2 Latalialalai 13
13
Talialalai ki swa Iseraylri ka Yehuahaze
1Ku talialalai ki swa Yuda ka lalake ki Ahazia ka Yuase saka tara 23 ka caili, ku lalake ki Yehu ka Yehuahaze atalialalai ki swa Iseraylri; kwini lasu yakai Samaria rathudu tara 17 ka caili. 2Kwini lasu mararaamau ki aswala iniane ka talialalai ka Yerubuame pia ku ngialisiane lu drele ku Tamatama, waililuku ki swa Iseraylri pia ku ngialisiane lu drele ku Tamatama. 3Lakamani kwidra, ku Tamatama papia ki swa Iseraylri kalisi, la palraingi ki talialalai ki swa Siria ka Hazaele si lalakeini ka Bine Hadade apapelaela pamalebe ki swa Iseraylri. 4Sakabilrilinga, ku Yehuahaze la kitubi ki Twaumase, ku Tamatama la drele ki talialalai ki swa Siria arakai ku matiangeange dredrepete ki swa Iseraylri, la kilalra ku tainulrianeini. 5Ku Tamatama la patarumara ki swa Iseraylri ku tangea ku tarapalribulribulu, kikai tarasangililuku la pakidaili ki sadredrepetane ki swa Siria. Lakamani, ku swa Iseraylri la ngimia ki siaswalane kisupisupilri ku akasulivalivatane. 6Ai kwini lalasu thadaalraneana pasalrisalriu ku tapasalrivane ki Yerubuame sangiluku ki swa Iseraylri pasalriu, kai kiadaili cilri ki samiamiange, ikai Samaria yakaaiyana ku Asera ka samiamiange ka ababai.
7Ku talialalai ki swa Siria waamudu ku kwapingi ki Yehuahaze, la malra liniane paparu thuvugu dredre, la pasusurunga ku tamalrialrimalenga ku tarangurigi ka kwapingi, mangeale ku palridingi ka rigi, kudrai ku taradadavace ka kwapingi.
8Ku takaungane ki Yehuahaze ku drumane si takagaranganeini ninguvavaevane ka nipacasane pikai ki lrikisi ki Latalialalai ki swa Iseraylri ka hungu. 9Kwini lasu sa pacai, la kidralreke pikai Samaria; ku lalakeini ka Yehuase la mucungulu iniane atalialalai.
Talialalai ki swa Iseraylri ka Yehuase
10Ku talialalai ki swa Yuda ka Yuase saka tara 37 ka caili ku takatalialaladhaneini, ku lalake ki Yehuahaze ka Yehuase atalialalai ki swa Iseraylri; kwini lasu yakai Samaria rathudu tara 16 ka caili. 11Kai lasu paiya ku ngialisiane lu drele ku Tamatama, twalralrau ki Yerubuame sangiluku ki swa Iseraylri pasalriu. 12Ku drumane ku takaungane ki Yehuase, paelre ku takagaranganeini ikai ki takikaruburuburane, sa kiecebe ki Amazia ka talialalai ki swa Yuda, ninguvavaevane pacase pikai ki lrikisi ki Latalialalai ki swa Iseraylri ka hungu. 13Ku Yehuase la pacai, la kidralreke pikai Samaria ki tadralredralrekane ki latalialalai; ku lalakeini ka Yerubuame la mucungulu iniane atalialalai.
Wapacai ku Ilrisa
14Ku yuginsia ka Ilrisa macaeme kipakilringau; kwini lasu sa lri padaalrunga si pacai, ku talialalai ki swa Iseraylri ka Yehuase wamwa lrikape iniane, takutubitubi takukaralealeale, “Ama, ama! Ka sapukwane ka tarapalakebe ki swa Iseraylri!”
15Ku Ilrisa la cunu ki talialalai, “Lu malra ku bu si lraili.” Ku Yehuase la malra si kela. 16Ku Ilrisa la papadulru iniane bilakace ku bu, ku talialalai la pangimia pia. Ku Ilrisa la malra ku alrimaini pwa belenge ki alrima ki talialalai, 17ku talialalai la singikai ku taiyane ki yuginsia muelebe kudra wacubungu Siria ku lribange. Ku Ilrisa la iya kai, “Lraila!” Ku lraili ki talialalai sa lraili, ku yuginsia la karaleale, “Amanisu ku lraili ki Tamatama, lri arakai kikai lraili pamalebe ki swa Siria. Lri ikaisu kavai Apeke kikaruburu ki swa Siria, pakeela ku apamalebeanesu liniane.”
18La pacungulu ku Ilrisa kawriva ki talialalai malrana kwini drumane kwini lraili si lraili ki daedae iya, ku talialalai la sangu tulrulu lraili ala idrengere. 19Ku umawmase ki Twaumase ka Ilrisa la kai kiragai, la iya kai ki talialalai, “Naika walrailisu kingilrimale kinginemele, lu mia kwini, nai dulrungasu pakisalrunga pamalebe ki swa Siria; ai kikainga lri kingitutulrulusu akaci liniane.”
20Ku Ilrisa la pacai; kwini lalasu la dralreke iniane.
Lukacaili ku swa Muabe taturededelane kela kikaruburu ki swa Iseraylri. 21Saka nikingivalane, yakai ku umawmase ku yacengeecenge dralredralreke ki wapacai, la kirimu drele ku twaredelane ku umawmase kaingananganai, la malra kwini kinawmasane cilri pwa ki takidralrekane ki Ilrisa, la mubere. Kwini wapacai ka kinawmasane sa kupungupungu ki culrale ki Ilrisa, kwini wapacai la siela panianiake, si acegecege.
Tamakakaruburane ki swa Iseraylri si swa Siria
22Saka talialalai ku Yehuahaze, ku talialalai ki swa Siria ka Hazaele kai watelrai dredrepete ki swa Iseraylri. 23Ai ku Tamatama ngwalai ku takiketeketane ki Aberahame, Isake, Yakubu, la kilibalibake ki swa Iseraylri, paralubu liniane, kai palraingi ku waamudu liniane. Ku Twaumase kadrwa ku takarimurane ki kawkawluini.
24Ku talialalai ki swa Siria ka Hazaele la pacai; ku lalakeini ka Bine Hadade mwacungulu iniane atalialalai. 25Ku talialalai ki swa Iseraylri ka Yehuase sangwatulrulu pamalebe ki Bine Hadade, la sawlri malra kudra napakimalra ki tamaini ka Yehuahaze ki Bine Hadade kwidra lacekele.
Currently Selected:
2 Latalialalai 13: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
