ROOM DIMA 14

1Ninvugsɔ yi bɛ ni ka u yɛdda bu kpeem Naawunni dɔligu ni, yan deaam u ya saani, amaa yan di ŋmɛ u nangbankpeemni zaŋŋi n‑kyaŋŋi u kyisigu yɛla. 2Dama seeba mari la yɛdda din kyɛ ka ba diri bunseelikam zaa; seeba mun yɛdda bu kpeem, ka ba diri la zɛvaari kɔkɔ di zugu. 3Ninvugsɔ ŋɔn nin toaai n‑di bunseelikam zaa la di galim ŋɔn bu diri la, ka ninvugsɔ ŋɔn diri zɛvaari kɔkɔ la gba di galim ŋɔnla, dama Naawunni deaai di daama gba. 4I nyɛ la ŋɔni n‑katti sɔ daabri sariya? Di ti nyɛ la ŋɔn su u maa n nin baŋŋi u nyaŋŋiya, bee, u luya. Halli u nin nyaŋŋi n‑zɛ yummu, dama u dugma nin toaai n‑kyɛ ka u nyaŋŋi. 5M‑paasi yaasa, seeba saani dabsiseesi veela n‑gaari taaba, ka seeba mun saani ka a zaa nyɛ la yimmu. Sɔkam zaa zaanma suŋŋa u toori teesa puuni. 6Sɔ yi gamsiri dabsa, Naawunni yuuri zugu ka u niŋni lala; sɔ mun yi diri seelli zaa, Naawunni yuuri zugu ka u dira, dama u puusiri la Naawunni bundirigu zugu; halli sɔ yi bu sakki n‑diri bundiriseesi, Naawunni yuuri ka ŋɔn gba niŋni lala, ka ŋɔn gba puusiri la Naawunni u bundirigu zugu. 7Dama ti sɔ ka ni m‑bɛ u toori zugu, sɔ mun ka ni n‑kpiiri u kɔkɔ zugu. 8Ti yi bɛ ni, ti Dugma zugu ka ti bɛ ni; ti mun yi kpi, ti kpi la ti Dugma zugu. Dinzugu ti yi bɛ ni, bee, ti kpi ni, ti Dugma n su ti yɛla zaa. 9Dinŋɔ zugu ka Kirisita daa kpi ka laa n‑yisigi kum ni: ni, u leebi ban pun kpi, ni ban na bɛ ni maa zaa, Dugma. 10I nyɛ la ŋɔni? - nyin ŋɔn galimni i mabiiya n‑zeemni u lala? Ti zaa nin ti zaani Naawunni maa tooni ka u kari ti sariya. 11Dama di sɔbi n‑dooli, ni#:-

“ ‘Mani m bɛ ni, ’

- Lala ka ti Dugma yɛli -

‘Ka m pɔ la noori di zugu, ni,

Sɔkam zaa nin gbaani n tooni,

Sɔkam zaa nin baŋŋi ka sakki, ni,

Mani n nyɛ Naawunni.’ ”

12Dizugu ti sɔkam zaa nin tɔ'asi u toori beebu yɛttɔ'a n‑ti Naawunni.

13Dinzugu ti di laa n‑galimni taaba, amaa ya kyɛ ka ti gɔsi tin nin niŋi seem ka ti mabiisi di burigi, bee, n‑lu tumbeeri ni. 14Man ŋɔn bɛ Kirisita ni maa kyɛ ka man bu nya ka bundiriseaa kyisiri ka toori; amaa sɔ yi teesi u sufu ni, ni, ka kyisira, dinŋɔna ka siri kyisiri n‑ti di daama. 15I yi daamni i mabiiya nyin diri seelli zugu, dinŋɔna i bu tumni la wurilim zugu. Kirisita daa kpi u zugu, ka nyin di kyɛ ka i bundirigu diibu zugu ti sa'am u yɛla. 16Yan di kyɛ ka bunsunseaa yan mari maa ti nya yubeoo. 17Dama Naawunni naam maa pa la diibu, ni nyuubu; amaa naam maa nyɛ la yɛlimaŋni, ni sufudoaa, ni nya'asim piiniseaa Naawunni Sii maa ŋɔn tisira. 18Ka sɔ yi dɔli la soori wa n‑gyeemni Kirisita, Naawunni nini tigi di daama, ka u yuuri du ninsaalidima saani. 19Lala zugu, ya kyɛ ka ti gɔsiri la bunseesi an nin mari sufudoaa ka kyɛ ka ti suŋŋni taaba ka kyɛnni tooni. 20Yan di kyɛ ka bundirigu zugu ti sa'am Naawunni ŋɔn maali seelli. Bundiriseelli bu kyisira, amaa di bu veeli ni i di seelli ka di nin kyɛ ka i mabii maa lu tumbeoo ni. 21Ti yi ŋɔbi numni, bee, n‑nyu daam, bee, anŋɔ taabu zaa, ka lala zugu kyɛ ka ti mabii lu tumbeeri ni, dinŋɔna ti di ŋɔbi, bee, n‑nyu a, halli fiiŋ. Lala n sɔa. 22Kur mari i yɛdda wa yɛla suŋŋa, nyin ni Naawunni saani. Zugsuŋŋu nin bɛ ni n‑ti ŋɔn baŋŋi u sufu ni, ni, ŋɔn niŋni seem wa ka galinsi. 23Amaa ŋɔn birisiri ŋɔn di seelli maa zugu, ka naayi di, Naawunni nin galim di daama di zugu, dama u bu dɔli la u yɛdda soori. Ka seelli zaa din bu dɔli yɛdda nyɛ la tumbeoo.

Currently Selected:

ROOM DIMA 14: maw

Highlight

Copy