Tiito 2

Uvaʼs talax te Tiito uvaʼ aʼxh laʼ itxhus Tiito inqʼa bʼaʼnla txhusbʼal uvaʼ jit yuel

1Pet koq axh, tan aʼxh laʼ apaxsa el inqʼa yol uvaʼ nik ibʼan eela tuchʼ inqʼa bʼaʼnla txhusbʼal uvaʼ jit yuel. 2Tul laʼ aal te inqʼa qʼesla txhaq vinaq uvaʼ itzʼamalxh tatin laʼ ibʼana. Tul jit kuxh maxtomla vinaq laʼ ibʼana. Pet bʼaxal titzʼabʼal s-vatz. Tul tij tatin tiʼ iqejt inqʼa bʼaʼnla txhaq yol tiʼ Jesuus. Atz nuqxh laʼ tal, tiʼ uvaʼ atxh taanima tiʼ vimol. Tul laʼ ikotxʼ ivatz vatz inqʼa itzaʼlal.

3Tul laʼat aal te inqʼa qʼesla txhaq ixoq uvaʼ aʼxh laʼ motx ikʼutxh vinimal quBʼaal Tiuxh tiʼ ibʼanax vaʼq kam. Atz jit kuxh xeʼtisan yol tiʼ invaʼq xaol. Tul jit laʼ pal iviʼ tukʼat u qʼuʼich taʼl uuva. Pet txhusul tetz bʼaʼnla txhaq txumbʼal laʼ motx ibʼana.

4Echetz laʼ motx taqʼt itxumbʼale inqʼa chelem ixoq tiʼ isaʼax itzumel, atz tiʼ isaʼax inqʼa tal, 5atz tiʼ ibʼaxabʼsal titzʼabʼal s-vatz, atz tiʼ u jikla txumbʼal laʼ ibʼan kʼatz itzumel, atz uvaʼ ikʼulelxhtuʼ, atz tiʼ ikʼuulal taqʼon t-totzotz, atz tiʼ ibʼaʼnt u txumbʼal uvaʼ ayaʼlxh bʼaʼn s-te, atz tiʼ inimat itzumel. Oqetz ech laʼ ibʼane, tul yeʼletz iqʼij viyolbʼal quBʼaal Tiuxh laʼ eli.

6Tul bʼekʼat te inqʼa chelem xaak uvaʼ laʼ ibʼaxabʼsa titzʼabʼal s-vatz.

7Pet aloq aʼ axh iqʼon bʼey tiʼ ibʼanax inqʼa bʼaʼnla bʼanoʼm vatz inqʼa chelem xaak. Tul jikxh axh laʼ abʼan tiʼ atxhusuneʼ. Tul ant axh laʼ niman kam uvaʼ laʼ atxhusa. Atz itzʼamalxh avatin tuchʼ atxumbʼal laʼ abʼana. 8Tul aʼxh laʼ atxhus inqʼa yol uvaʼ nik tijbʼixsan tatin inqʼa niman tetz Jesuus. Tul yeʼl invaʼq kantxhaqla yol laʼ txhej seʼe s-tiʼ. Echetz laʼ ichʼixvisat vet tibʼe inqʼa nik itxhiʼan setiʼ, ex inqʼa niman tetz Jesuus, tiʼ uvaʼ yeʼxhkam vet invaʼq yeʼbʼaʼn laʼ utxh talt setiʼ.

9Tul txhus te inqʼa loqʼel tok tiʼ aqʼon, tiʼ uvaʼ laʼ inima inqʼa bʼaal taqʼon. Tul aʼ laʼ motx ibʼane uvaʼ laʼ motx ichiibʼisa inqʼa bʼaal taqʼon tuchʼ jankʼal inqʼa laʼ motx ibʼana. Pet jit kuxh aʼl laʼ ikʼulelat u bʼaal taqʼon. 10Atz jitoq laʼ telqʼa u aqʼonvil kam tetz u bʼaal taqʼon. Pet kʼuqlebʼal kʼuul laʼ ibʼan tiʼ jankʼal inqʼa taqʼon. Echetz laʼ toksal iqʼije u bʼaʼnla txhusbʼal uvaʼ tzajnaʼq kʼatz quBʼaal Tiuxh, u Chitol qetz. 11Aʼetz uvaʼe, laʼ ibʼan inqʼa niman tetz Jesuus, tan qat ikʼutxhl quBʼaal Tiuxh vimam bʼaʼnil te inqʼa xaol s-kaqaayil; aʼe u chitpichil t-inqʼa kʼaxkʼo tiʼ inqʼa ipaʼv. 12Tul, tiʼetz uvaʼ nik qil vibʼaʼnil quBʼaal Tiuxh, tul aʼetz nik itxhus s-qe uvaʼ tira yeʼl vet qokebʼal tiʼ ibʼanax inqʼa yeʼbʼaʼn, inqʼa yeʼ nik isaʼ quBʼaal Tiuxh, atz tiʼ yeʼ qubʼant inqʼa atxhaʼv uvaʼ nik ibʼan inqʼa xaol vatz u txʼavaʼ, inqʼa yeʼ ootzaqin tetz quBʼaal Tiuxh. Pet itzʼamoqxh qatin qubʼana. Atz jikxh vet oʼ tiʼ ibʼanax kam uvaʼ nik isaʼ quBʼaal Tiuxh tuulbʼal inqʼa tanul yaʼbʼ s-txheel. Tul jikxh laʼ qukʼutxht inimal viyolbʼal quBʼaal Tiuxh vatz inqʼa xaol. 13Tul txʼebʼoʼmoq kuxh al oʼ tiʼ tul uvaʼ toq chiibʼisan oʼ. Aʼe u tulebʼal u quBʼaal JesuKriisto tuchʼ u nimla tatin quBʼaal Tiuxh, u quBʼaal JesuKriisto, u Chitol qetz. 14Tan aʼ u quBʼaal JesuKriisto tzaj s-kʼuul, tul ul taqʼ tibʼ kamoq tiʼ ibʼant quvatzil tiʼ qeesal el vatz u kʼaxkʼo tiʼ inqʼa paʼv. Tan oʼ itenam, tul aʼetz nik isaʼe uvaʼ laʼ qaqʼ ka jankʼal inqʼa yeʼbʼaʼn. Tul nikat isaʼ quBʼaal JesuKriisto uvaʼ laʼxh tzaj t-qaanima ibʼanax inqʼa bʼaʼnla bʼanoʼm. 15Ayaʼletz inqʼae laʼ aal te inqʼa niman tetz Jesuus. Atz bʼan yaʼl tiʼ talax s-te uvaʼ laʼxh motx ibʼana. Tul tij ayolon motx abʼan s-te tiʼ toksalaq t-bʼey. Tan at aviqleʼm tiʼ ibʼanaxeʼ. Tul yeʼ laʼ akuya uvaʼ yeʼxhkam kuxh atxaʼk vatz inqʼa niman tetz Jesuus.

Currently Selected:

Tiito 2: ixlC

Highlight

Copy

Compare