2 Latalialalai 14
14
Talialalai ka Amazia
(2 Lacaili 25.1-14)
1Ku talialalai ki swa Iseraylri ka lalake ki Yehuahaze ka Yehuase saka taradrusa ka caili ku taatalialaladhaneini, ku lalake ki Yuase ka Amazia atalialalai ki swa Yuda. 2Kwini lasu satara 25 ku cailini atalialalai, yakai Yerusalrime rathudu tara 29 ka caili. Ku tinaini ka Yehuadingi yai swakai Yerusalrime. 3Ku Amazia paiya ku kiragai ki Tamatama, ai kwini lasu kai maiya ki cucungulaneini ka talialalai ka Davidi, twalralrau kamani ki tamaini ka Yuase. 4Kai wasuburu ku yakai ki lalrelrelrege ku biu, ku mapapangale thadaalraneana ikai kwini patarumaramara lama ku sangwalreme.
5Ku Amazia sa pakapapedrengenga ku tarathudane, papacai ki papacai ki tamaini ka talialalai, 6ai kwini lasu kai papacai ki lalalake lini. Kwini lasu paluludu ku drekase ki Tamatama pikai ki hulrice ki Musi; ku Musi amia kai, “Ku marudrawdrange kai lri ngwalai ki pasalrivane ki lalalake si kipapacai; ku lalalake la mialri kai lri ngwalai ku tapasalrivane ki marudrawdrange si kipapacai. Ku tangea lri ngisasiamece kudra pasalrivaneini.”
7Ku Amazia yakai kavai tali lrawdru ki Titimwane ka laveke kwini ki valrwalru ka Timu papacai ku takudrai ku swa Idume, la malra ka cekele Sila, la pabalrithi ku nagane pasi Yekethele, pakelanga kaiasasane sianaganeana kikai nagane.
8Ku Amazia siakawlu mwa kidrele ki talialalai ki swa Iseraylri ka Yehuase, papia iniane kiececebe. Si iya kai, “Tamadredrele ikai ki tamakakaruburuburane!” 9Ai ku talialalai ka Yehuase twabalre ku vagaini iya kai, “Yakai saka nikingivalane, ku vaeva ku cecenekane ka angatu ikai lregelrege Lebanungu kawariva ki cedare ka angatu iya kai, ‘Malra ki lalakesu ka ababai pamwa karudrange ki lalakeli!’ La ikai ku vaeva ku waudriwdripi ku ngwakakai kwini lribate, la dredre kwini ki cecenekane ka ubulu pakababurau. 10Amazia, sa pamalebesu ki swa Idume kwini kidremedremesu lri ngikalrilrigusu; nai ngwalaisu kikai si ngulwadhanenga. Ikaiya tavanane, asingithanga pasasarau, la kipakwalri la pakwalri ki mapapangale?”
11Ku Amazia la kai kilalra. Ku talialalai ki swa Iseraylri ka Yehuase la sangiluku ki lakwapingi; si ikai kavai Yuda ki Bithe Simise makakaruburu kai Amazia ka talialalai ki swa Yuda. 12Ku kwapingi ki swa Yuda la amaki, ku lakwapingi makanaelre la makitu mubere mubalriu. 13Ku Yehuase la ravase ki Amazia, mucekele ka Yerusalrime, la malra kwini twalai Iparaime ka lrawlrawdru kela ki Piyu ka lrawlrawdru ku lragiane 200 ka mituru, kwini balingibingi ki alradre ki cekele maburuku patuelre. 14Ku Yehuase la malra patuelre patwalai ki daane ki Twaumase kwini kingi, gingi, lawbubulu si takuciacingalre ka tacekecekelane ki daane ki talialalai nguelre iluku mwa Samaria, la mialri iluku ku tapia ku laumawmase ku niravasane.
