Tiito 1

TIITO

Uvaʼs taqʼt bʼen Paʼp bʼaʼnil ikʼuul Tiito

1In Paʼp; nik intzʼibʼa bʼen val u uʼ see, in vaʼl te inqʼa taqʼonvil quBʼaal Tiuxh, atz in vaʼl te inqʼa iapootol itxhaq quBʼaal JesuKriisto. Atz in, uvaʼ qat itxhaq in quBʼaal Tiuxh, tiʼ uvaʼ jikxh laʼ tootzaqit inqʼa xaol inqʼa bʼaʼnla txhaq yol tiʼ quBʼaal JesuKriisto, atz laʼ motx inima, jankʼal inqʼa xaol, inqʼa chʼexel vet taʼn quBʼaal Tiuxh; atz laʼ tootzaqi inqʼa nuqla txhusbʼal, aʼe vijetxhtaq ok tibʼ kʼatz quBʼaal Tiuxh.{*}#1.1 Eche u yol ‹vijetxhtoʼk tibʼ kʼatz quBʼaal Tiuxh,› chiche, tan aʼ nik taleʼ uvaʼ jikxh laʼ tiqʼot inqʼa niman tetz Jesuus viyolbʼal quBʼaal Tiuxh, tan ech uvaʼe, nik isaʼ quBʼaal Tiuxh. Tul yeʼ laʼ motx paʼvin veteʼ. 2Atz qatat itxhaq in quBʼaal Tiuxh tiʼ vaqʼt tootzaqi, inqʼa chʼexel vet taʼn, tiʼ ikʼult qʼij isaq uvaʼ yeʼl iyaʼebʼal imotxebʼal laʼ ibʼan tiʼ ikʼuqbʼataq ikʼuul tiʼ quBʼaal JesuKriisto. Tan echxh uvaʼe, alel taʼn quBʼaal Tiuxh uvaʼs yeʼxnaqich xeʼtoq tzaan u qʼij saq. Tul nuqxh uvaʼ nik tal quBʼaal Tiuxh, tan jit tzʼeqol tzij. 3Echetze u yol uvaʼ tal quBʼaal Tiuxh, tan ile yaʼn nik telaʼpun vet s-txheel. Tul ile nik taqʼax qootzaqi s-txheel. Aʼetz u yole uvaʼ qat aqʼax viqatzi taʼn quBʼaal Tiuxh, u Chitol qetz, tiʼ uvaʼ laʼ inpaxsa.#Vibʼanoʼm inqʼa Apoostol 9.4-6, 15-19

4Nik intzʼibʼa bʼen val u uʼ see, Tiito, axh, uvaʼ eche inkʼaol avatin sinvatz, tiʼ uvaʼ, val viyolbʼal quBʼaal Tiuxh see, tul laʼich aqej u quBʼaal JesuKriisto. Tul iletze tzum nik qunimat veteʼ.

Tul ibʼaʼnil Tiuxh, viBʼaal u quBʼaal JesuKriisto, atz ibʼaʼnil u quBʼaal JesuKriisto, u Chitol qetz, laʼ atin sakʼatza. [Tul laʼ toybʼa avatz.] Tul aʼ vibʼaʼnil laʼ atin tavaanima.

Uvaʼs talax te Tiito tiʼ kam tilix vaʼl iqʼon iviʼ

5Poro vaqʼetz ka axh tu txʼavaʼ Kreeta, tiʼ uvaʼ laʼ motx ooksa inqʼa niman tetz Jesuus s-jik tiʼ tootzaqit inqʼa txhusbʼal uvaʼ inuqulxhtuʼ. Tan ech uvaʼe, alel vet see vaʼn. Atz vaqʼat ka axh, tiʼ uvaʼ laʼich motx ooksa iqʼonaq iviʼ s-xoʼl t-junun inqʼa tenam. 6Aʼetz laʼ ok s-iqʼon iviʼ uvaʼ yeʼl invaʼq yol uvaʼ kantxhaq laʼ txhej s-tiʼ. Tul vaʼl kuxh tixqel. Tul niman tetz Jesuus inqʼa initxaʼa. Atz maqelaq tibʼ inqʼa initxaʼa tiʼ ibʼant tatxhaʼv vitxhiʼoʼl. Tul jit kuxh palsanaq yol. Echetz yeʼ laʼ itxhej yole s-tiʼ. 7Poro aʼxh isaʼ uvaʼ yeʼl invaʼq kantxhaqla yol laʼ txhej tiʼ u iqʼon iviʼ. Tan aʼ u ilol tetz taqʼon quBʼaal Tiuxhe. Tul jit kuxh aʼ laʼ toksa u tetz. Atz jit kuxh nal laʼ ilakp iviʼ. Atz jit bʼiitxhaqul kuxh tuul tukʼat qʼuʼich taʼl uuva. Tul jit kuxh txhokol txhʼaʼo. Atz jit kuxh een taanima tiʼ txʼakoʼm uvaʼ tuchʼ subʼuʼm laʼ ibʼanvat. 8Pet aqʼol ivatbʼal xaol. Tul een taanima tiʼ ibʼanax u bʼaʼn. Atz itzʼamalxh tatineʼ. Tul aʼ nik ibʼan uvaʼ yeʼl txhʼoj yeʼl nim s-vatz. Atz txʼakel vet ok taanima tiʼ quBʼaal Tiuxh. Tul junt nik itxʼol imaqt tibʼ tiʼ yeʼ ibʼanax inqʼa kantxhaq. 9Atz aʼxh txʼakel ok taanima tiʼ iqeex inqʼa bʼaʼnla txhaq yol tiʼ Jesuus uvaʼ kʼuqlebʼalxh kʼuul. Tul antxh nik ibʼan inqʼa txhusbʼal uvaʼ motx qal s-te. Oqetz aʼxh inqʼae laʼ tiqʼo, tul laʼetz itxʼol itxhusux joltoʼq niman tetz Jesuus tuchʼ inqʼa bʼaʼnla txhusbʼal uvaʼ jit atoʼk iyuel. Atz antxh inqʼae, laʼ ibʼanbʼe tiʼ ibʼokʼtziil inqʼa vaʼlen nik tal tiʼ inqʼa bʼaʼnla txhaq yol tiʼ Jesuus. 10Tan mam tel kuxh xaol uvaʼ ant kuxh teesat iqʼij inqʼa bʼaʼnla txhaq yol tiʼ Jesuus. Tul aʼ kuxh nik motx tal inqʼa mamala yol uvaʼ yeʼxhkam laʼ taqʼa. Pet eesanal kuxh t-bʼey tuchʼ inqʼa iyol nik motx taleʼ. Antetzxh inqʼa niman tetz Jesuus nik motx bʼanon s-eche, inqʼa aʼ kuxh txʼakel ok taʼn vinimal inqʼa iqejoʼm u tuqʼeʼybʼal inqʼa tij imam Israeel. 11Aʼetz inqʼa xaole uvaʼ laʼ motx ajup itziʼ tiʼ inqʼa yol uvaʼ nik motx taleʼ. Tan nik motx iyansa iviʼ jankʼal tatin xaol t-totzotz tuchʼ uvaʼ nik itxhuseʼ, uvaʼ jitxh ikʼulel laʼ tala. Tul jit ikʼulel laʼ itxʼak ipuaq s-tiʼ.

