2 Latalialalai 15
15
Talialalai ki swa Yuda ka Uzia
(2 Lacaili 26.1-23)
1Saka tara 27 ka caili ku taatalialaladhaneini ki swa Iseraylri ki Yerubuame, ku lalake ki Amazia ka Uzia atalialalai ki swa Yuda. 2Ku Uzia satara 16 ku caili; kai lasu yakai Yerusalrime rathudu tara 52 ka caili. Ku tinaini sia Yekulia, ka swakai Yerusalrime. 3Ku Uzia twalralrau ki tamaini ku kakwakudhane, paiya ku kiragai ki Tamatama ku awngane. 4Ai kwini lasu kai mwalra kwini la yalrelrelrege ku biu, ku mapapangale laka thadaalraneana ikai kwini patarumaramara padalai ku sangwalreme. 5Ku Tamatama pwalebe ku amatikurwane pwa ki Uzia, la karaibiu kai lasu, makalawtu kirutututu ki caemane. Kwini lasu yakaikai ki taubabadhanane ka daane ki talialalai, ku maadrau ku awngane ki kuni laka amani ku lalakeini ka Yuthame ka marasiakaikai.
6Ku drumane ku takaungane ki Uzia ninguvavaevane pacase pikai ki lrikisi ki Latalialalai ki swa Yuda ka hungu. 7Kwini lasu la pacai, la kidralreke pikai ki cekele ki Davidi ka tadralredralrekane ki latalialalai; ku lalakeini ka Yuthame la mucungulu iniane atalialalai.
Talialalai ki swa Iseraylri ka Zakaria
8Saka tara 38 ku taatalialaladhane ki Uzia ki swa Yuda, ku lalake ki Yerubuame ka Zakaria atalialalai ki swa Iseraylri; kwini lasu yakai Samaria rathudu tara eneme ka dramare. 9Kwini lasu la mararaamau ki cucungulaneini pia ku ngialisiane lu drele ku Tamatama, twalralrau ki lalake ki Nibate ka talialalai ka Yerubuame ku malisi ku kakwakudhane, iluku ki swa Iseraylri pasalriu. 10Ku lalake ki Yabi ka Salume la balre iniane, ikai Ibeleame#15.10 “Ibeleame” patwalai ki sidrumane ka nihunyakane ka hungu, ku pacase ki Hiburu yai “yakai cucubungu ki mapapangale” amia. papacai iniane, si mucungulu iniane atalialalai.
11Ku drumane ku takaungane ki Zakaria ninguvavaevane pacase pikai ki lrikisi ki Latalialalai ki swa Iseraylri ka hungu.
12Ku Tamatama naamia kai ki talialalai ka Yehu, “Ku lagaganesu lri atalialalai ki swa Iseraylri pakela ki sakangusi supatele#15.12 “sakangusi supatele” ku Zakaria yai ngukai ki Yehu ku tamacucungulane mwasakasupatenga ka agagane..” Kikai nipukawnanenga ngiamianga.
Talialalai ki swa Iseraylri ka Salume
13Saka tara 39 ka caili ku taatalialaladhane ki Uzia ki swa Yuda, ku lalake ki Yabi ka Salume atalialalai ki swa Iseraylri; kwini lasu yakai Samaria rathudu taradramare.
14Ku lalake ki Menaheme ka Gadi twalai Tireza kela Samaria, la culrulu papacai ki Salume, si ucungulu iniane atalialalai. 15Ku drumane ku takaungane ki Salume, paelre kudra tapianeini balre, ninguvavaevane pacase pikai ki lrikisi ki Latalialalai ki swa Iseraylri ka hungu. 16Ku Menaheme sa twalai Tireza kela, sa ikai kadadalranane la papacai amudu ki swa Tipesa si laumawmase ki cekele patuelre, paelre kwini ki ngiathalringulu ka lacekele mialri papacai amudu, asi lwiyane kwini swakai kwini ku laumawmase kai papia iniane amalebe. Kwini lasu la mialri malra sanaka tawbaliri buci kwini labarange lini.
Talialalai ki swa Iseraylri ka Minahime
17Saka tara 39 ka caili ku taatalialaladhane ki Uzia ki swa Yuda, ku lalake ki Gadi ka Menaheme atalialalai ki swa Iseraylri; kwini lasu taramangeale ka caili ikai Samaria rathudu. 18Kwini lasu paiya ku ngialisiane lu drele ku Tamatama, makalawtu twalralrau ki lalake ki Nibate ku malisi ku kakwakudhane ki talialalai ka Yerubuame; ku Yerubuame makalawtu iluku ki swa Iseraylri papasalriu. 19Ku tinuhika ki swa Asiria ka Tigelathe Pilesere wakela mucekele ki swa Iseraylri; ku Menaheme la baai iniane ku 34,000 kukingi ku gingi, pakai ku nau kiparalubu amia, pakapapedrenge ki takatalialaladhaneini. 20Kikai lapaisu ki Menaheme ribicini patwalai ki sapaiswane ki swa Iseraylri; kwini lasu wavutha ki tangeea ki umawmase baai ku malrimale ku gingi. Ku Tigelathe Pilesere sa malranga kwini lagingi la siwlri mwa ki kuni lini.