15Ku takaungane ki Yehuase, paelre ku drumane, ku takagarangane makakaruburu ki talialalai ki swa Yuda ka Amazia, ninguvavaevane pacase pikai ki lrikisi ki Latalialalai ki swa Iseraylri ka hungu. 16La pacai ku Yehuase, si kidralreke pikai Samaria ki tadralredralrekane ki latalialalai; ku lalakeini ka Yerubuame la mucungulu iniane atalialalai.
Wapacai ku talialalai ki swa Yuda ka Amazia
(2 Lacaili 25.25-28)
17Sapacainga ku talialalai ki swa Iseraylri ka Yehuase, ku talialalai ki swa Yuda ka Amazia, panianiakeana tara 15 ka caili. 18Ku drumane ku takaungane ki Amazia ninguvavaevane pacase pikai ki lrikisi ki Latalialalai ki swa Yuda ka hungu.
19Ikai Yerusalrime, yakai ku pasana kibubuli papacai ki Amazia, lakamani kwi lasu katwase mubere mwa kavai cekele Lakise, ai kwini badha mabibilrili iniane mwa kavai, la papacai iniane. 20Yakai ku umawmase ku wamalra ku kinawmasaneini paaba ki rigi pasiwlri mwa Yerusalrime, la dralreke pikai ki cekele ki Davidi ka tadralredralrekane ki latalialalai. 21Ku mapapangale ki swa Yuda la cegecege paatalialalai ki lalakeini ka tara 16 ka caili ka Uzia. 22Sa pacainga ku Amazia, ku Uzia wasawlri malra kavai Ilatha, la pudriadringai tubavane.
Talialalai ki swa Iseraylri ka Yerubuame#14.23 “Yerubuame” ikai ki swa Iseraylri ka latalialalai tadrusa ku sianagane kikai nagane, kikai lasu la ka mwasakadrusa. Ludrelane ikai ki mwasaka 24 ka vaga yakai ku tamatikaiyane ki aswalala ka Yerubuame ka talialalai, si ku wadrele madu ikai ki 1 Latalialalai 11.26–14.20 ku tamatikaiyane iniane.
23Ku talialalai ki swa Yuda ka lalake ki Yuase ka Amazia saka tara 15 ka caili ku taatalialaladhane, ku lalake ki Yehuase ka Yerubuame atalialalai ki swa Iseraylri; kwini lasu yakai Samaria rathudu tara 41 ka caili. 24Kwini lasu paiya ku ngialisiane lu drele ku Tamatama, twalralrau ki aswalala iniane ka lalake ki Nibate ka lalakeini ka Yerubuame ku malisi ka akitwalravane, ililuku ki swa Iseraylri pasalriu. 25Kwini lasu wamalra sawlri patuelre sanaka kadaengane ki swa Iseraylri, twalai tali dradha ka salralriwgu ka Hamathe kela kavai tali lrawdru kavai ki Titimwane ka laveke. Kikai amani kudra pangukai ki Tamatama ka Twaumase ki swa Iseraylri ki sasiakawluini ka yuginsia ka Yuna ka lalake ki Amitai ka swakai Gathe Hepere kawriva sakalai ka vaga.
26Ku Tamatama wadrele ki swa Iseraylri ka kiapadradresenge ku maadrau ku amatikurwane, kadrwa ku umawmase ku paralubu liniane. 27Ku Tamatama kai palraingi ki swa Iseraylri kapalralrawthunga kamudu, lakamani kwidra pangukaini ki Yerubuame palribulu liniane.
28Ku drumane ku takaungane ki Yerubuame, ku takagaranganeini ikai ki tamakakaruburane si tapangimianeini sawlri ka Damasekuse si Hamathe, pasiwlri ka swa Iseraylrianenga ka kadaengane, ninguvavaevane pacase pikai ki lrikisi ki Latalialalai ki swa Iseraylri ka hungu. 29Sapacai ku Yerubuame, kiadralreke pikai ki tadralredralrekane ki latalialalai; ku lalakeini ka Zakaria la mucungulu iniane atalialalai.
Currently Selected:
2 Latalialalai 14: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
