki kidremedremeini, ngwalai kwini takaalra ku laumawmase ku masalru ki Tamatama.

25Sakabilrilinga, ku Barenabase wamwa Tarusu silape ki Saule, 26sa kidringainga, la ililuku iniane mwa Anetiuke. Ikaai kau taracaili, kwini tadrusa la taelre ki lasinzia ki kiwkai, bulrubulru ki takaalra ka laumawmase. Ku takipasi “Kirisite” ki lakiasusunga yai twalai Anetiuke pathagili.

27Ikai kwidra, yakai ku layuginsia twalai Yerusalrime katwase papia Anetiuke. 28Ikai liniane yakai ku tangea ka sia Agabuse, kai lasu la kipelaela ki Siri, la acegecege si yugingi, kai kawmasane lri ikai ku akasilravane turamuru iya (kikai miyaiya kai sakela ki Kelawdiu icengecenge ka talialalai ngiamia.) 29Kudra lasinzia la mapalrailraingi singikai ku puku lini, rubu ku paisu si palribulu ki yakai Yuda ka lapapalra lini. 30Kikai lalasu la tungimiyaiya kwini, si sudralru ki Barenabase si Saule iluku kwini nirubwane ku paisu baai ki laciwru ki swa kiwkai.

Currently Selected:

Nisikawlane 11: NDV

Highlight

Compare

Copy