12Antetzxh invaʼl aj Kreeta, uvaʼ aj txumbʼal vatz inqʼa xaol, uvaʼ ech tal tiʼ inqʼa imol s-eche: —Poro tzʼeqolaq tzij kuxh inqʼa inmol s-aj tenam Kreeta. Atz echaqe yaabʼla txhaq jaqʼ tzeʼil txoo nik motx ibʼan tuchʼ inqʼa itxumbʼal. Tul aʼ kuxh nik motx titzʼa inoj inqʼa tuul. Tul yeʼaq isaʼ aqʼon, —xeʼt u aj txumbʼal.

13Poro antetzxhte u yol uvaʼ tal u aj txumbʼal. Echetz tij vet laʼ ayajt inqʼa niman tetz Jesuus, inqʼa aj Kreeta tiʼ toksalaq t-bʼey. Echetz laʼ itxʼolt tiqʼole inqʼa bʼaʼnla txhaq yol tiʼ Jesuus uvaʼ yeʼl iyuel atoʼk, uvaʼ nik tijbʼixsan tatin inqʼa niman tetz Jesuus. 14Tul yeʼ laʼ motx bʼen iviʼ tiʼ inqʼa oʼtla txhaq yol, inqʼa jit inuqul, inqʼa alel kuxh ka taʼn inqʼa kʼuy imam, inqʼa tij imam Israeel. Atz yeʼ laʼ taqʼ iviʼ tiʼ inimal inqʼa bʼekʼbʼal uvaʼ tetz kuxh xaol, atz yeʼ nik ibʼan eela tuchʼ inqʼa bʼaʼnla txhaq yol tiʼ Jesuus uvaʼ inuqulxhtuʼ. 15Tan jankʼalxh inqʼa kam, jankʼal eche inqʼa etxhbʼubʼal, tan bʼaʼn kuxh vatz inqʼa niman tetz Jesuus. Tan bʼaʼn vet inqʼa taanxelal vatz quBʼaal Tiuxh. Pet koq inqʼa palsan yol, atz inqʼa jit niman tetz Jesuus, jit bʼaʼn taanxelal vatz quBʼaal Tiuxh, tan yeʼxhkam invaʼq kam uvaʼ laʼ bʼensan s-bʼaʼn vatz quBʼaal Tiuxh, kʼuxh kaqaayil inqʼa kam laʼ motx iqeja uvaʼ txaj s-vatz. Tan tira yannaʼq titzʼabʼal. Atz jitoq nik iqejeʼ kam u bʼaʼn nik tal u taanima s-te.#Tio 15.1-20 16Tul nik motx tal tibʼ s-ootzaqin tetz quBʼaal Tiuxh, poro aʼ vibʼanoʼm nik kʼutxhun uvaʼ tira yeʼ ootzaqimal quBʼaal Tiuxh taʼn. Tan tira yeʼl invaʼq bʼaʼn nik talax tiʼ jankʼal inqʼa nik motx ibʼaneʼ. Tan tira txoqebʼal kʼuul inqʼa itxumbʼal vatz quBʼaal Tiuxh. Tul palsanaq kuxh yol. Atz jitoq kuxh laʼ oleʼvaq tiʼ ibʼanax jankʼal inqʼa bʼaʼnla txhaq bʼanoʼm uvaʼ nik isaʼ quBʼaal Tiuxh.

Currently Selected:

Tiito 1: ixlC

Highlight

Copy

Compare