2 Latalialalai 12
12
Talialalai ki swa Yuda ka Yuase
(2 Lacaili 24.1-16)
1Ku talialalai ki swa Iseraylri ka Yehu saka tarapitu ka caili ku takatalialaladhaneini, ku Yuase atalialalai ki swa Yuda. Kwini lasu yakai Yerusalrime rathudu taramasupatele ka caili. Ku tinaini ka Zibia yai swakai kavai cekele Bereseba. 2Ku Yuase ku tapanianiakaneini paiya ku kiragai ki Tamatama ku awngane, asi lwiyane amani ku barakalai ka Yehuiada ka wabulrubulru iniane. 3Ai, kwini lasu kai mwalra ku biu ku yakai lalrelrelrege, ku mapapangale laka thadaalraneana ikai kwini patarumaramara padalai ku sangwalreme.
4Ku Yuase la dawlu sarubu ki labarakalai, cunu liniane malra kwini laapatarumarane si baai ki daane ki Twaumase ku paisu, adravane ka wabaai ku sarakaikaiyane patarumara ku paisu ku ngiatatukidremedreme si patarumara ku paisu, tara sarubwa si pikaai iya. 5Ku tangea ku barakalai naika kiacaapili kwidra baai ku paisu ki pasikaikaini kaungu ku laumawmase. Kikai lapaisu arakaiyane tusapudriadringadhane ki daane ki Twaumase.
6Ai, sa darurunga ki tara 23 ka caili ku taatalialaladhane ki Yuase, ku labarakalai kaiyana twapudriadringai ki daane ki Tamatama. 7Ku Yuase la dawlu kikawriva ki Yehuiada si drumane ka barakalai, kivaga liniane, “Anu kai pudriadriadringai ka daane ki Twaumase? Twalainga kai, madha pudringadringainga ku paisu, malra kwini lapaisu putaluvaivai, lani sara ngivelevele kikai apudriadringadhane kai awngane.” 8Ku labarakalai la palraingi kai malranga ku paisu, la kai marasikainga pudriadringai ki daane ki Twaumase.
9Ku barakalai ka Yehuiada la malra ku vaeva ku langiane, kwini ki sacaecaebane belenge la tutaluvale lutu, si pikai thili ki tapatarumaramarane, yakai tali vanale ki samamudaane ki daane ki Tamatama. Kwini yakai ki samamudaane drangalru ka barakalai la malra kwini baai ki wakela sukubu ka laumawmase ku paisu patuelre puadringi ki langiane. 10La kakalranga ku yakai ki langiane ku paisu, ku tarapacase ki talialalai si abebeelengenga ki barakalai la kela, la malra derenau kwini gingi, si tintingi#12.10 “derenau kwini gingi, si tintingi” ku wahunyake madu iya kai “waasipi kwini gingi si cabu”.. 11Kwini lalasu sa pacasenga ku takathane, la malra kwini gingi baai ki tamatama ki lri pudriadringai ki daane ki Twaumase. Kikai laumawmase la baai ku tamulrawlravane ki daikusange ki angatu, si tarapudriadringai, 12daikusange ki simintu, si taratulrenege, la langai ku saarakaiyane pudriadringai ku thinuradane si lanitulrenegane, si drumane ku nipakatwasane ku paisu patuelre. 13Ai kikai lapaisu kaika arakaiyane darepe tugingi ka kupu, kisi, rapa, kaciane ki tatinakiane, si drumanenga ka takaiyane ka kingi ka gingi, 14arakaiyane sikakathane ki sapawlrawlravane si salangadhane ku saarakaiyane pudriadringai. 15Ku tamatama ki awngane ki pwadriadringai ku umawmase lri tara kamani kudra tengatengane ka asudralrwalrwane, kai kidredreme ku wamwana taelre liniane asipi ku paisu. 16Kudra la wabaai ku paisu ki Samupasalrivanane ka lrisi si Balrithane ki pasalrivane ka lrisi kai lri puadringi kai ki langiane; kikai lapaisu yai barakaladhane.
17Sakamani kwidra, ku talialalai ki swa Siria ka Hazaele la mwa kikaruburu ki cekele Gathe, si malra, la kalritheethe ku kiakaruburu mu Yerusalrime. 18Ku talialalai ki swa Yuda ka Yuase, wamalra ku acebe si patarumara baai ki Twaumase ki cucungulaneini ka Yehusapate, Yehurame si Ahazia, la padrima ku patarumaraini, si yakai ki daane ki Tamatama si tapaiswane ki daane ki talialalai patuelre ku kingi, tusaceacebe baai ki talialalai ka Hazaele, ku Hazaele la sangiluku ki kwapingini katwase Yerusalrime.
19Ku drumane ku takaungane ki Yuase ka talialalai ninguvavaevane pacase pikai ki lrikisi ki Latalialalai ki swa Yuda ka hungu.
20-21Ku lamabelenge ki Yuase ka talialalai la kidremedreme ku akiecebane; kikwini la ikai ku tadrusa, ku tangea amani ku lalake ki Simeathe ka Yuzakare, ku tangea amani ku lalake ki Sumere ka Yehuzabade. Kwini lalasu yakai ki papia Sila kadadalranane, ikai ki taluvale ki daane, ki tapudaeane dralreke tali talrawane Yerusalrime papacai ki Yuase. Ku Yuase kiadralreke pikai ki tadralredralrekane ki talialalai ka cekele ki Davidi; ku lalakeini ka Amazia la mucungulu iniane atalialalai.
Currently Selected:
2 Latalialalai 12: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
