Tiito 3

Uvaʼs talax te Tiito uvaʼ laʼ tulsa Tiito s-kʼuul inqʼa niman tetz Jesuus, tiʼ uvaʼ jikxh laʼ tatineʼ, atz laʼ toksa t-bʼey inqʼa nik palsan yol

1Tul laʼ motx uulsa s-kʼuul inqʼa niman tetz Jesuus uvaʼ laʼ motx inima, atz laʼ motx toksa tibʼ jaqʼ ibʼekʼbʼal inqʼa iqʼesalaq tenam, atz laʼ motx inima inqʼa iqʼon iviʼ s-xoʼl. Tan bʼaʼn uvaʼ ayaʼl kuxh bʼaʼn te inqʼa niman tetz Jesuus laʼ ibʼana tiʼ ibʼanax bʼaʼnla txhaq bʼanoʼm. 2Tul laʼ aal te inqʼa niman tetz Jesuus uvaʼ jit kuxh xeʼtisan tetz invaʼq yol tiʼ imol. Tul jit kuxh txhokol txhʼaʼo. Pet ayaʼlxh bʼaʼn s-te laʼ ibʼan te jolt xaol. Atz tzʼuʼkinla aanima laʼ motx ibʼan xoʼl jankʼal inqʼa xaol. 3Echetze u qatinich s-jatxhaq tzaan tuulbʼal uvaʼs yeʼxnaqich qootzaqit quBʼaal JesuKriisto, tan aʼ kuxh inqʼa kantxhaq nikich qubʼaneʼ. Atz jitoq nikich qunima viyolbʼal quBʼaal Tiuxh. Atz nikich kuxh qaqʼ qibʼ eesaloq t-bʼey taʼn jolt xaol. Atz tira txhabʼamich qutxeyp taʼn inqʼa yaabʼla txhaq atxhaʼv, atz kalabʼaq atxhaʼv tetz qutxhiʼoʼl uvaʼ jit ikʼulel laʼ motx qubʼana. Tan aʼ kuxh nikich qubʼan inqʼa yeʼbʼaʼn, atz nikich kuxh qutxhiʼan tiʼ tatxhval kam tetz jolt xaol. Tul junt kuxh nikich qutxhok qutxhiʼkʼuulal taʼn inqʼa xaol. Tul echatetz kuxh nikich qutxhiʼkʼuulat vet inqʼa xaole.

4Aloq kʼuxhetz aʼ inqʼa yeʼbʼaʼn nikich qubʼaneʼ, pet aʼetz vet u quBʼaal Tiuxh, u Chitol qetz, qat bʼanon bʼaʼnil s-qe. Tul qat ikʼutxha uvaʼ at taanima s-qiʼ, atz tiʼ jankʼal xaol s-kaqaayil. 5Qatetz ichit oʼ vatz inqʼa kʼaxkʼo t-inqʼa qupaʼv. Poro jit tiʼ uvaʼ, aʼ koqxh u jik nikich qubʼan vatz quBʼaal Tiuxh tul qat ichit oʼ. Pet tiʼ uvaʼ qat itxum quBʼaal Tiuxh quvatz. Qatetz ijalpu u qatineʼ tuchʼ kam uvaʼ qat ibʼan viTiuxhil tu qaanima. Tan eche isujux invaʼq kam, atz itxʼajax invaʼq kam qat ibʼan s-qe. 6Echetz tiʼ u quqejt u quBʼaal JesuKriisto, u Chitol qetz, tul tira qat toksa quBʼaal Tiuxh viTiuxhil tu qaanxelal. 7Echetz qat ibʼan quBʼaal Tiuxhe, tiʼ uvaʼ jit vet oʼ aj paʼvom s-vatz taʼn vibʼaʼnil u quBʼaal JesuKriisto. Tan aʼ isaʼ laʼ qetzan tiʼ u bʼaʼnil s-kʼatza. Aʼetz u kam nik qutxʼebʼeʼ uvaʼ kʼuqlel vet qukʼuul s-tiʼ, aʼe, uvaʼ yeʼl iyaʼebʼal imotxebʼal u qʼij qusaq toq ibʼaneʼ. 8Tan kʼuqlebʼalxh kʼuul inqʼa yol inqʼa qat val see. Niketz insaʼeʼ uvaʼ yeʼ laʼ atanbʼa itxhusux te inqʼa niman tetz Jesuus. Tul laʼ abʼan yaʼl s-te tiʼ inimaleʼ. Echetz laʼ motx ibʼante inqʼa niman tetz quBʼaal Tiuxh inqʼa bʼaʼnla bʼanoʼm uvaʼ laʼ txakun te inqʼa xaol s-kaqaayil. Tan aʼ inqʼa txhusbʼale inqʼa at tokebʼal, atz at itxaʼk te inqʼa xaol.

