Dutuuc 18

1Na ci kaake lɔ, ke jiɛl ne Athenai, ku leer Korintho. 2Ku yok ran de Judai thin cɔl Akula, ne dhieth ne Ponto, ne piɔc bɛn ne Yitalia kene tiŋde Pirithikila, ne loŋ cii Kulaudio luel, ye jiɛl Judai kedhia ne Roma: go lɔ enɔŋ keek; 3ku ceŋ ke ke, ku ye lui ke keek ne luɔi toŋ thoŋ; luɔiden ee ye cuɛc de akema. 4Ku ye wel tɛɛr ke kɔc luaŋ de gueer ne thabaath kedhia, ku ye Judai kuɛm nhiim kene Girikii.

5Ɣɔn ye Thila ku Timotheo yi cik bɛn ne Makedonia, ke Paulo weet kɔc areet, lek Judai ye Yecu kee Kritho. 6Goki teer, ku lɛɛtki Nhialic, go alɛthke teŋ, ku yook ke, Ye we nak roth; ku ɣan ɣer: an bi bɛr lɔ enɔŋ Juurkɔk miak. 7Go jaal thin, ku leer ɣon de ran cɔl Tito Juthuto, ran ye Nhialic lɔŋ, thiɛke ɣonde ke luaŋ de gueer. 8Ku Kirithipo, bɛny de luaŋ de gueer, go Bɛnydit gam kene kɔcke kedhia; go Korinthoi juec piŋ, goki gam, ku baptith ke. 9Go Bɛnydit Paulo yɔɔk ne wɛɛric ne nyuɔth, Ye duɔne riɔc, ye jam, ku duk ye mim; 10ɣan tɔ wɔ yin, acin ran bi yi nɔk: kɔc jueccie aatɔ yepane. 11Go ceŋ thin ne run tok ku pɛi keedhetem, ye kɔc wɛɛt ne wɛt de Nhialic.

12Ɣɔn ne kol tɔne Galio madir de Akaya, go Judai roth jɔt etok, ku leerki Paulo, leerki te de luk, 13lek jam, Yi yerane ee kɔc kuɛm nhiim bik Nhialic ya door ne luɔi ce cit luɔi de looŋ. 14Go ye Paulo ye jiɛm, ke Galio yook Judai, Ye na rɛɛc ku ye luɔi manke, we Judai, e kagam: 15ela ku ye wel ku rin ku looŋkuɔn, ke carka ne gupkuɔn; an cin piɔu luŋ de keekake. 16Ku ciec ke wei te de luk. 17Goki Thothene bɛny de luaŋ de gueer dɔm, ku duiki ne luk nom. Go Galio cuɔk thɛny rɔt.

18Ɣɔn ye Paulo ye ci ceŋ thin ne nin juec ne yeluɔine, ke tɔŋ mɛɛthke, ku kɛɛc riɛi, jiɛl thin leer Thuria kene Pirithikila ku Akula; ku ci yenom muut ne Kenkurea: ne kuɛŋ cen mel kueeŋ. 19Goki ɣet Epetho, ku nyiɛŋ ke thin: ku leer luaŋ de gueer le wel tɛɛr kene Judai. 20Goki thiec bi dhiac ke ceŋ kene keek, go cuɔk gam; 21ku tɛɛŋ keek jiɛm, Ye na tɔ ne Nhialic piɔu, ke we ba bɛr dhuɔk, ku kɛɛc riɛi ne Epetho. 22Lee kɛɛc piny Kaithareia le en kanitha thiec, ku jiɛl ler Antiokia. 23Dhiɛc en thin areet, ku jiɛl kuɛny Galatiaic agut Purugia, ku cɔk kɔcpiocke rir.

24Go Juda toŋ cɔl Apolo, ne dhieth ne Alekandaria, ran nyic kaŋ, go bɛn Epetho; ku nyic ka ke Nhialic cike gɔɔr areet. 25Ee ran ci wɛɛt ne dhol de Bɛnydit; ku leth piɔu areet, ye jam ye kɔc wɛɛt ne ka ke Yecu, ku nyic baptith de Jɔn abac. 26Ku gɔl jam luaŋ de gueer ke ce piɔu riɔc. Na ci Pirithikila ku Akula ye piŋ, goki loom, ku nyuuthki apiath ne dhol de Nhialic. 27Go piɔu naŋ bi wɛr teem bi lɔ Akaya, go kony ne mɛɛthke, ku gɔrki waragak ne kɔcpiocke bik loor: ɣɔn ye ci ɣeet, ke kony kɔc areet, kɔc ci gam ne athiɛi: 28ku tiɛm Judai ne wel ne kɔc nhiim, nyuuth ke ne kacigɔɔr ye Yecu kee Kritho.

Currently Selected:

Dutuuc 18: LEKJOT

Highlight

Compare

Copy