ROOM DIMA 12

1Dizugu n susiri ya ni, m mabiisi, Naawunni nambɔzoaa zugu, ni, ya zaŋŋma ya mansi m‑maali sara n‑ti Naawunni ka u nini tigi. Di nyɛ la: yan na nɛ wa, ya nin leebi Naawunni dinni, dama dina n nyɛ gyeeŋŋu maŋni n‑tiri u. 2Yan di kyɛ ka duniya wa dima beesigu mugsi ya, ni ya gba bɛ la lala; amaa ya kyɛ ka ya beesigu takki n‑dɔli ya nini ŋɔn neaai n‑nya sɔpaalli la. Ya tumma Naawunni yuubu tuma nti baŋŋi a gbinni, ni, a veela ka laa n‑nyɛ bunsuma zaa ka Naawunni nini n tigri a.

3Tɔ; Naawunni ŋɔn pun zaŋŋi u suŋŋsim piini n‑ti ma la zugu, n kpaamni ya zaa yinniyinni nŋɔa: ni, yan di gɔsi ya mammansi yɛla n‑teesi, ni, a veela, halli ka ya lala teesa gaari din siri nyɛ yɛlimaŋni maa. Ay! - Ya kyɛ ka ya teesa dɔli la yam maŋni, hoo Naawunni ŋɔn zaŋŋi yɛdda n‑ti ya sɔkam yinniyinni seem. 4Ya nyama - ningbiŋŋu maa nyɛ la bummunni yinni, amaa tuga pam bɛ ka ni, ka a seelikam zaa mari la ka tumni, ka tumni. 5Di nyɛ la lala n‑ti ti zaa: ti zoaaya halli, amaa ti nyɛ la hoo ningbimmunni, tin ŋɔn bɛ Yisa Kirisita ni la zugu. Ka ti zaa ŋmanni la u ningbiŋŋu tuga n‑suŋŋni taaba. 6Ya bu nya? Naawunni pun zaŋŋi u piini n‑ti ti zaa, ka a nyɛ la kookooba. Sɔ yi nyɛ anabi, Naawunni piini maa zugu, ŋɔn tɔ'asima u yɛdda ŋɔn yi ti ti u, ni u ti yɛli seem la. 7Sɔ mun yi gyeemni la niriba, Naawunni piini zugu, ŋɔn zɛ yummu u lala tuma maa: ka sɔ mun yi tumni karimba tuma, ŋɔn gba tumma ni nimmoaa. 8Yaasa, sɔ yi kpamsiri niriba, di sum ni u kpamsiri ba suŋŋa; sɔ mun yi tɔtti tɔra, ŋɔn tumma ni u sufu zaa; sɔ mun yi su toondaana fukumsi, nimmoosi ka u tumni u tuma; halli sɔ yi ya suŋŋi faradima, ŋɔn mari sufupeelli n‑suŋŋi ba.

9Kyɛ ka ya siri wuri la niriba yɛlimaŋni ni, ka di yɔmsira. Ya yaama Sintaani yɛla, ka gyi din nyɛ bunsuŋŋu. 10Zaŋŋi n‑kyaŋŋi mabitirigu wurilim, see ka ya wuri taaba suŋŋa. Zaŋŋi n‑kyaŋŋi gyirima mun tisibu, see ka ya gyeemni taaba nimmoosi. 11Zaŋŋi n‑kyaŋŋi ya tuma ni, yan di mari zinnya'ari; zaŋŋi n‑kyaŋŋi ya sufu ni yɛla, ya kyɛ ka ya nini moaai; ti Dugma ka ya gyeemni sahakam. 12Yan mari tama maa zugu, ya kyɛ ka ya sufu maai; yan mun nya namsigu sahanseaa maa, ya kur mari sugru di puuni; ka yan susiri Naawunni maa, ya susima nimbirimoaa. 13Ya suŋŋma ya nyaandɔlitaaba ban bɛ wahala ni la, ka sɛ'asi n‑deaari saamma n‑kpeesiri ya yiya ni. 14Ya susim bunsuma Naawunni saani n‑tiri seeba ban mugsiri ya: ii! - ya susim bunsuma, ka pa la bumbeoo n‑tiri ba. 15Baseeba ban mari sufupeelli maa, ya paasima ba zugu m‑mari sufupeelli; ban mun sufu sa'am, ya paasima ba zugu sufusa'aŋŋu ni. 16Ya la'amma m‑bɛ ni taaba ni sugru. Yan di duusi ya mansi amaa ka sakki n‑tabli tarimma saani. Yan di boori ya mansi, bee, n‑yɛtti ni, yɛm daandima n nyɛ ya. 17Yan di tum tumbeeri n‑labsi sɔa, ŋɔn tum tumbeoo n‑niŋi ya la zugu. Ay! - ya kpaŋŋma ya mansi n‑tumni tunseesi niriba zaa ŋɔn gɔsiri n‑yɛtti, ni, a veela. 18Ya kyɛ ka yan ni sɔkam mari la nangbanyinni, halli ya yi ti nyaŋŋi lala. 19M mabiwutta, yan di yɔ sɔ tumbeeri samni, amaa ya kyɛ u yoobu yɛla n‑ti la Naawunni, dama ŋɔna n su tubdarigri yɛla zaa. Dama di sɔbi n‑dooli, ni, ti Dugma yɛliya, ni, labsigu n nyɛ u dinni, ni, ŋɔna nin labsi n‑yɔa. 20N‑laa m‑paasi, ni, “Kɔm yi mari i dindaana, nyin tim u diibu ka u di; kɔnyuuri mun yi mari u, nyin tim u koom: i yi niŋi nŋɔ di nin ŋmanni la i moaari la bugunsaala n‑ziinni u zugu.” 21Di kyɛ ka tumbeoo nyaŋŋi i; see ka i mari tunsuŋŋu n‑nyaŋŋi tumbeoo.

Currently Selected:

ROOM DIMA 12: maw

Highlight

Copy