9Pet yeʼletz axh laʼ ok bʼen axh tiʼ iyolox inqʼa yol uvaʼ tuchʼ kuxh txhiʼkʼuula ibʼ nik motx ibʼanvat. Atz yeʼlat axh laʼ ok bʼen axh tiʼ iyolox inqʼa yol tiʼ kʼuy imam inqʼa xaol. Atz yeʼlat axh laʼ ok bʼen axh tiʼ iyolox inqʼa bʼekʼbʼal tetz inqʼa tij imam Israeel; atz aʼ koq laʼ abʼanvat txhan txhʼaʼo tiʼ inqʼae. Atz yeʼxhkam itxaʼk inqʼa yol inqʼae; tul yeʼxhkam invaʼq laʼ taqʼa.

10Pet jaʼletz uvaʼ, aʼ kuxh txhʼaʼo nik itxhok ixeʼt tiʼ inqʼa yol inqʼae, tul laʼetz amaq inpaqul, ikaʼpaq. Tul taʼnetze. Oqetz antel kuxh laʼ ibʼane, tul tiraetz laʼ aaqʼ ka s-eche, yeʼl vet avokebʼal s-tiʼ laʼ ibʼana. 11Pet toqetz eeleʼ, eeleʼ uvaʼ junt kuxh toq taqʼ vet jaʼpe u yol s-tiibʼa tiʼ ikʼaxbʼisaleʼ, tan tira txoqebʼal kʼuul inqʼa paʼv nik ibʼaneʼ.

Uvaʼs talt opoon Paʼp kaʼl viyol te Tiito

12Aʼ nik val uvaʼ toq intxhaq bʼen Arteemas sakʼatza tal uvaʼ atil axh; atz maq Tiikiko toq intxhaq bʼen. Pet iletz koq kuxhte nik topooneʼ, tul laʼ abʼan yaʼl tiʼ avul sinkʼatza tu tenam Nikoopolis. Tan aʼ nik vitzʼa uvaʼ, aʼ toq atink in tzitzi tuulbʼal viqʼiil u txun txheʼv. 13Pet eche Seenas, u les, tuchʼ Apoolos, tan aʼ laʼ abʼane uvaʼ ayaʼlxh akʼuul laʼ motx alotxh tiʼ kam uvaʼ laʼ motx saʼon s-te tiʼ bʼey. 14Pet tetxhal kuxh laʼ itxhus tibʼ inqʼa qumol s-niman tetz Jesuus, tiʼ itxhabʼat ibʼanax inqʼa bʼaʼnla txumbʼal tiʼ lotxhoʼm. Tul aʼ laʼ motx lotxhonk tal uvaʼ laʼ isaʼvat tokeʼ. Atz jankʼale tiʼ ibʼanax inqʼa bʼaʼnla txhaq bʼanoʼm. Pet jit kuxh aʼ laʼ ibʼan uvaʼ laʼ kuxh atin s-eche.

Uvaʼs taqʼt bʼen Paʼp bʼaʼnil ikʼuul Tiito tul yaʼ vet tiʼ itzʼibʼal bʼen viyol

15Jankʼalxh inqʼa niman tetz Jesuus, inqʼa at sinkʼatza, nik aqʼon bʼen bʼaʼnil akʼuul. Tul nikat qaqʼ bʼen bʼaʼnil ikʼuul inqʼa niman tetz Jesuus, inqʼa at tzitzi, ex inqʼa at etaanima s-qiʼ, atz inqʼa vaʼl kuxh nik quqejt u quBʼaal Jesuus s-tuchʼ. Tul aʼ vibʼaʼnil u quBʼaal Jesuus laʼ atin sekʼatza sekaqaayil.

[Tul echxh laʼ ibʼane.]

Currently Selected:

Tiito 3: ixlC

Highlight

Copy

Compare