21Ku drumane ku takaungane ki Menaheme ninguvavaevane pacase pikai ki lrikisi ki Latalialalai ki swa Iseraylri ka hungu. 22Kwini lasu la pacai; la mucungulu iniane ku lalakeini ka Pekahia atalialalai.
Talialalai ki swa Iseraylri ka Pekahia
23Saka taramalrimale ka caili ku taatalialaladhane ki Uzia ki swa Yuda, ku lalake ki Menaheme ka Pekahia atalialalai ki swa Iseraylri; kwini lasu yakai Samaria rathudu taradrusa ka caili. 24Kwini lasu paiya ku ngialisiane lu drele ku Tamatama, twalralrau ku ngialisiane ka kakwakudhane ki lalake ki Nibate ka talialalai ka Yerubuame, ililuku ki mapapangale ki swa Iseraylri pasalriu. 25Kai Pekahia yakai ku tangea ku mabelenge ki kwapingini ka sia Peka ka lalake ki Remalia, la mailuku ku twalai Gileade ku tamalrimale kela baebalre, la ikai Samaria ki adringi ki daane ki talialalai culrulu papacai ki Pekahia, si ucungulu iniane atalialalai.
26Ku drumane ku takaungane ki Pekahia ninguvavaevane pacase pikai ki lrikisi ki Latalialalai ki swa Iseraylri ka hungu.
Talialalai ki swa Iseraylri ka Peka
27Saka tara 52 ka caili ku tarathudane ki talialalai ka Uzia ki swa Yuda, ku lalake ki Remalia ka Peka atalialalai ki swa Iseraylri; kwini lasu taramapusale ka caili rathudu ikai Samaria. 28Kwini lasu paiya ku ngialisiane lu drele ku Tamatama, twalralrau ki lalake ki Nibate ka talialalai ka Yerubuame ku ngialisiane ku kakwakudhane, ililuku ki swa Iseraylri pasalriu.
29Saicengecenge atalialalai ku Peka, ku tinuhika ki swa Asiria ka Tigelathe Pilesere wadrikisi malra kavai talikai kwini Iyune, Abele Bethe Maka, Yanuha, Kedese, si Hazure ka lacekele, la ikaiyana ka Gileade, Galrilri, si Napetali talikaiyane kwini, si malra kwini ki laumawmase ravase pwa kavai Asiria.
30Saka taramapusale ka caili ku taatalialaladhane ki lalake ki Uzia ka Yuthame, ku lalake ki Husia ka Ila wabalre ki talialalai ka Peka, si culrulu papacai iniane, la ucungulu iniane atalialalai. 31Ku drumane ku takaungane ki Peka ninguvavaevane pacase pikai ki lrikisi ki Latalialalai ki swa Iseraylri ka hungu.
Talialalai ki swa Yuda ka Yuthame
(2 Lacaili 27.1-9)
32Saka taradrusa ka caili ku taatalialaladhane ki lalake ki Remalia ka Peka, ku lalake ki Uzia ka Yuthame atalialalai ki swa Yuda. 33Sakamani kwidra ku Yuthame tara 25 ku cailini; kwini lasu tara 16 ka caili rathudu ikai Yerusalrime. Ku tinaini sia Yerusa, ka lalake ki Zaduke. 34Ku Yuthame twalralrau ki tamaini ku mathariri ku kakwakudhane, paiya ku kiragai ki Tamatama ku awngane. 35Ai kwini lasu kai mwalra ku biu ku yakai lrelrelrege, ku laumawmase laka thadaalraneana ikai kavai patarumaramara padalai ku sangwalreme. Ku Yuthame paiya ku lrawlrawdru talikai Dradha ka lrawlrawdru ki daane ki Twaumase.
36Ku drumane ku takaungane ki Yuthame ninguvavaevane pacase pikai ki lrikisi ki Latalialalai ki swa Yuda ka hungu. 37Saka talialalai kai lasu, ku Tamatama siakawlu ki talialalai ki swa Siria ka Rizingi si talialalai ki swa Iseraylri ka Peka mwa kikaruburu ki swa Yuda. 38Sapacai ku Yuthame, kiadralreke ikai ki cekele ki Davidi ka tadralredralrekane ki latalialalai; ku lalakeini ka Ahaze la mucungulu iniane atalialalai.
Currently Selected:
2 Latalialalai 15: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
