ROOM DIMA 13

1Ya kyɛ ka sɔkam zaa sakki n‑ti tinkpamma, ni ban su fukumsi la zaa. Dama kpamni ni fukumsi n ka ni m‑bu yi Naawunni saani na. Ŋɔn Naawunni pun zaali naam fukumsi dima an bɛ ni zaa. 2Ka ŋɔnkam za'asi fukumsi dima, di daama za'asi la Naawunni ŋɔn zaali seela. Ka seeba ban za'asi ba la muna - ba sumsi la tubdarigri. 3Yɛlimaŋni, ŋɔni n zɔri fukumsi dima dabeem? - Di pa la seeba ban tumni tunsuma la, amaa ban tumni tumbeeri la. I yi boori ni i bɛ ni ka ku zɔri fukumsi dima dabeem, nyin tumma tunsuma ka ba nin pɛ'ai i. 4Ŋɔn su naam fukumsi la nyɛ la Naawunni tuntumna, i suŋŋsim zugu. Amaa i yi ti tum din bu tuusi, nyin zɔma u, dama u bu mari naam yiiko maa yɔri; dama u nyɛ la Naawunni ŋɔn zaali sɔ ni u ti zaŋŋi ŋɔn Naawunni sufuyisigri n‑darigri tumbeeri dima tuba. 5Dizugu di sum ni ti sakkri n‑tiri naam fukumsi dima, pa dabeem zugu kɔkɔa, amaa ti sufu ni teesa ŋɔn mi, ni, lala veela maa zugu. 6Lala zugu gba ka ya yoori lampoo ni faarigu, dama ban deaari maa tumni n‑tiri Naawunni ni nimbirimoaa. 7Halli ya tima sɔkam zaa din sum ni u deaai seem. Di yi zaani toosigu, ya toosima; ka di yi kpa ya ni ya yɔ lampoo bee faarigu, ya yooma; halli ŋɔnkam sum gyirima tisibu, yan tim u gyirima ni tibsiri.

8Yan di di sɔ zaa samni. Sanseaa bu dɔli ya, di yi pa la, ni, ya wuri taaba; dama ŋɔnkam wuri u taraana pun dɔli la zaaligu zaa. 9Ya mi zaaligudima la yɛla: ni, “Di tum zina.”, ni, “Di ku ninsaala.”, “Di zu.”, ni, “Di kyɛ ka i sufu kɔrisi kpɛ i kpeaa buna zugu.” - halli ni an kpalim zaa m‑paasi: tɔ, a zaa bɛ la yɛlli yinni wa puuni, ni, “Wuri i taraana hoo nyin wuri i mammaŋŋa seem la.” 10Wurilim daana ku toaai n‑sa'am u taraana yɛla, lala zugu ka wurilim lu n‑ti zaaligudima la zaa.

11Tɔ, ya tumma anŋɔa, dama ya mi saha maa ŋɔn paai seem la. Saha paaya: yan neaam goom ni, dama ti tuliginsim saha maa ku laa n‑yuui hoo din daa yuui seem tin daa daŋŋi n‑niŋi Naawunni yɛdda sahanseaa la. 12Yuŋŋu kyɛnni n‑gatta, ka beoo ya neaai. Dizugu ya kyɛ ka ti za'asi tunseesi an tumni zibsim ni la zaa, ka zaŋŋi la neesim ni tuma hoo tɔbbiisi ŋɔn zaŋŋi ba neema ni ba ti tuusi tɔppu seem la. 13Wuntaŋŋa ni ka ti bɛ ni, dizugu ya kyɛ ka ti beebu dɔli la soori, ka pa la dimaŋŋa ni daam nyuubu, bee, pɔ'agoorilim ni dɔgoorilim ni tumbeeri zaa, bee, zaba ni nyuuri zappu. Ay, ya kyɛl anŋɔ zaa m‑basi, 14ka zaŋŋi ti Dugma Yisa Kirisita Masiiya n‑niŋi ya beesigu ni, hoo nira ŋɔn yi yɛ u sutura seem la. Ka yan di dɔli ya ningbinkɔrisi yuubu tumbeeri maa, halli beela.

Currently Selected:

ROOM DIMA 13: maw

Highlight

Copy